VOV4.Bahnar - Phường Cheo Reo, Thị xã Ayun Pa hlôi jing hơ nih đei jĭ hơ buh hrôih hloh păng krê hơ mơt hloh tơ̆ dêh char Gia Lai. Vă bơ̆ jang tang găn jĭ, đe kang ƀô̆ jang pơ gang tơ ring mă lơ ‘noh drŏ kăn, hlôi pơ dơ̆h lê̆ pơ đĭ tơ drong jang ŭnh hnam, hơ drin bơ̆ jang ưh kơ jê̆ măng năr păng klĕch têt nguyên đán âu, jang hơ dai ‘lơ̆ng hăm rim khŭl jang jang tang găn jĭ hơ buh. Đei yua ‘noh phường Cheo Reo hlôi iŏk dơ̆ng đei tơ drong sơ đơ̆ng păng jơ hngơ̆m pran lơ̆m vă jê̆ 1 sơ năm đunh. Mơ̆t lơ̆m pơ yan puih mak Nhâm Dần 2022, Cheo Reo oei hơ nơ̆ng vei rơ goh jĭ gơ nang lơ̆m đe kang ƀô̆ drŏ kăn jang pơ gang ƀĕnh jơ hngơ̆m đon ‘lơ̆ng thaya pơ gang.

Mĭnh puăt hơ tuch kơ khei 12, jê̆ Tết Nguyên đán Nhâm Dần 2022, điều dưỡng Nay H’Ning (48 sơ năm, hnam pơ gang phường Cheo Reo, Thị xã Ayun Pa, dêh char Gia Lai) hrăt hrot hloh kơ năr hmă. Yua kơ khei ‘năr âu, bơ ngai jang păng sinh viên tơ̆ dôm dêh char, pơ lei tơm vih tơ̆ pơ lei sa têt tă kơ truh tơ̆ âu vă tơ roi tơ băt y tê̆. Đơ̆ng rŏng kơ lăng hơ len la kak pơ rang jĭ, mŏ H’Ning pơ tho kon pơ lei chă răp hơ len lăng kơ dih jơ hngơ̆m pran, dăh mă pơm kiơ̆ hơ len lăng hrĕnh vă kơ băt păng pơ tho ăn oei hơ drô̆ mưh kăl. Hrăt hrot thoi noh, mă lei hăm mŏ H’Ning, jĭ đei vei lăng ‘lơ̆ng nhen hrei ‘nâu, hlôi jing 1 tơ drong hiôk ‘nă hăm kơ dih kâu păng ŭnh hnam. Ƀlŏk dơ̆ng đunh kơ âu vă jê̆ ƀlep 1 sơ năm, kŭm lơ̆m năr vă jê̆ Tết Nguyên đán, phường Cheo Reo jĭ hơ nih mă blŭng kơ dêh char Gia Lai đei bơ ngai jĭ COVID-19, lơ̆m 2,3 năr, jĭ đơ̆ng âu tơ poh ƀơm tơ̆ lơ tơ ring. Ƀơ̆t doh, mŏ păng đe bôl joăt jang hơ dai hlôi athei bơ̆ jang măng năr hăm jĭ lơ̆m prăt lơ khei hloi ưh kơ gơh vih hăm ŭnh hnam. ‘Nâu kŭm jing khei ‘năr ƀlŏk hloh lơ̆m 25 sơ năm bơ̆ jang đơ̆ng mŏ H’Ning:

“Vang bơ̆ jang tang găn jĭ ‘noh kơ dih kâu tôch kơ ƀlŏk kơ ŭnh hnam, mă kăl ‘noh ƀlep jơ năr sơ năm ‘nao Têt truh bu bu kŭm ‘meh vih hăm ŭnh hnam. Mă lei yua kơ tơ drong jang nhôn chu oei kơ tă tơ̆ hnam pơ gang vă tang găn jĭ COVID-19. Ƀlŏk hloh ‘noh jĭ đei dôm năr tơ chă truh 2, 3 pơ gê năr đơ̆ng rŏng ‘mơ̆i mă đang, jang gleh lap. Kơ dih kâu ĭnh kŭm đĭ kră bơ̆ih, mă lei đei đe mŏ oh pơ lung kơ na dôm tơ drong sơ ‘ngon tơ tĕnh yak hloh.”

