VOV4.Bahnar - Khei ‘năr âu ki, kơ sô̆ bơ ngai jĭ COVID-19 ‘nai tơ̆ Gia Lai tŏk hrĕnh, đei năr truh 3000 ‘nu bơ ngai jĭ. Mă lei anih jang pơ gang păng dôm tơ ring lơ̆m dêh char oei tơ ƀâp lơ mơ mat tat mưh răt tơ mam, pơ gang vă pơ yoa ăn tơ drong tang găn jĭ.

Kiơ̆ ƀok Nguyễn Đình Tuấn- Phŏ Kơ dră vei lăng Anih vei lăng jang pơ gang dêh char Gia Lai, đơ̆ng sơ năm 2022, Dơ nŏ anih vei lăng kon pơ lei dêh char pơ jao ăn dôm hnam pơ gang tĕh đak pơ jing jang kơ dih chă răt pơ gang, tơ mam pơ yoa ăn tơ drong tang găng jĭ Covid-19, 1,2 anih tĕch ưh đei pơ truh tơ mam tơ tom kiơ̆ hla ar pơ kăp.

Lơ anih jang pơ gang tơ̆ apŭng ưh răt đei test hrĕnh pơ rang jĭ SARS-CoV-2 yoa kơ jă tơ̆ ‘ngoăih măk hlŏh kơ jă Anih tơm vei lăng jang pơ gang pơ klĕm. Păng kiơ̆ ƀok Nguyễn Đình Tuấn, tơ drong găn trong tih hlŏh jĭ đon pơ ngơ̆t, ơm răt tơ mam, tơ drong oei tơ hlăk găh kla jên đơ̆ng Anih pơ gơ̆r jang tang găn tơ̆ tơ ring hăm hnam pơ gang tơ ring.

Dơ̆ng: Tơ blơ̆