VOV4.Bahnar - Năr 14-10, khŭl bơ̆ jang kơ Dơnŏ anĭh tơm vei lăng jang pơgang kơ yuơ ƀok Bùi Khánh Toàn, Kơ iĕng Kơdră chĕp pơgơ̆r Dơnŏ anĭh tơchĕng hơlen Pơrang Jĭ jăn Tây Nguyên pơm kơdră khŭl hlôi bơ̆ jang hăn Hnam pơgang tơm tơring Tây Nguyên păng Hơnĭh bơ̆ jang Dăr lăng pơrang jĭ jăn dêh char Dak Lăk găh tang găh jĭ chŭ hle lơ̆m dêh char.

Khŭl bơ̆ jang dăr lăng hơnĭh ming hơmet jĭ chŭ hle tơ̆ Hnam pơgang tơm tơring Tây Nguyên

Kiơ̆ tơbăt tơ̆ jơ bơ̆ jang, lăp đơ̆ng rŏng đei nơ̆r tơbăt kơchăng găh jĭ chŭ hle đơ̆ng Dơnŏ anĭh jang Pơgang apŭng plĕnh tĕh, Dơnŏ anĭh vei lăng jang pơgang Dak lăk hlôi pơjing trong jang tang găn păng iung jang dăr lăng tơ̆ rim trong nơnăm tơring sơlam tĕh đak. Lăp đơ̆ng rŏng Việt Nam ƀô̆h đei bơngai tơpŏh jĭ chŭ hle tơ̆ pơlei tơm Hồ Chí Minh, dơnŏ anĭh jang pơgang jei hlôi tơroi tơbăt ăn Dơnŏ anih bơ̆ jang vei lăng kon pơlei dêh char Dak Lăk trong iung jang tang găn jĭ chŭ hle; pơtho pơhrăm ăn ƀok thây pơgang ming hơmet jĭ jăn păng bơ̆ jang tang găn hơlau găh tơdrong jĭ chŭ au. Hnam pơgang tơm tơring Tây Nguyên hlôi hơmet tôm tong kmăi kmŏk, tơmam drăm jang pơgang păng khul bơ̆ jang lơ̆m pơgơ̆r chă khăm hơlen, ăn oei hơdrô̆ păng ming hơmet jĭ jăn tơdăh đei bơngai tơpŏh jĭ chŭ hle. Vă bơ̆ jang ‘lơ̆ng tang găn jĭ chŭ hle, Khŭl bơ̆ jang dăr lăng pơchŏh trong iung jang tơ̆ dơnŏ anĭh chĕp pơgơ̆r tang găn jĭ jăn; atŏk kơtang dăr lăng, lăng hơlen, pơrô̆ tang găn hơlau pơrang jĭ lơ̆m dêh char, mă kăl rim tơring hơmơt tơpŏh kơtang hlŏh.

VOV Tây Nguyên/Amazưt tơblơ̆