VOV4.Bahnar -  Tơ̆ dêh char Kon Tum dôm khei hơ drol kơ sô̆ F0 athei hơ met akŏm tŏk truh kơ hrĕng ‘nu ‘noh truh dôm năr blŭng khei puăn âu đĭ tơ jur lơ. Kơ tơ̆ng ang đơ̆ng Anih vei lăng găh jang pơ gang dêh char Kon Tum ăn ƀôh, dang ei lơ̆m dêh char lăp đei 65 F0 tŏk bŏk athei hơ met akŏm tơ̆ dôm anih jang pơ gang.

Hnam pơ gang xăh Ia Chim, pơ lei tơm Kon Tum pơ tho tơ ƀôh ăn kon pơ lei đơ̆ng rŏng ƀet vắc xin bơ̆ng jĭ COVID- 19

Hơ dai hăm ‘noh kơ sô̆ bơ ngai F0 đei tơ drong jĭ ăl kăl athei truh tơ̆ anih jang pơ gang hơ met jĭ hơ nơ̆ng đei ƀôh tơ jur. Tiến sỹ- Bác sỹ chuyên khoa II Võ Văn Thanh, Kơ dră chĕp kơ̆l Anih vei lăng găh jang pơ gang dêh char Kon Tum tơ băt, kŭm hăm hơ drin vei lăng, răp hơ len lăng, hơ met ăn 3.500 F0 dang ei tŏk bŏk ăn oei hơ drô̆ hơ met tơ̆ hnam, anih jang pơ gang dêh char kŭm kơ chăng ăn tơ drong hơ met, roi tơ ƀôh dôm bơ ngai đei tơ drong jĭ đơ̆ng rŏng kơ jĭ COVID-19 đang. Đơ̆ng blŭng jĭ truh dang ei anih jang pơ gang dêh char Kon Tum hlôi đei dang 45.000 ‘nu jĭ COVID- 19. Lơ̆m noh đei hloh 40.000 ‘nu jĭ ăn oei hơ drô̆ kiơ̆ hơ len lăng kơ dih hơ met jĭ tơ̆ hnam.

Thuem: Tơ blơ̆