VOV4.Bahnar - Jô̆ đơ̆ng blŭng sơnăm au trŭh dang ei, dêh char Gia Lai đei hlŏh 6.400 ‘nu bơngai jĭ tơ̆ 287 hơnĭh đei jĭ pơlŏ lĕch đe tơ̆ rim tơring, phương, thĭ trân; hlôi đei 1 ‘nu bơngai lôch.

Bơngai jĭ tŏk bŏk ming hơmet ji pơlŏ lĕch đe tơ̆ Hnam pơgang pơlei tơm Pleiku

Lơ̆m khei 9 au ki, măt bơngai jĭ pơlŏ lĕch đe tŏk tôch kơ lơ, hăm hlŏh 2.400 ‘nu bơngai jĭ. Rim tơring đei măt bơngai jĭ lơ hlŏh ‘nŏh apŭng Đak Pơ, pơlei tơm Pleiku, apŭng Krông Pa… Rim hnam pơgang hơvơn khŭl jang đĭ ai vă sơđơ̆ng ming hơmet ăn bơngai jĭ pơlŏ lĕch đe. Kiơ̆ đơ̆ng Dơnŏ anih vei lăng jang pơgang dêh char Gia Lai, dêh char tơdra hơdrol măt bơngai jĭ pơlŏ lĕch đe rŏ năng gô tơpŏh kơtang lơ̆m khei 9 păng khei 10 kơ yuơ ‘nau jing khei ‘năr tŏ ‘mi tơplĭh dĭh băl pơm ‘lơ̆ng ăn mŭr măih chek lar char kon. Dơnŏ anih vei lăng jang pơgang dêh char hlôi pơrô̆ athei rim hnam pơgang tơlĕch jang kơtang tang găn pơrang jĭ păng ming hơmet jĭ đơ̆ng tơring hloi.

VOV Tây Nguyên/Amazưt tơblơ̆ nơ̆r