VOV4.Bahnar - Tơ̆ dêh char Kon Tum đơ̆ng lơ sơ năm kơ âu hlôi đei ƀộ tơ drong  y ƀak si tơ̆ dôm hnam pơ gang teh đak apĭnh năm jang tơ̆ nai păng pơ dơh kơ jang. hăm dêh char groi kông oei lơ mơ mat tat nhen Kon Tum, tơ drong ưh kơ măh bơ ngai jang, mă loi ‘noh jĭ bơ ngai jang hơ gei, hŏk jrŭ jang pơ gang tŏk bŏk jing tơ drong tơ tăm lơ̆m tơ drong jang vei lăng jơ hngơ̆m jăn kon pơ lei. Tơ̆ hơ năp tơ drong tơ pă âu, dêh char Kon Tum kŭm hlôi đei dôm trong jang vă vei jơ̆ng bơ ngai jang pơ gang.

Jô̆ đơ̆ng sơ năm 2018 truh dang ei đei 59 ‘nu ƀak si, dược sỹ hŏk đăi hŏk bơ̆ jang tơ̆ dôm hnam pơ gang teh đak kơ dêh char Kon Tum apĭnh năm jang tơ̆ nai păng pơ dơh kơ jang. Hơ drô̆ 6 khei âu ki tơ̆ dêh char ‘nâu kŭm hlôi đei 3 ƀak si păng 1 ‘nu dược sỹ pơ dơh kơ jang tơ̆ hnam pơ gang teh đak. Yă Huỳnh Thị Hồng, bơ ngai tang măt Jơ nŭm pơ gơ̆r kon pơ lei dêh char Kon Tum tơ ƀôh tơ drong tơ tăm tơ̆ hơ năp tơ drong bơ ngai jang hơ gei, hŏk jrŭ kơ anih jang pơ gang pơ dơh kơ jang:

        “Hnam pơ gang Đa khoa dêh char Kon Tum đơ̆ng kơ loăi II tŏk kơ loăi I đei 750 tŏ giơng bơ ngai jĭ ƀĭch athei vei sơ đơ̆ng bơ ngai jang. Ƀak si păng bơ ngai jang pơ gang apĭnh pơ dơh kơ jang dăh mă năm jang tơ̆ hơ nih hiôk vă bơ̆ jang, găh đunh đai gô hơ nhăk truh tơ drong ưh kơ măh bơ ngai jang hơ gei mă loi ‘noh jĭ tơ̆ hnam pơ gang teh đak.”

Ƀak si Hnam pơ gang Đa khoa dêh char Kon Tum hăt hot pơ vih pơ văn ăn kon pơ lei năm khăm hơ met jĭ

Kiơ̆ kơ ƀok Lê Ngọc Tuấn, Kơ dră Anih vei lăng kon pơ lei dêh char Kon Tum, tơ drong tơm pơm ăn rim sơ năm dêh char đei hloh 14 ‘nu ƀak si, dược sỹ apĭnh năm jang tơ̆ nai, pơ dơh kơ jang ‘noh jĭ tơ drong iŏk yua păng tơ drong hiôk bơ̆ jang. Tơ pă yan âu ăn ƀôh iŏk yua, tơ drong hiôk bơ̆ jang tơ̆ dôm pơ gang teh đak kơ dêh char tŏ sĕt hloh lơ pơ têng hăm iŏk yua, tơ drong hiôk bơ̆ jang tơ̆ dôm hnam pơ gang pơ jing kơ dih kŭm nhen lơ dêh char, pơ lei tơm nai. Yua thoi noh kiơ̆ kơ ƀok Lê Ngọc Tuấn vă vei jơ̆ng đei bơ ngai jang pơ gang kăl kơ đei trong jang hơ met pơ ‘lơ̆ng mơ mat tat ăn anih jang pơ gang teh đak:

 “Vă vei jơ̆ng khŭl y ƀak si athei tơ plih ‘lơ̆ng iŏk yua ăn khŭl jang y ƀak si tŏk bŏk bơ̆ jang lơ̆m hnam pơ gang teh đak. Tơ mơ̆t jên jang anih jang, tơ mam drăm, kơ măy kơ mŏk vă pơm hơ nih bơ̆ jang ăn khŭl jang âu ‘lơ̆ng ƀiơ̆. Đei trong jang tơ gŭm ăn năm hŏk păng athei hơ tŏk loi dơ̆ng tơ drong pơm tơm kơ dih lơ hloh ăn kơ dôm hnam pơ gang teh đak vă pơm tơ drong hiôk hơ tŏk iŏk yua ăn khŭl y ƀak si tŏk bŏk bơ̆ jang lơ̆m anih jang.”

Bơ ngai jang pơ gang dêh char Kon Tum lơ̆m dôm năr kơ hret hăm jĭ COVID-19

        Kŭm kiơ̆ kơ ƀok Lê Ngọc Tuấn, Kơ dră Anih vei lăng kon pơ lei dêh char Kon Tum, tơ̆ hơ năp tơ drong yan âu y ƀak si tơ̆ dôm hnam pơ gang teh đak apĭnh tơ plih jang tơ̆ nai păng pơ dơh jang, sơ năm 2020 Khŭl kơ dră chĕp kơ̆l Anih jang Đảng dêh char Kon Tum hlôi đei trong jang tơ gŭm hăm kang ƀô̆ jang pơ gang mưh năm hŏk chuyên khoa I, chuyên khoa II đei tơ gŭm ăn năm hŏk đơ̆ng jên jang teh đak. Anih vei lăng kon pơ lei dêh char Kon Tum kŭm hlôi tơ lĕch tơ drong jang hơ tŏk tơ iung bơ ngai jang kơ dêh char truh sơ năm 2030, lăng truh sơ năm 2050, lơ̆m noh tơ lĕch trong jang vă hơ tŏk tơ iung bơ ngai jang ăn tơ drong jang pơ gang. Mă lei tơ pă yan âu ăn ƀôh, dôm trong jang tơ gŭm vă vei jơ̆ng bơ ngai jang pơ gang kơ dêh char Kon Tum oei tam mă đei tơ lĕch jang kiơ̆ đei yua păng ưh kơ dang ăi kơ na oei đei ƀôh tơ drong kang ƀô̆, bơ ngai jang pơ gang apĭnh năm jang tơ̆ nai, pơ dơh kơ jang lĕch veh đơ̆ng hnam pơ gang teh đak.

Thuem: Tơ blơ̆