VOV4.Bahnar - Năr 24/8, Dơnŏ anih vei lăng kon pơlei dêh char Dak Nông pơgơ̆r pơm Lêh “Tơlĕch jang ƀet vaccine tang găn Covid-19” sơnăm 2022.

Kiơ̆ kơtơ̆ng ang tơ̆ pơm lêh tơlĕch jang, trŭh dang ei hlôi đei hlŏh 87% măt bơngai đơ̆ng 18 sơnăm oei tơ̆ dêh char Dak Nông đei ƀet 3 jrŭm vaccine tang găn Covid-19, păng ‘nau jing dêh char jang ‘lơ̆ng ƀet vaccine Covid-19 dơ̆ng mă 6 lơ̆m tĕh đak. Mă lei, tơdrong ƀet vaccine  covid 19 tơ̆ lơ tơring kơ Dak Nông tŏk bŏk đei ƀô̆h pă gan kơtang, mă kăl ƀet jrŭm mă 2 ăn hơ iŏh đơ̆ng 5 sơnăm trŭh tim tôm 12 sơnăm, jrŭm mă 3 ăn hơ iŏh đơ̆ng 12 sơnăm trŭh tim tôm 18 sơnăm. Lơ̆m năr pơm Lêh tơlĕch jang, Dơnŏ anĭh vei lăng kon pơlei dêh char Dak Nông athei rim hơnĭh bơ̆ jang lơ̆m dêh char atŏk kơtang hơnăp jang, akŏm khŭl jang vă iung jang kơtang ƀet bơ̆ng tôm jrŭm pơgang ăn hơ iŏh đơ̆ng 5 sơnăm trŭh tim tôm 12 sơnăm, jang keh đang lơ̆m khei 8 au; hơdrin jang keh đang hrôih ƀet jrŭm mă 4 ăn kon pơlei đơ̆ng 18 sơnăm năm tơ̆ ‘lŏ kră păng atŏk kơtang ƀet jrŭm mă 3 ăn đe hơ iŏh đơ̆ng 12 sơnăm trŭh tim tôm 18 kiơ̆ nơ̆r pơtho tơbăt đơ̆ng Dơnŏ anĭh tơm vei lăng jang pơgang păng sơđơ̆ng ‘lơ̆ng ƀet bơ̆ng.

Tơblơ̆ nơ̆r: Amazưt