VOV4.Bahnar - Khei ‘năr tơjrê̆ au, mĭnh năr dêh char Dak lăk đei hlŏh 2.000 ‘nu bơngai tơpŏh jĭ Covid-19 tơ̆ pơ đĭ 15 apŭng, thĭ xah, pơlei tơm. Hơdrô̆ pơlei tơm Buôn Ma Thuột ‘nŏh măt bơngai F0 lơ hlŏh lơ̆m dêh char, mĭnh năr đei hlŏh 1.000 ‘nu bơngai jĭ Covid-19 lơ̆m kon pơlei. Găh lơ bơngai tơpŏh jĭ sơnăm đơ̆ng 18 trŭh 45 sơnăm, măt bơngai hơ ioh đơ̆ng tim mă trŭh 1 sơnăm trŭh 11 sơnăm tơpŏh jĭ tơmơ̆t vă jê̆ 19%.

Bơngai jĭ Covid-19 tŏk bŏk ming hơmet tơ̆ Hnam pơgang apŭng Krông Ƀuk

Tơ̆ hơnăp jĭ hơbuh Covid-19 pơrăm kơtang, mư̆h măt bơngai tơpoh hơnơ̆ng tŏk lơ dôm năr au ki, dêh char Dak Lăk hlôi pơrô̆ athei Hnam pơgang rim apŭng pơjing dơ̆ng hơnĭh ming hơmet ăn bơngai jĭ Covid -19, pơjing hơnĭh ming hơmet hơ iŏh jĭ ăl Covid -19 tơ̆ Hnam rĕng E kơ Hnam pơgang tơm tơring Tây Nguyên. Hơdrô̆ pơlei tơm Buôn Ma Thuột hlôi atŏk kơtang khŭl bơ̆ jang ăn rim hnam pơgang tơring vă tơgŭm vei lăng năng tông, ming hơmet jĭ F0 tơ̆ hnam.

Tơblơ̆ nơ̆r: Amazưt