VOV4.Bahnar - Khei ‘năr âu ki, tơ̆ dêh char Dak Lak hơ nơ̆ng đei ƀôh dôm ‘măng glơ̆k kơ đak pơm ăn lơ hơ ioh lôch. Anih jang kơ pal tŏk bŏk hơ drin tơ lĕch lơ trong jang vă tơ jur ƀiơ̆ tơ drong ‘nâu.

       ‘Nao giĕng hơ drol ki, tơ̆ xăh Cư Pơng, apŭng Krông Búk (Dak Lak) đei ƀôh ‘măng glơ̆k kơ đak pơm ăn 3 ‘nu mŏ oh pôm mĕ ƀă lơ̆m 1 ŭnh hnam lôch. Mon ‘lŏ ‘nao 9 sơ năm, mon ‘lơ̆p hloh 5 sơ năm. Mŏ Nguyễn Thị Loan nă đe mon âu, tơ roi:

        “ ‘Năr dơ̆ng mĕ sư năm brŏk ‘noh mon ‘lŏ apĭng mĕ sư năm tơ̆ găh rŏng đei dơ nâu đak ‘lơ̆ng vă pơ ngôi, mĕ sư ưh kơ ăn, tơ hli khan năm tơ̆ dơ nâu đak ‘noh lôch kơ glơ̆k. Sư pơ vih pơ văn hiơt hê̆, dang 1 puăt jơ đơ̆ng rŏng ưh kơ ƀôh đe kon ‘noh mă kơ drăt ƀlŏk năm tơ chă. Ƀơ̆t năm ‘noh ŏh ĭnh ƀlŏk truh dơ nâu đak găh rŏng kon sư apĭnh ƀơ̆t ‘năr dơ̆ng kơ na kơ dâu năm, trŭh hơ nih ‘noh ƀôh tơ khŏ ƀlă kơ ‘noh tơ chă dơ̆ng 2 ‘nu ‘lơ̆p đông tơ̆ kơ pal, mon đơ̆ng rŏng rim bơ ngai dŏng iŏk đei mă lei ưh kơ gơh.”

        Lơ̆m dôm bơ ngai kơ nê̆ hơ kâu đei 2 ‘nu oh ‘noh hŏk tro Hnam trưng hŏk jăl 1 Phạm Hồng Thái, xăh Cư Pơng. Kô Vũ Thị Vân - Kơ dră vchĕp kơ̆l hnam trưng tơ băt, lơ̆m hnam trưng đei hơ nih đak glơi, tơ chĕng hơ drol pơ yan he âu, đơ̆ng rŏng kơ jĭ Covid - 19 dă ƀiơ̆ hnam trưng gô pơ̆ih dơ̆ng dôm lăm pơ tho glơi ăn kơ hŏk tro. Đe mon đei hơ năn lơ̆m hla ar chih măt hŏk glơi, mă lei tam mă tom hŏk ‘noh đei tơ drong truh bơ̆ih.

        “Tơ dăh jĭ hơ buh dă ƀiơ̆ ‘noh hnam trưng gô pơ gơ̆r dôm lăm hŏk glơi ăn kơ đe kon. Găh păh bơ ngai vei lăng khŭl ‘noh ling lang tơ roi tơ băt truh đe kon găh tơ drong tang găn glơ̆k kơ đak, sar bar vă vei lăng sơ đơ̆ng đe kon. Đơ̆ng hơ drol ki truh dang ei hnam trưng tam mă lai yơ đei ƀôh tơ drong ơh hmach thoi noh, sơ ‘ngon dêh ƀơ̆t 1 ‘măng hiong hê̆ 2 ‘nu hŏk tro pơ nam, hơ lăng, hŏk hơ gei păng tôch kơ hơ iă”.

