Hăm kon pơlei Êđê tơ̆ pơlei Kŏ Mleo – tơring đei lơ bơngai ƀŏơm pơlŏ pơgrŭn hloh tơ̆ xăh Hòa Thắng, pơlei tơm Buôn Ma Thuột lơ̆m dôm xơnăm adrol ki, noh pơlŏ pơgrŭn dang ei pă đei oei. Pơmai Hrobeca Mlô, pơlei Kŏ Mleo ăn tơbăt: “Lơ̆m pơlei noh lơ bơngai năm jang tơ̆ mir, đei bơngai noh năm tơ̆ bri gơ̆ tơƀăng. Dang ei tơdrong vei lăng jơhngơ̆m jăn đei hơtŏk bơih. Gơnơm găh Anih jang vei lăng jơhngơ̆m jăn, vei lăng pơgang hơmet pơrang jĭ năm tơroi pơtho, dang ei mưh pơlŏ pơgrŭn noh kơdih năm truh Anih jang vei lăng jơhngơ̆m jăn, vei lăng pơgang hơmet pơrang jĭ, ưh đei nhen xơ̆ ki noh chă xoi kơ yang, mưh năm tơ bri noh adoi ‘nhăk ba kơmŭng âu to”

Ƀak sih Hoàng Văn Hùng, Kơdră Anih jang vei lăng jơhngơ̆m jăn, vei lăng pơgang hơmet pơrang jĭ xăh Hòa Thắng ăn tơbăt, tơdrong hlôh vao păng băt chă bơ̆ng jĭ đơ̆ng kon pơlei roi năr roi hơtŏk; Tơdrong erih đei hơtŏk noh tơdrong năm tơ̆ bri, năm jang mir đunh năr pă gan đei bơih; Atŭm hăm noh tơlĕch tơdrong jang tang găn păng tơjră pơlŏ pơgrŭn duh hơnơ̆ng đei Anih jang vei lăng jơhngơ̆m jăn, vei lăng pơgang hơmet pơrang jĭ  tơrĕk truh: “Anih jang tơlĕch hop akŏm rim khei ăn khul jang tơgŭm vă hơtŏk tơroi tơbăt găh tang găn păng tơjră pơlŏ pơgrŭn ăn dôm bơngai mă ƀônh ƀơm jĭ nhen bơngai năm tơ̆ bri, tep tơ̆ mir đang kơ noh dôm bơngai năm jang xa tơ̆ ataih tơ̆ dôm tơring tŏk bŏk oei ƀơm pơlŏ pơgrŭn, đang kơ noh axong kơmŭng đei tong hăm pơgang hoă chơ̆t”

Kiơ̆ ƀak sih Võ Minh Hùng, Kơdră Anih jang vei lăng jơhngơ̆m jăn, vei lăng pơgang hơmet pơrang jĭ pơlei tơm Buôn Ma Thuột noh, ăh xơnăm 2022, tôm 21 xăh phuơng kơ pơlei tơm hlôi pơtoi lơ̆m 3 xơnăm ưh đei pơrang pơlŏpơgrŭn lơ̆m tơring, dôm tơdrong pơkăp vei xơđơ̆ng vă hơmet klaih pơlŏ pơgrŭn đei pơtoi hơnơ̆ng. Pơlei tơm jing tơring mă blŭng kơ dêh char Đăk Lăk đei xơkơ̆t hlôi hơmet klaih pơlŏ pơgrŭn. Ƀak sih Võ Minh Hùng akhan, mă thoi noh, pơlei tơm adoi oei pơtoi tơlĕch dôm trong jang tang găn păng bơ̆ng pơlŏ pơgrŭn hơbuh hơlơ̆k dơ̆ng: “Tơdrong mă hơmet klaih pơlŏ pơgrŭn lơ̆m xơnăm 2022 noh jing dôm tơdrong đei jơnei mă blŭng đĕch, lơ̆m khei năr truh duh athei pơtoi hơtŏk tơdrong tơroi tơbăh ăn kon pơlei, mă hăt noh hăm bơngai jang tơ̆ bri, tep tơ̆ mir, dăh mă năm jang tơ̆ tơring nai chôt vih, vă đe băt hơdăh tơdrong vei lăng jơhngơ̆m jăn ăn tơpôl, ‘nguaih kơ noh nhôn duh hơtŏk pơih dôm lăm hŏk vă hơtŏk hlôh vao ăn đe kang ƀô̆ jang vei lăng jơhngơ̆m jăn, vei lăng pơgang hơmet pơrang jĭ găh ƀôh băt, tơroi tơbăt păng pơtho chă tơroi ăn kon pơlei găh dôm trong jang tang găn păng hơmet pơlŏ pơgrŭn lơ̆m tơring teh kơ pơlei tơm”

Kiơ̆ Anih jang Hơlen Pơrang jĭ jăn dêh char Đăk Lăk, pơlŏ pơgrŭn hlôi tơjur lơ̆m 3 xơnăm kơ âu. Mưh nhen xơnăm 2020, jâ̆p dêh char đei 126 ‘nu bơngai pơlŏ pơgrŭn, noh truh xơnăm 2021-2022, rim xơnăm đei hloh 10 ‘nu. ‘Nguaih kơ pơlei tơm Buôn Ma Thuột hlôi đei xơkơ̆t hơmet klaih pơlŏ pơgrŭn, dang ei đei 6 apŭng, thĭ xăh chih măt gô hơmet klaih pơlŏ pơgrŭn ăh jê̆ đĭ xơnăm âu.

Ƀak sih Hoàng Hải Phúc, Phŏ Kơdră Pơgơ̆r Anih jang Hơlen Pơrang jĭ jăn dêh char Đăk Lăk ăn tơbăt, mă tơdrong jang tang găn păng hơmet pơlŏ pơgrŭn đei jơnei hơ-iă, chŏng mă tơ̆ tơring Tây Nguyên păng minh ƀả dêh char kơ jâ̆p teh đak adoi oei lơ. Kơyươ noh, khei năr truh, Anih jang kơchăng tơlĕch tơchơ̆t tang găn pơlŏ pơgrŭn hơbuh hơlơ̆k dơ̆ng, pơtoi dôm tơdrong jang hơlen hơnơ̆ng tơ̆ dôm jăl pơkăp jang:  “Nhôn hơtŏk kơtang tơdrong tơroi tơbăt ăn kon pơlei păng dôm anih jang atŭm pơm jang. Mă 2 noh nhôn hơtŏk hơlen kơsô̆ bơngai jĭ, mă 3 noh hơlen kơsô̆ bơngai jĭ tơ̆ dôm anih hơbuh jĭ kơtang. Hơnơ̆ng kiơ̆ pơkăp noh năm hơlen chih akŏm bơngai jang tơ̆ bri, tep tơ̆ mir, dôm bơngai mă đe nhôm ƀônh ƀơm pơlŏ pơgrŭn noh iŏk pham vă xet ngĭm vă dăh băt hrôih dôm bơngai đei hram xơmach pơlŏ pơgrŭn păng atŭm hăm noh nhôn tơlĕch chă tong kơmŭng hăm pơgang kiơ̆ pơkăp 2 ‘măng”

Dôm tơdrong đei jơnei hơ-iă lơ̆m tơdrong jang tang găn păng hơmet pơlŏ pơgrŭn lơ̆m tơring teh dêh char Đăk Lăk jing tơdrong tơm vă dêh char pơtoi hơmet klaih tơdrong jĭ âu, pơkăp hơmet klaih hlŏng hloi pơlŏ pơgrŭn ăh xơnăm 2028.