VOV4.Bahnar - 7. Jĭ dêh char yak hơ drol tơ ring Tây Nguyên găh kơ sô̆ ƀet vắc xin bơ̆ng jĭ covid-19, dêh char Dak Nông hlôi jang đang tơ drong ƀet jrŭm 2 ăn sơ năm đơ̆ng 12 truh 17 sơ năm, păng dang ei tŏk bŏk tơ tĕnh ƀet tôm jrŭm mă 3 ăn bơ ngai kơ pal kơ 18 sơ năm. Kơ sô̆ ƀet bơ̆ng lơ hlôi tơ gop tơ gŭm kơ sô̆ lôch yua đơ̆ng covid-19 tơ̆ Dak Nông găh grŭp tŏ sĕt hloh lơ̆m teh đak.

Kơ sô̆ bơ ngai lôch yua đơ̆ng covid-19 tơ̆ Dak Nông găh grŭp tŏ sĕt hloh lơ̆m teh đak

Truh dang ei lơ̆m dêh char hlôi ƀet đang jrŭm 2 vắc xin bơ̆ng covid-19 ăn bơ ngai đơ̆ng 18 sơ năm tơ̆ kơ pal, păng ƀet jrŭm 2 ăn hơ ioh đơ̆ng 12-17 sơ năm đei hloh 96%. Giĕng hơ drol, dêh char hlôi iŏk 110 rơ bâu kơ liêu vắc-xin rim kơ loăi vă hơ nơ̆ng ƀet jrŭm mă 3 ăn kon pơ lei. Jô̆ truh ‘năr 13/1, dêh char Dak Nông hlôi đei 6553 ‘nu jĭ covid-19, lơ̆m noh vă đĭ đăng hlôi hơ met klăih; lăp đei 15 ‘nu lôch.

Thuem: Tơ blơ̆