Lơ̆m sơnăm 2021 păng 2022, 23 anih jang pơgang kơ tĕh đak đei pơ truh 758 hơnăn pơgang, đei kơjă hlŏh 646 ti hlak jên, mă lei ‘nao bơ̆ jang đei 66%. Dang ei 1,2 anih khăm hơmet jĭ tơ̆ dêh char oei ưh kơmăh 1,2 kơloăi pơgang. Tơdrong vei lăng kơdih jên jang tơ̆ dôm anih jang pơgang tĕh đak tơ̆ Gia Lai kŭm tơƀâp lơ tơdrong nol ‘năi. Tơdrong thu ưh kơ tôm jên tơlĕch jang, pơm ăn lơ anih jing hre jên khei, ƀơm ưh ‘lơ̆ng truh tơdrong khăm hơmet jĭ. 

Pơgơ̆r hop akŏm yă Nguyễn Thị Thanh Lịch- Phŏ Kơdră vei lăng kon pơlei dêh char Gia Lai athei Anih vei lăng jang pơgang dêh char jang hơdoi hăm Anih ƀao hiêm tơpôl păng Anih vei lăng jên hu dêh char, tơlĕch, roi tơƀôh trong pơ truh dơ̆ng tơmam, tŏk iŏk jên hơdrol vă kla jên khei ăn kăn ƀô̆, bơngai jang pơgang păng pơ truh tôm tơmam ăn dôm hnam pơgang; hơdai hăm ‘nŏh athei kơdră chĕp kơ̆l dôm anih jang pơgang hơtŏk tơdrong vei lăng kiơ̆ trong đei yoa, jang tơnăp.