Khul kơdră hlôi năm tơmang Hnam pơgang tơm Tơring Tây Nguyên, Hnam pơgang Thiên Hạnh păng Hơnĭh bơ̆ jang tang găn pơrang jĭ Tây Nguyên.

Tang măt ăn Kơdră chĕp pơgơr Đảng dêh char, ƀok Y Ƀiêr Niê, Kơ iĕng Kơdră chĕp pơgơ̆r Đảng dêh char hôn bơnê dôm tơdrong iŏk đei jơnei tơdrong jang kơ rim hơnih lơ̆m khei năr au ki, mă kăl lơ̆m jang kiơ̆ trong jang tang găn jĭ hơbuh Covid-19 adoi iung jang ‘lơ̆ng bơ̆ jang vei lăng jơhngơ̆m jăn ăn kon pơlei. Adoi hơpơi ‘mĕh vă rim kang ƀô̆, ƀok thây pơgang hơnơ̆ng hơdrin, hơmet pơ ‘lơ̆ng tơnap tap, atŏk kơtang bơ̆ jang hơgei vă vei lăng năng tông jơhngơ̆m jăn ăn kon pơlei ‘lơ̆ng hơ iă hloh dơ̆ng. Đei ƀơm truh tơdrong ưh kơ măh pơgang păng tơmam drăm jang pơgang pơm tơnap tap lơ̆m bơ̆ jang mă rim Hnam pơgang teh đak lơ̆m dêh char tŏk bŏk tơƀơ̆p, Kơdră chĕp pơgơ̆r Đảng dêh char Đak Lăk sơkơ̆t hơdăh gô pơma dơnuh trong jang hơmet pơ ‘lơ̆ng.