Đơ̆ng rŏng đei ƀô̆h 2 hơnĭh đei jĭ toi (H5N1) tơ̆ ƀar ŭnh hnam rong kon kơlap lơ̆m tơring Ea Kly, apŭng Krông Pách,  Hơnĭh tơm Dăr lăng Jĭ jăn dêh char Đắk Lắk iung jang hơdoi hăm hơnĭh jang pơgang vei lăng kon tơrong păng kơdră chĕp pơgơ̆r tơring tơlĕch jang tang găn vă tang găn kĕ jĭ toi H5N1 tơpŏh lang să lơ̆m kon kơlap păng hơmơt tơpŏh tơ̆ kon bơngai.

Kiơ̆ kơ ‘nŏh, Hơnĭh tơm Dăr lăng Jĭ jăn (CDC) dêh char Đắk Lắk hlôi iung jang dăr lăng, hơmet pơ ‘lơ̆ng, hơlen hơdăh jĭ iĕr toi tơ̆ kon bơngai lơ̆m tơring Ea Kly, apŭng Krông Pách; Iung jang hơdoi hăm Dơnŏ anĭh jang pơgang vei lăng kon kơlap pơrô̆ pơtho tơbăt kon bơngei băt hơdăh tơdrong kon kơlap lôch ư̆h kơtom băt păng athei kon pơlei ư̆h kơ gơ̆h chă chơ chuĕn, ƀŭh kăt, tĕch mơdro, pai sa iĕr chă răt đơ̆ng nai ư̆h kơbăt hơnih rong, mă kăl kon kơlap lôch. Hơnĭh tơm Dăr lăng Jĭ jăn jei hlôi khăm lăng hơlen păng pơtho tơbăt kon pơlei ư̆h kơ gơ̆h chă yak tơ̆ nai, hơlen kơdĭh jơhngơ̆m jăn lơ̆m 21 năr vă tang găn hơlau tơdrong tơpŏh jĭ đơ̆ng kon kơlap năm tơ̆ bơngai. Hrei au, đĭ đăng pham khăm lăng hơlen jei ư̆h kơ ƀô̆h sơmach jĭ toi H5N1.