Kiơ̆ tơroi tơbăt tơ̆ hop akŏm, lơ̆m sơnăm 2022 ( jô̆ truh ‘năr 30/10), lơ̆m dêh char Gia Lai hlôi pơgơ̆r tơlĕch jang đei 84 ‘măng plang song pham tơgŭm, pơtôch sơng iŏk đei hloh 18 rơbâu tơpu pham, iŏk đei 120% tơdrong hơgăt đei pơ jao. Lơ̆m noh, Hnam pơgang Đa khoa dêh char Gia Lai hlôi sơng iŏk hloh 14.600 tơpu pham păng Hnam pơgang Quân y 211 sơng iŏk hloh 3300 tơpu pham. Đei 416 tơpu pham kăl hlôi đei pơ truh tơtom ăn kơ dôm anih jang pơgang vă kâp kư̆u bơngai jĭ.

Lơ̆m sơnăm 2023, Anih pơgơ̆r krao hơvơn plang song pham tơgŭm dêh char Gia Lai hơdrin sơng iŏk hloh 16 rơ bâu tơpu pham. Hơdai hăm ‘noh, hơdrin kơ sô̆ bơngai plang song pham tơgŭm iŏk đei đơ̆ng 95-97%; kơsô̆ bơngai plang song hơlơ̆k dơ̆ng iŏk đei hloh 75% păng kơsô̆ kon pơlei plang song pham vă dang ăi băl iŏk đei 1,1% kơ sô̆ kon pơlei.