VOV4.Bahnar - Kơ sơ̆ ‘năr 6/9, Khŭl bơ̆ jang kơ Anih tơm vei lăng găh tơ drong jang pơ gang yua đơ̆ng Phŏ kơ dră tơm Đỗ Xuân Tuyên pơm kơ dră khŭl hlôi đei jơ bơ̆ jang hăm Anih vei lăng kon pơ lei dêh char Dak Nông găh tơ drong jang hơ tŏk tơ iung y dược cổ truyền păng tơ drong jang bơ̆ jang kiơ̆ dôm tơ drong jang pơ jing tơ ring iŏk yua jên ODA. Tơ̆ jơ bơ̆ jang, Phŏ kơ dră tơm Đỗ Xuân Tuyên athei Dak Nông kăl kơ bơ ngơ̆t truh hơ tŏk tơ iung bơ ngai jang y dược cổ truyền, hơ met tôm bơ ngai jang Khŭl Đông y tơ klep hăm anih jang pơ gang dôm apŭng, hơ tŏk tơ iung pơ gar ‘long pơ gang tơ̆ dôm hnam pơ gang xăh; hơ dai hăm jăh đei chĕng hơ met teh hơ tŏk tơ iung hơ găt ‘long pơ gang, ‘mă loi ‘noh jĭ ‘long pơ gang tơ̆ hơ la yơ̆p bri; lăng kăl sơng đei tơ mơ̆t jên jang pơ tăm ‘long pơ gang tơ klep hăm tơ mang lăng.

Ƀơm truh ƀet bơ̆ng vắc xin Covid-19, Phŏ kơ dră tơm athei tơ ring kăl kơ hơ tŏk tơ drong ƀet bơ̆ng tôm hloh dơ̆ng hăm đon tơ chĕng kơ jăp ‘noh jĭ ƀet tang găn jĭ jăn. Hăm tơ drong răt tơ mam jang pơ gang, iŏk jang pơ gang, Phŏ kơ dră tơm athei Dak Nông dăr hơ len lăng dơ̆ng dôm tơ drong tơ chơ̆t vă tơ lĕch hơ met pơ ‘lơ̆ng dôm tơ drong mơ mat tat, tơ hlăk tơ hlĭn, hơ met ming dôm tơ drong ưh pă lăp.

Thuem: Tơ blơ̆