Dơ nâu Ea Dhung Tiêng, xăh Cư Pơng, apŭng Krông Búk hơ nih 3 ‘nu mŏ oh pôm mĕ ƀă lơ̆m 1 ŭnh hnam đei glơ̆k kơ đak lơ̆m giĕng hơ drol

       Chih jô̆ đơ̆ng Anih vei lăng găh bơ ngai jang lĭnh jĭ rơ ka păng tơ pôl dêh char Dak Lak ăn ƀôh, sơ năm 2020 lơ̆m dêh char đei ƀôh 54 ‘măng glơ̆k kơ đak pơm ăn 73 ‘nu hơ ioh lôch; kơ sô̆ âu kơ sơ năm 2021 ‘noh 48 ‘măng hăm 51 ‘nu hơ ioh lôch. Hơ drô̆ dôm năr hơ tuch khei 3/2022 âu ki hlôi đei ƀôh 2 ‘măng glơ̆k kơ đak pơm ăn 5 ‘nu hơ ioh lôch tơ̆ apŭng Ea Súp păng Krông Búk.

       Ƀok Nguyễn Duy Tuyết – Kơ dră vei lăng Anih vei lăng tơ gŭm tơ pôl, kơ Anih vei lăng găh tơ drong jang, lĭnh jĭ rơ ka păng tơ pôl Dak Lak tơ roi, lơ̆m 2,3 sơ năm kơ âu, tơ drong glơ̆k kơ đak tơ̆ hơ ioh tơ̆ Dak Lak mă khan đei tơ jur ră, mă lei oei tôch kơ lơ, mă kăl ‘noh đei ƀôh lơ ‘măng glơ̆k kơ đak tơ pôl. Anih jang kơ pal păng rim tơ ring hơ nơ̆ng tơ tă kơ kon pơ lei vei sơ đơ̆ng ăn hơ ioh, mă loi ‘noh lơ̆m ‘măng pơ dơh he.

        “Anih jang vei lăng găh bơ ngai jang, lĭnh jĭ rơ ka păng tơ pôl ‘noh anih pơ gơ̆r, khŭl kơ dră tơ ring tơ̆ apŭng, xăh ‘noh athei tơ roi tơ băt truh đe mĕ ƀă, dăh mă dôm bơ ngai vei lăng tơ gŭm hơ ioh nai athei hơ nơ̆ng dăr hơ len hơ ioh tơ̆ hnam, ưh kơ lê̆ hơ ioh năm mĭnh drô̆ truh tơ̆ dôm hơ nih đak krong đak glung, dơ nâu đak krê hơ mơt.”

Khŭl anih jang kơ pal, grŭp tơ pôl kơ tơ ring truh pơ lung, vang sơ ‘ngon, păng pơ jao vă jê̆ 130 triệu hlak jên ăn 1 ŭnh hnam đei 3 ‘nu kon đei tơ drong truh tơ̆ xăh Cư Pơng, apŭng Krông Búk, dêh char Dak Lak

        Tơ roi găh tơ drong jang tang găn glơ̆k kơ đak ăn hŏk tro, ƀok Đỗ Tường Hiệp – Phŏ Kơ dră chĕp kơ̆l Anih vei lăng găh pơ tho pơ hrăm Dak Lak tơ roi.

     “Anih vei lăng găh pơ tho pơ hrăm dêh char athei rim hnam trưng kơ chăng pơ tho găh tơ drong băt arih, găh tang găn glơ̆k kơ đak ăn hŏk tro; rơ̆ih ăn đe thây kô pơ tho môn pơ tâp hơ kâu jăn năm pơ hrăm vă vih tơ gŭm pơ tho glơi ăn kơ đe hŏk tro. Pơ jing tơ drong hơ găt tang găn sar bar ơh sơ ‘ngon lơ̆m noh đei glơ̆k kơ đak tơ̆ đĭ đăng dôm hnam trưng, hơ drin truh sơ năm 2030 ‘noh tơ jur 10% ‘măng glơ̆k kơ đak, truh sơ năm 2025 ‘noh 50% hŏk tro lơ̆m dêh char Dak Lak gơh glơi.”

Ƀơ̆t pơ đĭ ŭnh hnam, hnam trưng păng đĭ đăng lơ̆m tơ pôl vang 1 jơ hngơ̆m băt kơ chăng tang găn sar bar ăn hơ ioh lơ̆m noh đei glơ̆k kơ đak, hơ mĕng akhan tơ̆ hơ năp kơnh tơ̆ Dak Lak gô ưh pă dơ̆ng lăng dôm tơ drong ơh sơ ‘ngon yua glơ̆k kơ đak.

 Tuấn Long: Chih

Thuem: Tơ blơ̆