Bơngai lôch yoa đơ̆ng kŏ vơnh kăp ‘nao hlŏh jĭ yă Đ.T.C (rơnĕh sơnăm 1956, tơ̆ plei Đà Bắc, xăh Ia Lâu, apŭng Chư Prông). Kiơ̆ kơ ‘nŏh, lơ̆m khei 10/2022, yă C. đei kŏ hnam sư rong kăp ƀât jơ̆ng. Đơ̆ng rŏng kơ ‘nŏh kŏ âu đei hnam sư tĕh pơlôch. Yă C. ôp hơmet rơka jĭ đơ̆ng kŏ kăp hăm đak, ưh đei năm tơ̆ hnam pơgang ƀet pơgang tang găn jĭ vơnh kiơ.

Đơ̆ng blŭng sơnăm 2023 truh dang ei, tơ̆ Gia Lai đei 5 ‘nu bơngai lôch yoa đơ̆ng kŏ vơnh kăp. Kiơ̆ kơsô̆ chih jô̆, đơ̆ng 2015 - 2022, dêh char Gia Lai đei 33 ‘nu bơngai lôch yoa đơ̆ng kŏ kăp. Kiơ̆ Anih tang găn tơdrong jĭ jăn kơ dêh char Gia Lai, jĭ kŏ vơnh oei đei hơnơ̆ng lơ̆m dêh char yoa tơdrong arih xa oei pơmat tat, kon pơlei tam mă đei đon kơchăng ƀet pơgang bơ̆ng jĭ đơ̆ng rŏng kơ kŏ meo kăp, kach. Tơdrong juăt rong kŏ meo hơchăng kư̆ kă kŭm pơm ăn tơdrong tang găn jĭ tôch mơmat tat ‘năi.