VOV4.Bahnar - ‘Năr 24/7, Anih tơm vei lăng jang pơ gang hôp trư̆k tuyê̆n hăm dôm bơ ngia juăt jang lơ̆m păng ‘ngoăih kơ tĕh đak găh tơ drong jĭ chŭ đŏk. Tơ drong hop akŏm drơ̆ng nơ̆r akhan, truh ‘năr 24/7/2022, Việt Nam tam mă đei bơ ngai yơ jĭ chŭ đŏk rŏ. Mă lei, tơ drong krê kơ jĭ chŭ đŏk tơ pŏh truh tơ̆ tĕh đak bơ̆n oei đei đĕch, yoa jĭ hlôi đei tơ̆ lơ tĕh đak, tơ drong yak vih vât hiôk hian păng roi tŏk đơ̆ng Việt Nam păng dôm tĕh đak lơ̆m apŭng plenh tĕh, kŭm nhen tơ̆ tơ ring.

Anih tơm vei lăng jang pơ gang đei hla ar chih gơih ăn Dơ nŏ anih vei lăng kon pơ lei dôm dêh char, plt găh hơ tŏk tơ drong tang găn jĭ chŭ đŏk, hơ met tôm tơ mam vă hơ len jĭ pơ yoa ăn khăm hơ len, chih tơ băt jĭ, dôm anih vei lăng jang pơ gang hơ tŏk trong hơ len năng hăm dôm bơ ngai đei jâu tơ pŏh jĭ tơ̆ ‘măng jang sơ lam, tơ̆ dôm anih jang pơ gang păng pơ gơ̆r roi tơ băt, hơ tŏk đon hlôh vao ăn kon pơ lei găh tơ drong jĭ chŭ đŏk păng dôm trong tang găn kơ plăh dang ei.

Dơ̆ng: Tơ blơ̆