VOV4.Bahnar - Tơ̆ ‘măng trong Tây Nguyên tơ ƀưh hăm dôm dêh char găh Pơ băh - hơ nih jĭ hơ buh covid-19 pơ răm sơ năm 2021, mă lei dêh char Dak Nông hlôi jang kiơ̆ ‘lơ̆ng dôm trong jang tang găn jĭ. Dak Nông jĭ 1 lơ̆m 2 dêh char đei kơ sô̆ bơ ngai jĭ covid-19 tŏ sĕt hloh  Tây Nguyên, kơ sô̆ bơ ngai lôch găh grŭp tŏ sĕt hloh lơ̆m teh đak. Jơ nei ‘noh gơ nang đơ̆ng tơ drong 1 jơ hngơ̆m đon kơ tang đơ̆ng kon pơ lei păng pơ đĭ hloi khŭl jang chĭnh trĭ, lơ̆m noh athei tơ roi truh đe kang ƀô̆ jang pơ gang hơ nih tang găn jĭ. Đe sư hlôi gơ̆t lê̆ dôm tơ drong jang hơ drô̆ vă đĭ jơ hngơ̆m tơ gop tang găn đei yua jĭ hơ buh tơ̆ Dak nông, mĭnh dêh char oei lơ mơ mat tat tơ̆ Tây Nguyên.

Nŏng đơ̆ng khei 7/2021, ƀơ̆t jĭ covid-19 đei ƀôh jĭ tơ̆ dêh char Dak Nông truh dang ei, Dược sỹ Bùi Thị Tuyết kŭm hăm đe kang ƀô̆ iŏk đak muh đak hai tơ pôl - Anih vei lăng tơ drong jĭ jăn dêh char Dak Nông, nhen lĕ tam đei 1 năr pơ dơh pơ dơi. Mŏ tơ roi, ƀơ̆t lăp ưh kơ ê tŏk bŏk măng điên thoăi krao ‘noh năm hloi. Păng  tôch kơ lơ ‘măng đe mŏ athei bơ̆ jang iŏk đak muh đak hai prăt măng vă tơ tom pơ yua ăn tơ drong tơ chă, gơ var tơ ring tang găn jĭ. Prăt năr bơ̆ jang hrŭk hơ băn ao vei lăng klĕp gueo, 1,2 ‘nu bơ ngai jang hơ dai mŏ hlôi blơ̆ kơ hơ yuh tŏ. Dược sỹ Bùi Thị Tuyết tơ roi:

Ƀơ̆t lăp kŭm ưh kơ hiôk lơ̆m jơ hngơ̆m yua kơ ĭnh kŭm đei kon ‘lơ̆p, đei ŭnh hnam lei lăi nhen rim bơ ngai. Mă lei yua kơ tơ drong jang tơm atŭm, yua đơ̆ng jĭ hơ buh sư krê hơ mơt dêh, ĭnh kŭm nhen đĭ đăng dôm bơ ngai jang lơ̆m khŭl adoi ling lang hơ drin vă gơh tơ gop vang tang găn jĭ. Kŭm ‘meh rim bơ ngai đei têt sơ đơ̆ng hiôk păng ngôi hơ dai hăm ŭnh hnam, rim bơ ngai athei pơm kiơ̆ ‘lơ̆ng 5K, păng ling lang hơ tŏk ‘lơ̆ng jơ hngơ̆m đon kơ chăng, ‘nĕ kơ pơm pơ hơi.

Mŏ Bùi Thị Tuyết tŏk bŏk iŏk đak muh

Tơ̆ khoa hơ len lăng - Anih vei lăng tơ drong jĭ jăn dêh char Dak Nông, prăt dôm khei âu ki, 19 ‘nu kang ƀô̆ bơ ngai jang kŭm hlôi athei hiơt lê̆ ‘mơ̆i kơ ŭnh hnam vă đĭ jơ hngơ̆m pơ yua ăn tơ drong jang. Thạc sỹ Nguyễn Phước Phúc, Kơ dră khoa hơ len lăng, tơ roi:

Pơm liơ vei sơ đơ̆ng ‘lơ̆ng tơ drong jang hơ len lăng đơ̆ng  2000 truh 3000 mâu, hơ tŏ hăm dang đơ̆ng 7000 truh 10 rơ bâu ‘nu đei iŏk mâu hơ len lăng rim năr, ‘noh lơ ‘nhŏng oh, mŏ oh lơ̆m khoa, hơ nih jang, vă đĭ đăng ‘noh athei hŭt lê̆ tơ drong jang ŭnh hnam vă jang tơ̆ anih jang prăt năr prăt măng. Păng đei dôm gơ măng ‘noh nhôn jang prăt măng vă pơm lăp đei tơ drong jang tang găn jĭ tơ̆ tơ ring, mă loi ‘noh lơ̆m dôm ‘măng đei ƀôh hăm kơ sô̆ bơ ngai jĭ lơ tơ̆ Gia Nghĩa, Krông Nô, Đăk Mil, Cư Jút khei ‘năr âu ki.

