VOV4. Bahnar - Dêh char Gia Lai tŏk bŏk tơlĕch lơ trong jang vă atŏk kơtang măt bơngai ƀet vaccine Covid-19 ăn hơ iŏh đơ̆ng 5 sơnăm trŭh tim tôm 12 sơnăm. Vă atŏk lơ măt bơngai ƀet bơ̆ng, dêh char hlôi pơjing lơ hơnĭh ƀet bơ̆ng năm trŭh tơ̆ rim pơlei pơla.

Hơnĭh ƀet bơ̆ng tơ̆ pơlei tơm Pleiku

Ƀok Đinh Hà Nam- Kơ iĕng Kơdră chĕp pơgơ̆r Dơnŏ anĭh vei lăng jang pơgang Gia Lai tơbăt, măt bơngai hơ iŏh đơ̆ng 5 sơnăm trŭh tim tyôm 12 sơnăm tơ̆ dêh char đei tôm rơvơn ƀet vaccine Covid-19 ‘nŏh hlŏh 212.000 ‘nu mon. Jô̆ trŭh pơgê năr 10/8, dêh char Gia Lai hlôi ƀet đei hlŏh 170.700 kơliêu vaccine jrŭm mă 1 păng hlŏh 83.700 kơliêu jrŭm mă 2 ăn đe hơ iŏh au, ƀet jrŭm mă 1 jơnei hlŏh 80,46%, jrŭm mă 2 ‘nŏh 39,46%. Kiơ̆ đơ̆ng ƀok Nam, hăm iŏk đei jơnei au, dêh char Gia Lai dơ̆ng mă 27 lơ̆m tĕh đak găh tơdrong ƀet vaccine Covid-19 ăn khŭl đe hơ iŏk đơ̆ng 5 sơnăm trŭh tim tôm 12 sơnăm. Vă hơnơ̆ng atŏk kơtang ƀet vaccine COVID-19 ăn khul hơ iŏh au, dêh char Gia Lai hlôi păng tŏk bŏk tơlĕch lơ trong jang nhen: Iung jang hơdoi kơ jăp hăm rim hơnĭh bơ̆ jang chĭh kơtơ̆ng ang, pơrô̆ pơrôp mĕ ƀă hŏk tro, dăr lăng, pơrô̆ athei tơlĕch jang ƀet bơ̆ng đơ̆ng tơring.

Tơblơ̆ nơ̆r: Amazưt