Tơdrong jang đei pơih blŭng hăm nơ̆r ƀai hơri đơ̆ng dôm bơngai nghệ sĩ Hnam joh hơri - Anih radio nơ̆r pơma Việt Nam hơri pôk pơ ư kơ pơlei pơla, teh đak păng dôm tơdrong vang tơgop đơ̆ng bơngai jang hrŭk ao kok tŏk bŏk măng năr vei lăng păng hơtŏk ‘lơ̆ng jơhngơ̆m jăn kon pơlei.

Tang măt kơdră chĕp kơ̆l puăn anih chih kơtơ̆ng ang, ƀok Lê Quốc Minh, Bơngai jang lơ̆m Trung ương Đảng, Tổng Biên tập Hla ar tơroi Kon pơlei, Phŏ kơdră anih tơroi tơbăt Trung ương, Kơdră chĕp kơ̆l Khŭl bơngai chih hla ar tơroi Việt Nam hlôi gơih dôm nơ̆r hmach thơ thâu ‘lơ̆ng hơiă hloh truh đe kơdră chĕp kơ̆l Anih tơm vei lăng jang pơgang, kơdră chĕp kơ̆l dôm anih jang pơgang ƀlep ƀơ̆t 68 sơnăm Năr thây pơ gang Việt Nam, hmach kơ khŭl thây pơgang hơnơ̆ng iŏk đei lơ jơnei, jĭ anih gơnang kơjăp ăn bơngai jĭ păng kon pơlei lơ̆m teh đak.

Ƀlŏk dơ̆ng dôm khei ‘năr tơjră jĭ Covid-19 ƀĕnh mơmat tat păng long nol lơ̆m pêng sơnăm âu ki, ƀok Lê Quốc Minh tơroi rơđăh: Lơ̆m khei ‘năr ‘noh hlôi băt dôm yơ tơdrong ‘lơ̆ng hơiă, tơdrong đĭ jơhngơ̆m, đon ‘mêm mơnat đơ̆ng khŭl kang ƀô̆ păng bơngai jang pơgang ưh kơ ‘nhoen mơmat, ƀơ̆t lăp krê hơmơt truh hơkâu jăn, đe sư oei hŭt hơkâu, iung jang mơ̆t lơ̆m anih jĭ, ngôi tơjê̆ hăm dôm bơngai jĭ, iŏk ưh kơ pŭn ai ăn kơdih, đĭ jơhngơ̆m pơvih pơvăn, vei lăng ăn bơngai jĭ lơ̆m dôm hơnih ăn oei hơdrô̆, dôm hnam pơgang pơm tơ̆ ‘ngoăih... Păng hlôi đei kang ƀô̆ jang pơgang hiong hloi. Kon pơlei lơ̆m teh đak ling lang chih răk păng băt bơnê dôm tơdrong vang tơgop tôch kơ tih tên ‘noh. Đơ̆ng rŏng jĭ hơbuh Covid-19, anih jang pơgang tŏk bŏk tơƀơ̆p lơ mơmat tat, tơhlăk tơhlĭn. ‘Noh jĭ tơdrong ưh kơmăh pơgang, tơmam, kơmăy kơmŏk pơgang; ưh kơ ‘lơ̆ng găh trong jang tơgŭm jên hu ăn anih jang pơgang teh đak; trong jang tơgŭm hăm kang ƀô̆ jang pơgang tam mă lăp tơgăl hơnhăk truh lơ bơngai pơdơh kơ jang: “Hăm hơnăp jang ‘noh jĭ dôm anih jang chih kơtơ̆ng ang tơm,  Hla ar tơroi kon pơlei, Thông tấn xã Việt Nam, Anih pơdăh ti vi Việt Nam, Radiio nơ̆r pơma Việt Nam gô hơnơ̆ng tơgŭm hơdrol tơroi tơbăt găh tơdrong jang vei lăng jơhngơ̆m jăn kon pơlei, găh dôm tơdrong jang đơ̆ng anih jang pơgang, đơ̆ng dôm bơngai thây pơgang.”

