VOV4.Bahnar - Kiơ̆ kơ sô̆ chih jô̆ đơ̆ng Anih vei lăng tơ drong jĭ jăn dêh char Dak Lak, jĭ pơ lŏ lĕch đe oei tŏk tôch dêh mưh lơ̆m 1 giĕng âu ki đei dang 400 ‘nu bơ ngai jĭ. ‘Nâu jĭ tơ drong ăn ƀôh rŏ năng jĭ gô tơ pŏh hrĕnh tơ̆ hơ năp kơnh. Lăp jô̆ hơ drô̆ lơ̆m 3 năr tơ jê̆ âu (25-26-27/7) Dak Lak đei 200 ‘nu bơ ngai jĭ ‘nao, lơ̆m nŏh đei 114 ‘nu bơ ngai jĭ pơ lŏ lĕch đe Dengue ăl. Hơ tŏk đĭ đăng kơ sô̆ bơ ngai jĭ pơ lŏ lĕch đe tơ̆ Dak Lak truh 2.211 ‘nu, tŏk 4,4 ‘măng pơ têng hăm khei âu sơ năm 2021.

Pơ lôch klanh jĭ tơ drong jang ‘lơ̆ng hlŏh vă tang găn jĭ pơ lŏ lĕch đe

Jĭ pơ lŏ lĕch đe đei tơ̆ đĭ đăng 15 apŭng, thĭ xăh, plt, lơ̆m nŏh đei 3 tơ ring jĭ pơ lŏ lĕch đe dêh hlŏh ‘nŏh Ea Súp, Krông Pach păng plt Buôn Ma Thuột. Kiơ̆ ƀok Hoàng Hải Phúc, Phŏ kơ dră chĕp kơ̆l Anih vei lăng tơ drong jĭ jăn dêh char Dak Lak rŏ năng jĭ dêh hlŏh gô đei lơ̆m khei 8 păng khei 9, yoa thoi nŏh, kŭm hăm tơ drong adrin đơ̆ng Anih jang pơ gang, rim bơ ngai athei hơ tŏk đon kơ chăng, bơ̆ jang ‘lơ̆ng dôm trong tang găn jĭ nhen hơ met rơ gŏh cham char, pơ chŏh hŭt đak lŏk, klơ̆p hơ met bô̆i mong đak, pơ lôch hŭt klanh...

Dơ̆ng: Tơ blơ̆