VOV4.Bahnar - Lơ̆m hloh 1 khei kơ âu, Hnam pơ gang hơ met hơ ioh jĭ dêh char Gia Lai hlôi sơng iŏk hơ met ăn kơ hloh 800 ‘nu jĭ dôm tơ drong jĭ trong dui jơ hngơ̆m, đei vă jê̆ 1/3 akŏp kơ sô̆ bơ ngai jĭ đơ̆ng blŭng sơ năm truh dang ei. Tơ̆ Khoa Nội tổng hợp-Y học cổ truyền (Hnam pơ gang hơ met hơ ioh jĭ dêh char Gia Lai) đei 163 tŏ giơng bơ ngai jĭ ƀĭch. Mă lei, khei ‘năr âu Khoa hlôi păng tŏk bŏk sơng iŏk hơ met ƀĭch tơ̆ hnam pơ gang ăn kơ hloh 200 ‘nu hơ ioh jĭ kơ na athei ming dơ̆ng giơng ăn bơ ngai jĭ ƀĭch. Lơ̆m kơ sô̆ âu đei vă jê̆ 80%hơ ioh jĭ dôm tơ drong jĭ găh trong dui jơ hngơ̆m nhen: hơ lơ̆k, jĭ muh hơ lŏng, jĭ hơ lŏng, jĭ tơ soh.... vă đĭ đăng hơ ioh đei jĭ hơ la kơ 5 sơ năm.

Ƀak si tơ̆ Hnam pơ gang hơ met hơ ioh jĭ Gia Lai tŏk bŏk khăm ăn hơ ioh iĕ jĭ tơ soh

Ƀak si Từ Thị Mai Linh, Phŏ Kơ dră chĕp kơ̆l Hnam pơ gang hơ met hơ ioh jĭ dêh char Gia Lai tơ băt: Pơ yan ‘nâu tŏ ‘mi ưh kơ sơ đơ̆ng, pơm hiôk ăn dôm kơ loăi yŏng jĭ pơm ăn jĭ. Găh hnam pơ gang ‘noh hlôi hơ met dơ̆ng bơ ngai jang, giơng vă ăn kơ đe mon ƀĭch păng hơ met lăp păng đei yua. Hơ dai hăm hơ met ăn pơ gang, tơ mam ƀơm truh hơ met jĭ trong dui jơ hngơ̆m”.

Thuem: Tơ blơ̆