Tơdrong jang kơyuơ Anih Tơgŭm jang Hơtŏk tơpôl (SCD), lơ̆m Anih tơm Khoa hŏk păng Kŏng ngê̆ jang atŭm hăm Hnam pơgang hơmet jĭ Tơxoh Đăk Lăk pơgơ̆r đơ̆ng năr 9/11 truh đĭ năr (15/11). Dang ei, kơsô̆ bơngai ƀơm jĭ hiĕn hiang lơ̆m jâ̆p dêh char tŏk truh 170 'nu lơ̆m 100.000 măt kon pơlei; oei lơ bơngai jĭ hiĕn hiang lơ̆m pơlei pơla tam mă ƀôh băt, hơmet tơtom.

Anih jang y tê̆ Đăk Lăk hlôi hơtŏk tơlĕch khăm păng hơmet jĭ lơ̆m pơlei pơla. Lơ̆m 'măng mă âu, Anih Tơgŭm jang Hơtŏk tơpôl (SCD) tơgŭm khăm hơlen tơ̆ 6 xăh kơ apŭng Ea H’leo, păng pơdui đunh lơ̆m 6 năr, kơsô̆ bơngai đei khăm hơlen pơhlom 2.700 'nu, tôm adoi chŭp phim X-quang; ăh ƀôh băt ƀơm jĭ gô iŏk đĭ mơkrơh vă xet ngĭm păng mưh ƀơm jĭ hiĕn hiang noh gô đei hơmet jĭ kơtă hloi.