VOV4.Bahnar - Xăh Hà Bầu, apŭng Đak Đoa adrol ki jĭ tơ ring đei jĭ COVID-19 tôch dêh tơ̆ dêh char Gia Lai. Vă dôm năr ngôi pơ chơt têt gơ̆h chơt hơ iă, tơ drong jang tang găn jĭ đei tưk pran, hăm tơ drong vang jang đơ̆ng rim hnam. Kon pơ lei hlôi tơ plih ming lơ tơ drong juăt lơ̆m tơ drong arih xa, jang xa rim năr; khul kơ dră tơ ring păng anih jang pơ gang hơ tŏk lơ trong jang vei lăng, dăr lăng jĭ, khŏm ưh ăn jĭ tơ pŏh hơ lơ̆k dơ̆ng.

Oei nhen rim sơ năm, unh hnam ƀok Hmyek tơ̆ plei Bông, xăh Hà Bầu, apŭng Đak Đoa, dêh char Gia Lai pai đang tơ drô ge păng tĕh, ot 1 tă phe tơ yông vă pai xa, ƀuh prung ngôi pơ chơt năr sơng pơ yan puih mak ‘nao. Sơ năm ‘nâu, ƀok Hmyek hôp unh hnam đơ̆ng hrôih, tơ tă ăn kon sâu dôm tơ drong kăl vă tang găn jĭ. Kiơ̆ ƀok Hmyek, ‘măng jĭ tơ pŏh lơ̆m 2 khei hơ tuch sơ năm 2021 tơ̆ xăh Hà Bầu đei đơ̆ng tơ drong ngôi akŏm kơ drâm bơ ngai lơ̆m dôm ‘măng pơ dong bơ ngai lôch păng phĕ chĕh phe. Yoa thoi nŏh, ƀok khan kơ kon sâu lăp năm ngôi têt tơ̆ dôm unh hnam ‘nhŏng ŏh kơ dih đĕch. Hăm rông ƀôt, kơ tum kơ tŏng tơ̆ dôm xăh, apŭng hơ tăih, ‘nŏh chă krao điên thoăi pơ ma nuh hăm băl đĕch.

Hăm hơ năp jang jĭ bơ ngai pơm kră pơ lei plei Bông, ƀok Hmyek kŭm pơ ma thoi nŏh mơ̆n hăm dôm unh hnam kon pơ lei lơ̆m dôm ‘măng hŏk hôp pơ lei pơ la: “Lơ̆m khei ‘năr jĭ Covid-19 oei đei nhen hrei ‘nâu, jĭ bơ ngai pơm kră pơ lei inh hơ nơ̆ng tơ tă ăn kon sâu năr Têt ngôi pơ chơt mă lei athei băt trong tang găn jĭ. Lê̆ chă thông hơ tăih, lăp sơng xa têt tơ̆ hnam đĕch. Răt hơ met bơ̆n ƀĕng keo, đak ‘ngam vă ngôi pơ chơt lơ̆m hnam đĕch, yoa jĭ Covid-19 dang ei oei tôch hơ mơt, tơ̆ yơ kŭm đei jĭ. Inh tơ tă ăn mih ma duch nă lơ̆m pơ lei thoi nŏh, lê̆ ngôi kơ drâm bơ ngai, yoa tơ drong jĭ tôch krê hơ mơt, ƀônh tơ pŏh dê̆h, mưh lĕch tơ̆ ‘ngoăih ‘nŏh athei gom muh măt, sut hơ met hnam mă ‘you, athei pơm kiơ̆ trong tang găn jĭ đơ̆ng tĕh đak”.