Tơ drong gleh lap đơ̆ng đe kang ƀô̆ jang pơ gang đơ̆ng rŏng 1 măng tơ chă hơ len lăng

‘Nao brŏk đơ̆ng rŏng 2 khei tang găn jĭ tơ̆ Hnam pơ gang Chợ Rẫy – pơ lei tơm Hồ Chí Minh, Bác sỹ mơ lôh Lê Văn Thương ‘noh hơ nơ̆ng năm jang tơ gŭm dơ̆ng mơ̆t bơ̆ jang đunh năr lơ̆m hơ nih hơ met jĭ covid-19 ăl - Hnam pơ gang đa khoa dêh char Dak Nông. Ưh kơ ‘meh tơ roi lơ găh kơ dih kâu, sư tơ roi tŏk bŏk pơ tho ki thuơ̆t hlŏng pham hơ nơ̆ng ăn kơ đe buăl jang hơ dai hăm ‘meh vă tơ gar iŏk dơ̆ng tơ drong arih ăn mă lơ bơ ngai jĭ klăih đơ̆ng jĭ covid-19:

Hơ drin đĭ jơ hngơ̆m ĭnh, hŭt lê̆ ‘mơ̆i dôm tơ drong tơ chĕng hơ drô̆ vă bơ̆ jang tang găn jĭ, kơ na jơ hngơ̆m đon tŏk ‘lơ̆ng dêh. Đơ̆ng rŏng kơ năm tơ̆ hnam pơ gang Chợ Rẫy brŏk ‘noh ĭnh vei răk đei 1 tơ drong ‘noh jĭ bơ ngai jĭ covid-19 ăl tơ dăh đei tơ lĕch jang hlŏng pham hơ nơ̆ng păng pơm kiơ̆ hrôih ‘noh tơ drong dŏng đei lơ hloh păng gô tơ jur kơ sô̆ bơ ngai lôch. Tơ drong tôch kơ chhôk hơ iă ‘noh jĭ đe ‘nhŏng oh đơ̆ng dôm khoa nai mă đơ̆ng ưh kơ sĭ joăt jang mă lei đe sư oei hŏk pơ hrăm păng đơ̆ng rŏng 1 khei ‘năr ‘noh đe sư jang tôch kơ ‘lơ̆ng kơ na kŭm tơ jur ƀiơ̆ pŭ trăp ăn kơ nhôn.

Hơ met bơ ngai jĭ covid-19 ăl tơ̆ Hnam pơ gang đa khoa dêh char Dak Nông

Tơ̆ ‘măng trong găh pơ băh Tây Nguyên, lơ̆m hloh 1 sơ năm âu ki, dêh char dak Nông ling lang hơ mơt đei ƀôh jĭ covid-19. Mă lei, yak mơ̆t sơ năm 2022, đơ̆ng rŏng Kon Tum, Dak Nông jĭ dêh char đei kơ sô̆ bơ ngai jĭ covid-19 tŏ sĕt mă 2 tơ ring Tây Nguyên. Lơ̆m noh, kơ sô̆ bơ ngai lôch tơ̆ dêh char dang 0,25%, găh grŭp tŏ sĕt hloh lơ̆m teh đak. Hơ len lăng găh tơ drong jang tang găn jĭ covid-19 tơ̆ tơ ring, ƀok Ngô Thanh Danh, Bí thư anih jang Đảng dêh char Dak Nông, akhan, dêh char kơ chăng vei lăng đei tơ drong ‘noh jĭ gơ nang đơ̆ng tơ drong tơ goăt 1 jơ hngơ̆m đon vang tơ gŭm đơ̆ng kon pơ lei hăm tơ drong pơ gơ̆r, mơ̆t jang kơ tang đơ̆ng pơ đĭ khŭl jang chĭnh trĭ, mă loi ‘noh jĭ dôm tơ drong tơ gop đơ̆ng dôm khŭl bơ ngai jang tơ̆ hơ nih tang găn jĭ:

Nhôn hlôi băt hơ dăh hloi iŏk đơ̆ng blŭng jĭ 1 dêh char dơ nuh hin, mơ mat tat lơ tơ drong, jô̆ hloi bơ ngai jang, tơ mam, jô̆ hloi lơ̆m anih jang pơ gang ưh kơ măh tôch kơ lơ, kơ na athei kơ chăng hăm rim trong rim hơ nih ‘noh gơ var tơ ring tang găn jĭ roi hrĕnh roi ‘lơ̆ng, oei mưh sư đei ƀôh nhen rim dêh char nai ‘noh bơ̆n ưh kơ đei tôm jơ hngơ̆m jang. Dôm tơ drong gleh hrat mơ mat tat, bơ ngai jĭ hlôi mơ mat bơ̆ih mă bơ ngai năm tang găn jĭ oei mơ mat hloh dơ̆ng, hŭt lê̆ ‘mơ̆i dôm tơ drong hơ drô̆ kơ dih vă bơ ngơ̆t ăn tơ drong atŭm, ‘noh jĭ 1 tơ drong jang tôch kơ ‘lơ̆ng hơ iă.

Têt truh pơ yan puih mak vih, ƀơ̆t mă rim bơ ngai chơt hơ iă sơ năm ‘nao, kŭm hăm rim khŭl jang tơ̆ hơ nih tang găn jĭ, đe kang ƀô̆  jang pơ gang oei pơ ‘lơ̆ng hrŭk hơ băn ao vei lăng hơ ngrih hơ ngrăh, hŭt lê̆ dôm tơ drong kơ dih, hơ drin iŏk đak muh, tơ chă, hơ met bơ ngai jĭ..., tơ gop vei ăn kon pơ lei sa Têt sơ đơ̆ng hiôk tơ̆ hơ năp jĭ hơ buh covid-19 ./.

Minh Huệ: Chih

Thuem: Tơ blơ̆