VOV4.Bahnar - Hrei au, rim tơring lơ̆m tĕh đak hlôi ăn hŏk tro năm tơ̆ hnam trương hŏk pơhrăm kơtă, pơđĭ dôm hŏk tro hlôi đei ƀet vaccine bơ̆ng jĭ Covid-19 păng dôm hŏk tro tim mă ƀet vaccine. Lơ̆m khei ‘năr jĭ hơbŭh Covid-19 hơnơ̆ng pơrăm kơtang, rim hơnĭh bơ̆ jang hlôi tơlĕch rim trong jang tang găn hơdăh ăn rim tơdrong đei ƀô̆h bơngai tơpŏh F0 lơ̆m hnam trương păng kăl tơlĕch jang hloi trong jang ming hơmet jĭ ăn hŏk tro tơpŏh jĭ Covid-19.

Mă đơ̆ng măt bơngai hơ iŏh tơpŏh jĭ Covid-19, măt bơngai jĭ roi jĭ ăl hlôi dă ƀiơ̆ mă lei oei đei bơngai lôch mư̆h măt bơngai tơpŏh jĭ tôch kơ lơ. Mư̆h đe hŏk tro vĭh hŏk hơlơ̆k dơ̆ng, tơdra hơdrol măt bơngai tơpŏh jĭ Covid-19 tơ̆ đe hơ iŏh rŏ năng tŏk lơ. Kơ yuơ lơ lŏh, rim bơngai joăt jang pơma hơdăh găh trong jang tang găn jĭ păng ư̆h kơ lê̆ đei tôch lơ đe hơ iŏh tơpŏh jĭ hrơ̆p mĭnh ‘măng, kơ yuơ dang ei rim kơ loăi pơgang ming hơmet jĭ Covid-19 tim mă ăn chă ming hơmet ăn tơ̆ đe hơ iŏh. Kơdră chĕp pơgơ̆r Hnam pơgang Nhi Trung ương Trần Minh Điển akhan, tơdrong pơm lơ liơ vă sơđơ̆ng dơ̆ng kơ jăp ăn đe hŏk tro năm tơ̆ hnam trương đei lơ trong, lơ̆m au rim hnam trương, kơdră chĕp pơgơ̆r tơring păng hơnĭh jang pơgang tơring pơjing trong iung jang pơm sơđơ̆ng hlŏh ăn hnam trương hŏk. ‘Ngoăih kơ ‘nŏh, rim mĕ ƀă hŏk tro kăl hơmet ăn ‘lơ̆ng jơhngơ̆m đon ăn kon hơ ‘lơ̆p păng atŭm hăm hnam trương pơtho khan ăn kon hơ ‘lơ̆p pơm kiơ̆ trong jang tang găn jĭ, mă kăl pơm kiơ̆ kơ jăp “5K”. Mư̆h ƀô̆h bơngai tơpŏh jĭ dăh mă hlôi tơpŏh jĭ sơmach SARS-CoV-2 lơ̆m lăm hŏk, hnam trương kăl chơ̆n jơhngơ̆m kơtang, iung jang hơdoi hăm hơnĭh jang pơgang tơring vă tơroi tơbăt ăn ŭnh hnam vă tơchă băt hơdăh tơdrong bơngai hŏk tro au tơpŏh jĭ đơ̆ng yơ: “Bơ̆n kăl tơchă mă hơdăh tơ̆ lăm hŏk ‘nŏh đĕch păng jei lăp mĭnh ƀar kơƀang oei tơjê̆ dĭh băl, tơ̆ mĭnh ƀar hơnĭh mă ŏh ‘nŏh chă ngôi pơchơt pơ hiơ̆ đĕch, bơ̆n jei ư̆h kơ kăl tang ‘măng hloi mĭnh hnam trương hŏk dăh mă tang ‘măng mĭnh lăm hŏk. Tơdrong hnam trương hŏk sơđơ̆ng đei ‘măng ư̆h khan “ư̆h kơ đei covid” mă lei nơ̆r pơma hnam trương hŏk sơđơ̆ng ‘nŏh bơ̆n pơjing đei trong jang hơdăh, bơ̆n kăl dăr lăng tĕnh koăng, vat hơnĭh tơ̆ rim tơring ‘nŏh hloi kơna mă đei sơđơ̆ng ăn hnam trương ‘nŏh sơđơ̆ng ‘lơ̆ng hơ iă”.

        Lơ̆m mă đei hŏk tro ư̆h kơ pŭn ai tơpŏh jĭ Covid-19, ‘nŏh rim mĕ ƀă hŏk tro kăl chơ̆n jơhngơ̆m, ‘nĕ tăr văr păng tơtăm. Mư̆h kon hơ ‘lơ̆p oei tơ̆ hnam, rim mĕ ƀă kăl lăng hơlen tơdrong chă jĭ au to vă tơgŭm ăn păng tơroi tơbăt ăn hnam pơgang tơring vă kon hơ ‘lơ̆p đei ming hơmet ‘lơ̆ng hlŏh. Kơdră chĕp pơgơ̆r Hnam pơgang Nhi Trung ương Trần Minh Điển pơkă:“ ‘Nau jing mĭnh tơdrong jĭ hơbŭh, kơ yuơ lơ lŏh tơdrong ăn oei hơdrô̆ jei tôch gĭt kăl. Tơdăh bơ̆n ư̆h kơ ăn mon ‘nŏh oei hơdrô̆hloi lei tôch hơmơt tơpŏh ăn rim đe hơ iŏh anai dơ̆ng, đơ̆ng nŏh tơpŏh năm tơ̆ mĕ ƀă, yă ƀok, mă kăl rim bơngai mĕ tŏk bŏk hơnăp. Kơ yuơ lơ lŏh, lơ̆m rim tơdrong, rim ŭnh hnam kăl chơ̆n jơhngơ̆m lăng hơlen ‘moi kiơ̆ nơ̆r pơtho tơbăt đơ̆ng hơnĭh jang Pơgang trong ming hơmet kơtă tơ̆ hnam lơ liơ păng tơdrong kơnăl ayơ pơm ăn ƀô̆h hơdăh roi jĭ ăl, ‘nŏh jing jĭ rpoi dêh kăl vă ba năm khăm tơ̆ rim hnam pơgang dăh mă kăl ăn ƀĭch ming hơmet tơ̆ hnam pơgang hloi, vă sơđơ̆ng ‘lơ̆ng hơ iă hlŏh ăn rim đe kôn mon”.

        Tơ̆ hop akŏm ‘nao au găh bơ̆ jang ming hơmet ăn hơ iŏh tơpŏh jĭ Covid-19, Kơ iĕng Thủ tướng Tĕh đak Vũ Dức Đam hlôi pơjao ăn Dơnŏ anĭh tơm vei lăng jang pơgang pơm tơm, iung jang hơdoi hăm Dơnŏ anĭh tơm vei lăng Hnam trương pơtho pơhrăm păng rim hơnĭh bơ̆ jang ƀơm trŭh pơjing trong jang hăm rim tơdrong iung jang mư̆h hŏk tro năm tơ̆ hnam trương hŏk pơhrăm dơ̆ng, đei hơ iŏh tơpŏh Covid-19. Adoi tenh koăng pơm pơkeh, tơlĕch jang kiơ̆ hla bơar pơtho tơbăt găh bơ̆ jang păng trong ming hơmet jĭ Covid-19 hăm dôm bơngai tim mă trŭh 18 sơnăm, mă kăl đe hơ iŏh tim mă trŭh 12 sơnăm.

Bai chĭh đơ̆ng VOV1

Tơblơ̆ nơ̆r: Amazưt