VOV4.Bahnar - Dang ei jĭ pơ lŏ lĕch đe tơ̆ Gia Lai oei tơ pŏh tơ̆ đĭ đăng apŭng, thĭ xăh, plt hăm 112 anih đei jĭ, 306 ‘nu bơ ngai jĭ, tŏk vă jê̆ 60% pơ têng hăm khei âu sơ năm sơ̆, lơ̆m nŏh đei 1 ‘nu bơ ngai lôch. Hnam pơ gang hơ met jĭ ăn Hơ iŏh Gia Lai ăn tơ băt, đơ̆ng blŭng khei 5 truh dang ei, hnam pơ gang iŏk hơ met ăn 46 ‘nu bơ ngai jĭ pơ lŏ lĕch đe.

Ƀak si tơ̆ Hnam pơ gang hơ met jĭ ăn Hơ iŏh Gia Lai oei khăm hơ len jơ hngâm pran ăn hơ iŏh

Kiơ̆ anih jang pơ gang, bơ ngai tơ pŏh jĭ tŏk lơ đơ̆ng khei 5 truh dang ei. Kơ plăh dang ei oei tŏk bŏk lơ̆m pơ yan ‘mi, tŏ ‘mi đei pơ lơ̆h băl ‘nŏh jĭ tơ drong ‘lơ̆ng ăn hơ ngĕnh Dengue chek lar. Kiơ̆ sơ năm rŏ năng sơ năm 2022 jĭ pơ lŏ lĕch đe tơ̆ dêh char Gia Lai gô đei tôch dêh. Anih vei lăng jang pơ gang dêh char Gia Lai tơ tă ăn kon pơ lei adrin pơm kiơ̆ nơ̆r pơ tho đơ̆ng anih jang pơ gang, mă loi ‘nŏh jang ‘lơ̆ng tơ drong vei rơ gŏh cham char, đei thoi nŏh gơ̆h hơ mŏ tang găn đei tơ drong jĭ pơ lŏ lĕch đe tơ̆ tơ ring ‘lơ̆ng ƀiơ̆.

Dơ̆ng: Tơ blơ̆