Lơ̆m dôm xơnăm kơ âu, tơdrong jang plang pham ‘mêm kơ-eng kơ dêh char Kon Tum hlôi tơgop kăp gĭt ăn tơdrong jang vei lăng jơhngơ̆m jăn kon pơlei. Lơ̆m xơnăm 2022 âu ki, jâ̆p dêh char pơgơ̆r plang đei 34 ‘măng plang pham ‘mêm kơ-eng, iŏk đei hloh 6.800 tơpu pham, đei hloh 136% tơchơ̆t mă Jơnŭm pơgơ̆r jang kơ teh đak pơjao. Tơdrong jang plang pham ‘mêm kơ-eng dang ei hlôi hơtŏk jâ̆p truh rim apŭng, pơlei tơm păng rim anih jang kơ dêh char Kon Tum pơjing hê̆ um ai oei xa ‘lơ̆ng tơnăp. Jơnŭm pơgơ̆r plang pham ‘mêm kơ-eng dêh char Kon Tum tơlĕch tơchơ̆t lơ̆m xơnăm 2023 hơvơn đei 1.500 ‘nu chih măt plang pham ‘mêm kơ-eng păng iŏk đei 7.200 tơpu pham kiơ̆ pơkăp, axong măh ăn tơdrong yua pham tơ̆ Hnam pơgang tơm dêh char vă dŏng hơmet jĭ jăn ăn bơngai jĭ.

Pơgê năr 7/4, tơ̆ pơlei tơm Buôn Ma Thuột, Hơnih bơ̆ jang chĕp pơgơ̆r plang ăn pham dêh char Đak Lăk pơgơ̆r tơdrong jang “Năr pơđĭ kon pơlei plang ăn pham”sơnăm 2023 hăm hơnăn “Plang ăn pham ‘lơ̆ng-pôk ăn tơdrong erih”. Tơdrong pơgơ̆r au hơvơn đei 600 ‘nu bơngai ‘nŏh kang ƀô̆, khul ƀô̆ đô̆i kŏng ang vang plang ăn pham. Kiơ̆ đơ̆ng au iŏk đei 459 tơpu pham.

Yă Ayun H’Hương, Kơdră chĕp pơgơ̆r Khul chư pơglang ƀrê Đak Lăk tơbăt, dôm sơnăm kơ au, hơnih bơ̆ jang, hnam kmăi, kŏng ty, hnam trương pơgơ̆r plang ăn pham roi năr roi lơ ‘moi kiơ̆ ‘măng pơgơ̆r Pơm lêh Puih mak ƀrĕo, Năr tơpơ̆h ƀrê… Dôm năr lêh plang ăn pham hlôi pơjing rơvơn ăn lơ bơngai đei tơgop pơjing đei tơdrong erih ăn bơngai ji tŏk bŏk ‘mĕh vă đei pham. Tơdrong pơgơ̆r tơbăt 23 sơnăm năr pơđĭ kon pơlei plang ăn pham ‘nŏh jing jơ ‘năr vă pơrô̆ pơtho tơbăt atŏk jơhngơ̆m đon iung jang tơnăp hloh dơ̆ng hăm tơdrong ‘mêm kơ eng dih băl kơ plang ăn pham dŏng erih bơngai, lang să jơ̆p jang tơring tơrrang tơdrong jang plang ăn pham lơ̆m kon pơlei pơla.