VOV4.Bahnar - ‘Năr 4/8, yă Đào Hồng Lan, Kơ dră chĕp kơ̆l pơ gia Anih tơm vei lăng jang pơ gang pơm kơ dră khŭl hlôi đei jơ bơ̆ jang hăm dêh char Dak Lak. Kiơ̆ tơ roi tơ băt, lơ̆m dôm sơ năm âu ki, tơ drong jang khăm hơ met jĭ lơ̆m dêh char Dak Lak hlôi đei dôm tơ drong tơ plih rơ đăh rơ đong, anih jang pơ gang tơ ring hlôi đei bơ ngơ̆t truh tơ gop gĭt kăl lơ̆m tơ drong jang vei lăng jĭ hơ buh đơ̆ng tơ ring. Găh tơ drong jang tang găn jĭ jăn, dang ei Dak Lak tŏk bŏk đei vă jê̆ 40 tơ drong jĭ tơ poh, lơ̆m noh đei 10 tơ drong jĭ tơ jur, 2 tơ drong jĭ tŏk, 27 tơ drong jĭ sơ đơ̆ng pơ têng hăm khei ‘nâu sơ năm 2021. Lơ̆m noh, 2 kơ loăi jĭ tŏk bŏk đei ƀôh krê hơ mơt ‘noh jĭ COVID-19 păng jĭ pơ lŏ lĕch đe.

Kơ dră chĕp kơ̆l pơ ga Anih tơm vei lăng găh jang pơ gang Đào Hồng Lan iung pơ ma tơ̆ jơ bơ̆ jang

Pơ ma tơ̆ jơ bơ̆ jang, Kơ dră chĕp kơ̆l pơ gia Anih tơm vei lăng jang pơ gang Đào Hồng Lan akhan, tơ drong jĭ hơ buh tŏk bŏk đei ƀôh krê hơ mơt, yua thoi noh khŭl kơ dră tơ ring kăl hơ nơ̆ng pơ tho ‘lơ̆ng lơ̆m tơ drong jang tang găn jĭ, veh ver kơ lê̆ đei ƀôh tơ drong jĭ hơ drom jĭ. Găh tơ drong jang ƀet vắc xin tang găn jĭ COVID-19, Dak Lak tŏk bŏk jing 1 lơ̆m 4 dêh char đei kơ sô̆ ƀet jrŭm pơ klăm tŏ sĕt hloh lơ̆m teh đak, yua thoi noh dêh char kăl kơ hơ tŏk loi dơ̆ng tơ drong jang tơ roi tơ băt vă kơ kon pơ lei vang ƀet bơ̆ng.

Thuem: Tơ blơ̆