VOV4.Bahnar - Dôm năr tơ jê̆ âu, rim hnam pơ gang lơ̆m dêh char Dak Lak hơ nơ̆ng sơng iŏk lơ bơ ngai hơ ioh truh khăm păng ƀĭch tơ̆ hnam pơ gang yua đơ̆ng ƀơm jĭ jơ̆ng ti ƀơ̆r. Kăl kơ lăng truh, lơ hơ ioh đei jĭ jơ̆ng ti ƀơ̆r mă lei mĕ ƀă ưh kơ băt, truh ƀơ̆t ƀĭch tơ̆ hnam pơ gang hơ ioh đĭ jĭ ăl bơ̆ih.

      Vei lăng kon đei hloh 10 khei đei jĭ jơ̆ng ti ƀơ̆r tŏk bŏk hơ met tơ̆ hnam pơ gang Đa khoa tơ ring Tây Nguyên, yă Vũ Thị Hương oei tơ̆ apŭng Krông Pách, dêh char Dak Lak tơ băt, 1 giĕng hơ drol, ŭnh hnam ƀôh mon đei yuh, ‘nhơ̆m, lĕch tơ ƀroih tơ̆ lơ̆m tơ pang ti kơ na ba truh tơ̆ Hnam pơ gang apŭng hơ met. Đơ̆ng rŏng 2 năr tơ̆ hnam pơ gang apŭng, jĭ tam mă đei dă ƀiơ̆ kơ na ŭnh hnam chơ ba tơ̆ Hnam pơ gang Đa khoa tơ ring Tây Nguyên.

     “Ki hei brei mơ sơ̆ lăp lăng ti vi, ƀak si kŭm tơ roi jĭ ‘nâu krê hơ mơt kơ na ƀôh mon thoi noh ‘noh ba năm tơ̆ hnam pơ gang vă kơ ƀak si khăm hloi, mă lê̆ oei tơ̆ hnam krê hơ mơt dêh.”

Ƀak si Hnam pơ gang Đa khoa tơ ring Tây Nguyên tŏk bŏk khăm ăn hơ ioh đei jĭ jơ̆ng ti ƀơ̆r

      Kŭm vei lăng kon tơ̆ khoa hơ met đe hơ ioh jĭ kơ Hnam pơ gang  Đa khoa tơ ring Tây Nguyên, mŏ Nguyễn Thị Thanh Thảo oei tơ̆ apŭng Cư Kuin, dêh char Dak Lak tơ băt, mŏ oei tam mă đĭ hli ƀơ̆t dôm năr âu ki lăng ƀôh kon sư đei gơ̆ hơ nơ̆ng yua đơ̆ng jĭ jơ̆ng ti ƀơ̆r:

      “7jơ pơ gê ƀak si ‘nao mơ̆t khăm đang ƀak si lĕch ‘noh mon gơ̆ hloi, gơ̆ dang 10 pơ nĭt mon hơ dơ̆r dơ̆ng, lơ̆m 2jơ kơ sơ̆ ‘noh mon gơ̆ 1 ‘măng dơ̆ng, dang 10 pơ nĭt mă ưh kơ hơ dơ̆r 30 pơ nĭt hloi, ‘noh jĭ ăl hloh lơ̆m năr. Sư tôch kơ krê hơ mơt hăm kon ĭnh, hrĕnh dêh păng ưh kơ tom băt hloi.”

     Ƀak si Trần Thị Thúy Minh, Kơ dră Khoa hơ met đe hơ ioh jĭ  Hnam pơ gang Đa khoa tơ ring Tây Nguyên tơ băt, dang ei hnam pơ gang tŏk bŏk sơng iŏk hơ met lơ hơ ioh đei jĭ jơ̆ng ti ƀơ̆r, lăp jô̆ hơ drô̆ lơ̆m 1 giĕng tơ jê̆ âu, Khoa hlôi sơng iŏk hơ met ăn hloh 10 ‘nu jĭ. Kiơ̆ kơ ƀak si Minh, jĭ jơ̆ng ti ƀơ̆r đa tơ ƀơ̆p tơ̆ hơ ioh hơ la kơ 5 sơ năm, mă kăl ‘noh jĭ hơ ioh hơ la kơ 3 sơ năm. Jĭ tôch kơ ƀônh tơ poh. Hơ ioh đa ƀơm yŏng jĭ pơm ăn jĭ jơ̆ng ti ƀơ̆r mưh ngôi tơ jê̆, pel chĕp, tơ prăh kơ tă đak muh, ƀơ̆r, đak hai, đak đơ̆ng lĕch hmrŏng hmrônh păng ĭch bơ ngai jĭ dăh mă đơ̆ng dôm tơ mam đei ƀơm kơ loăi yŏng jĭ âu nhen bơ̆n tơ mam pơ ngôi...

Ôp ti rơ goh gô jing trong đei yua tơ gŭm hơ ioh dă ƀiơ̆ kơ đei jĭ jơ̆ng ti ƀơ̆r

       Mưh đei jĭ, hơ ioh gô đei ƀôh jĭ hơ lŏng, lĕch ƀre ƀrônh, lĕch hmrŏng ƀrônh tơ̆ ti, jơ̆ng dăh mă pơ tau. Hăm dôm bơ ngai jĭ păh lăp, jĭ gô klăih kơ dih đơ̆ng rŏng 2,3 năr. Mă lei, 1,2 ‘nu jĭ đei ƀôh jĭ ăl, ưh kơ đei hơ met tơ tom gô ƀơm ưh kơ ‘lơ̆ng truh tơ̆ ‘ngok păng pơm ăn 1,2 tơ drong jĭ ăn hơ ioh nhen jĭ ‘ngok yua đơ̆ng yŏng jĭ...

       “Jĭ âu đei ƀôh jĭ pha ra băl păng mơ̆ng kiơ̆ dêh dar gô đei kâp kư̆u tơ tom. Mưh lei đe mĕ đe ƀă athei lăng truh tơ̆ kon bơ̆n mưh mon đei ƀôh yuh, đei lĕch hmrŏng hmrônh tơ̆ tơ pang ti tơ pang jơ̆ng, tơ̆ ƀơ̆r ‘noh athei  năm tơ̆ hnam pơ gang jê̆ hloh vă khăm jĭ păng băt hơ dăh jĭ ăl vă hơ met tơ tom.”

       Kŭm kiơ̆ kơ ƀak si Trần Thị Thúy Minh, jĭ jơ̆ng ti ƀơ̆r ‘noh tơ drong jĭ tơ poh dei dei, tam mă đei vắc xin tang găn. Tơ drong tang găn jĭ găh lơ ‘moi kiơ̆ tơ drongbăt vei lăng rơ goh ăn hơ ioh păng bơ ngai vei lăng hơ ioh athei ôp ti hơ nơ̆ng hăm đak păng sơ ƀŏng, pơm rơ goh rim năr păng pơ lôch pơ rang tơ̆ tơ mam pơ ngôi hơ ioh. Hăm hơ ioh đei jĭ jơ̆ng ti ƀơ̆r păh lăp, gơh vei lăng păng hơ met tơ̆ hnam. Mă lei mĕ ƀă păng bơ ngai vei lăng kăl kơ hơ len lăng hơ ioh, tơ dăh chă ƀôh dôm tơ drong jĭ jing ăl ‘noh ba hơ ioh truh tơ̆ hnam pơ gang tơ jê̆ hloh vă đei hơ len lăng păng hơ met tơ tom.

            Nam Trang: Chih

Thuem: Tơ blơ̆