Tơdrong jang đei pơtăl hăm pơma đam đei hơnăn “Hơdrin yua kơ jơhngơ̆m jăn kon pơlei - Anih jang pơgang yak hloh mơmat tat”. ‘Noh jĭ tơdrong tơroi đơ̆ng Phŏ Giáo sư, Tiến sĩ, Thây pơgang kon pơlei Nguyễn Viết Nhưng, sơ̆ pơm Kơdră vei lăng Hnam pơgang hơmet jĭ tơsoh Trung ương kŭm hăm bơngai jang hơdai sư iŏk đei Tơmam hơpăh Hồ Chí Minh hăm tơdrong jang “ Tơchĕng hơlen tơmơ̆t yua ki thuơ̆t hơgei - lơ̆m hơlen lăng jĭ, hơmet jĭ trong dui jơhngơ̆m” păng tơchă đei trong năm truh pơtôch tơdrong jĭ hiĕn hiang. ‘Noh jĭ dôm tơdrong hlôh vao pơjing khŭl jang pơgang tơring, tang găn đei yua păng hơtŏk ‘lơ̆ng pơvih pơvăn, yak truh tơdrong lăp đon ăn bơngai jĭ đơ̆ng ƀak si chuyên khoa 1 Trần Phước Đoàn, Phŏ Kơdră chĕp kơ̆l Anih vei lăng tơdrong jĭ jăn - dêh char Tây Ninh, ƀak si chuyên khoa 1 Phạm Thị Hồng Lam, Phŏ Kơdră vei lăng Hnam pơgang apŭng Nghi Xuân, dêh char Hà Tĩnh, ƀak si Phạm Ngọc Dung, Kơdră vei lăng Hnam pơgang xăh Quảng Sơn, Hnam pơgang apŭng Hải Hà, dêh char Quảng Ninh.

 Vang akŏm pơma đam, kơdră chĕp kơ̆l dôm hnam pơgang Trung ương Huế, Nhi Trung ương, Hnam pơgang 199- Anih tơm vei lăng Kŏng an, Hnam pơgang Vinmec, Anih jang găh pham - ƀet tơmơ̆t pham Trung ương hlôi vang tơroi jơhngơ̆m đon păng dôm tơdrong hơdrin yak hloh mơmat tat khei ‘năr jĭ hơbuh Covid-19, găh bơngai jang pơgang pơdơh kơ jang, găh ưh kơ măh pơgang, tơmam, kơmăy kơ mŏk jang pơgang. Phŏ Giáo sư, Tiến sĩ Trần Minh Điển, Kơdră vei lăng Hnam pơgang Nhi Trung ương tơbăt: “ ‘Năr brei, Anih tơm vei lăng găh jang pơgang păng kơdră chĕp kơ̆l dôm hnam pơgang tih hlôi hôp truh 9jơ gơmăng, nhôn hlôi lăng ƀôh đei akhan tơdrong hơmet pơ ‘lơ̆ng sư gô keh đang dar deh. Mă lei ‘noh lơ̆m tơdrong vă kơ dôm hnam pơgang teh đak bơ̆ jang ‘lơ̆ng hloh ‘noh jĭ trong jang pơm tơm kơ dih găh jên hu.”

Oei Giáo sư, Tiến sĩ Phạm Như Hiệp, Kơdră vei lăng Hnam pơgang Trung ương Huế ‘noh tơroi: “‘Noh pă jor dôm tơdrong mơmat tat âu nhôn gô hơmet pơ ‘lơ̆ng đei, pơtih gia nhen luơ̆t khăm hơmet jĭ gô đei tơmơ̆t yua lơ̆m sơnăm 2024 yua kơ lơ̆m Luơ̆t khăm hơmet jĭ ‘noh kŭm hlôi đei lơ tơdrong mă  bơ̆n hlôi hơmet pơ ‘lơ̆ng đei, pơtih gia nhen găh kơjă, pơvih pơvăn pơgang, tơpôl vang tơgop, klăih song hnam pơgang, păng dôm tơdrong ‘noh gô tơgŭm hơmet pơ ‘lơ̆ng dôm tơdrong tơhlăk tơhlĭn mă anih jang pơgang oei tŏk bŏk tơvŏk ƀơm.”

Pơma tơ̆ jơ tơƀơ̆p muh măt, ƀlŏk bơnê kơ kang ƀô̆, bơngai jang pơgang, Phŏ kơdră Anih tơm vei lăng găh jang pơgang Đỗ Xuân Tuyên tơbăt: Tơ̆ hơnăp kơnh, Anih tơm vei lăng găh jang pơgang akŏm chih pơkeh hla ar khôi luơ̆t, trong jang tơgŭm, dôm hla ar chih pơjing luơ̆t, tơplih ‘nao jang pơgang tang găn hơdrol păng hơtŏk ‘lơ̆ng jơhngơ̆m jăn. Hơtŏk ‘lơ̆ng tơdrong jang vei lăng hnam pơgang, tơdrong ‘lơ̆ng pơvih pơvăn khăm hơmet jĭ păng jơhngơ̆m đon pơvih pơvăn bơngai jĭ. Dăr hơlen kơjă pơvih pơvăn pơgang kiơ̆ trong ƀlep, tôm, tơplih ‘nao trong kla jên, trong jang tơgŭm jên hu jang pơgang tang găn hơdrol...  Anih tơm kŭm gô tŭn pran hơmet ming hành chính, hơtŏk ‘lơ̆ng, đei yua tơdrong jang roi tơbăt, mă loi ‘noh jĭ roi tơbăt trong jang tơgŭm, pơm tơdrong drơ̆ng lăp đơ̆ng đĭ đăng lơ̆m tơpôl hăm dôm tơdrong bơ̆ jang lơ̆m tơdrong jang pơgang.