Kŭm hăm điều dưỡng H’Ning, hnam pơ gang phường Cheo Reo, Thị xã Ayun Pa oei đei 3 ‘nu drŏ kăn ƀak si, y tá nai vang bơ̆ jang tơ drong jang tang găn jĭ. Ƀak si H’Bem- Kơ dră vei lăng hnam pơ gang tơ băt, bơ ngai jĭ mă blŭng tơ̆ phường Cheo Reo đei chă ƀôh lơ̆m gơ măng ‘năr 29/1. Lơ̆m kơ măng âu hloi, pơ đĭ hnam pơ gang hơ met ăn hơ băn ao, tơ mam, oei sa kơ tă tơ̆ anih jang vă akŏm bơ̆ jang. Tơ drong jang tơm kơ anih jang ‘noh tơ gŭm kŭm hăm khŭl tơ chă kơ Anih vei lăng tơ drong jĭ jăn, tơ gŭm tơ drong jang hơ len lăng đơ̆ng Anih jang Vệ sinh Dịch tễ Tây Nguyên. ‘Nâu jĭ dôm tơ drong jang ưh kơ đei hơ năn, mă lei tôch kơ kăl. Ƀơ̆t rim ŭnh hnam akŏm hơ dai sơng Têt, mŏ păng đe bôl joăt jang hơ dai oei nŏng kơ bơ̆ jang ưh kơ băt kơ ‘năr gơ măng păng ưh kơ đei năr pơ dơh. Mưh ƀlŏk dêh kơ kon ‘lơ̆p 4 sơ năm, hrŭk hơ băn ao vei lăng hơ rĭl đơ̆ng kơ̆l truh tơ̆ jơ̆ng, mŏ lăp gơh kơ dâu brih hnam, dơ̆ng lăng kon đơ̆ng hơ tăih đĕch. Têt âu, ‘meh vă tih hloh đơ̆ng mŏ H’Bem ‘noh đei sơ đơ̆ng sơng sơ năm ‘nao hơ dai hăm hnam dơ nŏ, mă lei oei ling lang bơ̆ jang tơ drong jang tơ dăh tơ drong tơ plih:

“Dang ei, tơ drong jĭ COVID-19 tơ̆ thị xã Ayun Pa dai sơ đơ̆ng. Khei ‘năr âu, tơ drong dă ƀiơ̆ kơ gleh hrat ƀiơ̆ pơ têng hăm khei ‘nâu sơ năm sơ̆ păng ‘măng đei ƀôh jĭ âu ki. Ĭnh hơ mĕng sơ năm đĭ têt truh, pơ yan puih mak vih, tơ drong jĭ COVID-19 đei sơ đơ̆ng vă ĭnh kŭm hăm đe buăl jang hơ dai păng đĭ đăng kon pơ lei đei jơ vei lăng ăn ŭnh hnam. Mă lei, tơ dăh đei jĭ đei ƀôh ưh kơ ê ‘noh kơ dih kâu ĭnh păng đe buăl jang hơ dai ling lang iung jang vă jang đang tơ drong jang, mă loi ‘noh lơ̆m tơ drong jang vei lăng, hơ tŏk ‘lơ̆ng jơ hngơ̆m pran kon pơ lei đei sơ đơ̆ng ‘lơ̆ng hloh.”

Phường Cheo Reo, Thị xã Ayun Pa đei vă 4500 kon pơ lei, 4 kueng kơ phô̆ păng đei 2 pơ lei bơ ngai Jrai. ‘Nâu kŭm jing ‘măng mơ̆t đơ̆ng Thị xã Ayun Pa, hơ dral kơ 2 apŭng Phú Thiện păng Ia Pa, kơ na hlôi jing hơ nih đei jĭ hrôih, vei lăng mơ mat tat tơ̆ dêh char Gia Lai. Ƀok Phan Văn Trung- Phŏ Kơ dră Anih vei lăng kon pơ lei phường Cheo Reo, Thị xã Ayun Pa, Gia Lai tơ băt, hloh 3 ‘măng đei jĭ, truh dang ei, tơ drong jĭ tơ̆ tơ ring hlôi đei vei lăng. Đei đăi iŏk yua âu, ‘ngoăih tơ drong 1 jơ hngơ̆m đon, kơ chăng kơ dih đơ̆ng kon pơ lei, oei đei kŏng jang tih đơ̆ng khŭl jang pơ gang tơ̆ anih tang găn jĭ, lơ̆m noh đei đe ƀak si, kang ƀô̆ tơ̆ Hnam pơ gang phường Cheo Reo:

“Đei đăi iŏk yua âu, ‘noh hơ năp jang đơ̆ng đe y ƀak si Hnam pơ gang phường Cheo Reo ‘noh tôch kơ tih. Mă đơ̆ng đe ƀak si tă kơ drŏ kăn ngăl, mă lei ƀơ̆t đei ƀôh dôm bơ ngai F0, ‘noh đe sư tă vang jang ưh kơ jô̆ kơ măng kơ ‘năr, vang jang hơ dai hăm rim khŭl linh. Tơ drong jĭ tơ̆ phường truh dang ei sơ đơ̆ng, ưh kơ đei bơ ngai hơ yơ ăn oei hơ drô̆ tơ̆ hnam. Mă lei nhôn oei ưh kơ pơm pơ hơi, tơ drong jang tơ roi tơ băt oei tơ lĕch jang hơ nơ̆ng vă kon pơ lei jang kiơ̆ ‘lơ̆ng 5K”.

Pơ yan puih mak ‘nao đĭ truh hăm rim hnam. Thị xã Ayun Pa, Gia Lai đei hơ met ăn hla kơ ƀrŭng ƀrăng. Lơ̆m tơ drong chơt hơ iă sơng têt, đe drŏ kăn jang tơ̆ Hnam pơ gang phường Cheo Reo oei tŏk bŏk hơ drin bơ̆ jang, yua kơ tơ drong sơ đơ̆ng kơ kon pơ lei.

Nguyễn Thảo: Chih

Thuem: Tơ blơ̆