Kŭm jang lơ̆m khul tang găn jĭ tơ̆ plei Bông hăm ƀok Hmyek mơ̆n, ‘nhŏng Pơt - ƀok pơ gơ̆r pơ lei ăn tơ băt: Adrol kơ têt hlŏh 1 khei, ‘nhŏng kŭm hăm dôm bơ ngai jang lơ̆m Khul vei lăng pơ lei, kră pơ lei, bơ ngai đei đe lui yom păng đe drŏ kăn, druh dăm lơ̆m pơ lei chă roi tơ băt ăn rim unh hnam athei pơm kiơ̆ nơ̆r hơ găt 5K mưh chă năm ngôi têt tơ̆ băl. Tơ drong ‘nâu, sư pha ƀiơ̆ kơ adrol ki, mă lei ‘nâu jĭ tơ drong tôch kăl yoa kiơ̆ ‘nhŏng, sơ năm ‘nao lăp chơt mưh rim bơ ngai sơ đơ̆ng ‘lơ̆ng ngăl đĕch: “Tơ drong ngôi pơ chơt têt ‘nŏh Dơ nŏ anih vei lăng kon pơ lei xăh kŭm roi tơ băt, pơ tho tơ ƀôh vă kon pơ lei ngôi pơ chơt têt chơt hơ iă, sơ đơ̆ng ‘lơ̆ng. Kon pơ lei athei pơm kiơ̆ nơ̆r pơ tho đơ̆ng Anih vei lăng kon pơ lei xăh, pơm kiơ̆ tơ drong hơ găt tang găn jĭ, lĕch tơ̆ ‘ngoăih athei gom muh măt, lê̆ ngôi akŏm lơ bơ ngai, chă thông têt jê̆ đĕch. Truh âu kơnh nhôn vă pơ tho tơ ƀôh hơ nơ̆ng, jang ‘lơ̆ng tơ drong tang găn jĭ. Bơ̆n ngôi pơ chơt têt mă lei athei kơ chăng tang găn jĭ hai”.

Lơ̆m 2 khei hơ tuch sơ năm 2021, xăh Hà Bầu, apŭng Đak Đoa jĭ tơ ring đei jê̆ tôch dêh tơ̆ Gia Lai hăm hlŏh 530 ‘nu bơ ngai jĭ păng rơ bâu ‘nu bơ ngai F1 tơ̆ 7 pơ lei bơ ngai kon kông oei, athei năm hơ met jĭ, oei hơ drô̆. Ƀok Y Hiếu- Phŏ Kơ dră vei lăng kon pơ lei xăh Hà Bầu, apŭng Đak Đoa ăn tơ băt, hrei ‘nâu, jĭ COVID-19 tơ̆ tơ ring đei găn ‘lơ̆ng bơih. Vă vei lăng tơ drong ‘nâu, khul kơ dră pơ gơ̆r tơ ring hơ nơ̆ng đei đon kơ chăng, ưh ăn jĭ tơ pŏh hơ lơ̆k dơ̆ng ƀât Têt nguyên đán Nhâm Dần. Kiơ̆ kơ ‘nŏh, Anih pơ gơ̆r jang tang găn jĭ COVID-19 xăh Hà Bầu oei kâm ưh ăn pơih đĭ ‘măng anih ngôi pơ chơt, et xa lơ̆m pơ lei; athei dôm khul jang tang găn jĭ COVID-19 lơ̆m tơ pôl tơ̆ 8 pơ lei hơ nơ̆ng bơ̆ jang, krao hơ vơn rim unh hnam: hnam yơ xa têt tơ̆ hnam ‘nŏh, mă lei ưh gơ̆h ngôi akŏm lơ hlŏh 10 ‘nu 1 vât.

Ƀok Y Hiếu pơ ma: “Lơ̆m sơ năm ‘nao, vă kon pơ lei xa têt chơt, hiôk sơ đơ̆ng ‘nŏh bơ̆n athei pơm kiơ̆ dôm tơ drong hơ găt tang găn jĭ, blŭng a bơ̆n lê̆ ngôi hơ dai kơ drâm bơ ngai, athei dơ̆ng ngôi hơ tăih băl, mă 2 mưh lĕch tơ̆ ‘ngoăih athei gom muh măt, mă 3 hơ nơ̆ng ôp ti hăm sơ ƀŏng mă ưh ‘nŏh đak pơ gang pơ lôch pơ rang jĭ. Anih vei lăng kon pơ lei xăh roi tơ băt vă kon pơ lei hlôh vao, pơm kiơ̆ vă vei lăng ‘lơ̆ng jơ hngâm pran ăn kơ dih kâu păng unh hnam, pơm thoi yơ vă kon pơ lei gơ̆h đei jơ hngâm jang xa, pơm ăn pơ lei pơ la roi đunh roi pơ drŏng đei ƀôh, ‘lơ̆ng rŏ”.

Hăm jơ hngâm đon kơ chăng, ưh đei lăng pơ hơi tơ̆ hơ năp tơ drong jĭ, khul kơ dră pơ gơ̆r păng kon pơ lei xăh Hà Bầu tŏk bŏk đei dôm năr ngôi pơ chơt sơ năm ‘nao hăm đon tôch kơ chăng hăm tơ drong jĭ COVID-19. Kon pơ lei băt hơ dăh: vei lăng ‘lơ̆ng jơ hngâm pran ‘mơ̆i na pơ yan Puih mak ‘nao gơ̆h chơt tơ pă.

Nguyễn Thảo: Chih

Dơ̆ng: Tơ blơ̆