VOV4.Bahnar - Khei ‘năr âu ki, Hnam pơ gang Đa khoa tơ ring Tây Nguyên, hlôi sơng iŏk păng hơ met ăn kơ dôm jĭt ‘nu hơ ioh ƀơm tơ drong jĭ  MIS-C (jĭ tơ drong) đơ̆ng rŏng kơ jĭ COVID-19, lơ̆m noh đei dôm bơ ngai hơ ioh đei blơ̆, ưh kơ ‘lơ̆ng tơ̆ trong dui jơ hngơ̆m, jĭ plei nuih krê hơ mơt hơ kâu jăn.

        Vei lăng kon tơ̆ Hnam pơ gang Đa khoa tơ ring Tây Nguyên, mŏ Vũ Thị Hương, oei tơ̆ phường Tân Lập, pơ lei tơm Buôn Ma Thuột, dêh char Dak Lak tơ băt: Đunh kơ âu hloh 1 khei, kon drŏ nglo sư 7 sơ năm đei ƀôh yuh, ŭnh hnam ăn mon huch pơ gang tơ jur yuh păng ƀôh mon ưh pă yuh bơ̆ih kơ na ŭnh hnam ưh test COVID-19 ăn kơ mon. Mă lei, dang 5 giĕng đơ̆ng rŏng, mon hơ nơ̆ng kơ yuh dêh ưh kơ dă ƀiơ̆ kơ na ŭnh hnam năm ba mon tơ̆ hnam pơ gang. Đơ̆ng rŏng kơ đe ƀak si khăm hơ len tôm, ăn ƀôh mon đei jĭ MIS-C đơ̆ng rŏng COVID-19.

        “Tôch kơ krê hơ mơt, yua kơ ĭnh ưh kơ băt hrôih lê̆ truh dang ei hơ met sư pơ dui đunh, ăn bă ĭnh băt hrôih kơ mon đei jĭ đơ̆ng COVID ĭnh hơ met hrôih ƀiơ̆ ‘noh mon gô pran jăng ƀiơ̆, dă ƀiơ̆ ƀiơ̆.”

          Lei lăi nhen mŏ Hương, ‘nhŏng Nguyễn Chí Quốc oei tơ̆ phường Ea Tam, pơ lei tơm Buôn Ma Thuột kŭm tôch kơ tơ tăm păng ưh kơ ê ƀơ̆t đe ƀak si tơ băt kon drŏ kăn sư ƀơm tơ drong jĭ MIS-C đơ̆ng rŏng COVID-19.

        “Tơ drong jĭ đơ̆ng mon ‘noh blŭng a sư yuh hơ nơ̆ng 4 năr păng năr mă 5 ‘mơ̆i mă năm tơ̆ hnam pơ gang, yuh lĕch ƀre ƀrônh, hơ ving măt, kơ̆l dăr, jĭ kơ̆l, hăk, ưh kơ gơh sa kiơ hloi. Đe ƀak si kŭm tơ gŭm păng hơ met truh dang ei ‘noh mon kŭm dă ƀiơ̆ bơ̆ih, đĭ đăng dôm tơ drong đei jĭ dă ƀiơ̆ ngăl bơ̆ih, dang ei mon pran jăng, sŏng sa hmă.”

Hơ ioh đei jĭ MIS-C đơ̆ng rŏng kơ jĭ COVID-19 tŏk bŏk đei ƀak si khăm tơ̆ Hnam pơ gang Đa khoa tơ ring Tây Nguyên

        Kiơ̆ kơ Tiến sĩ, bác sĩ Trần Thị Thúy Minh, Kơ dră Khoa hơ met hơ ioh jĭ Hnam pơ gang Đa khoa tơ ring Tây Nguyên, tơ drong jĭ MIS-C ‘noh tơ drong jĭ tơ̆ dôm hơ nih pha ra băl ‘noh đei plei nŭih, tơ soh, plei lĕn, ‘ngok, hơ kar, măt dăh mă trong klak tơ̆ hơ ioh lơ̆m dang đơ̆ng 4-8 giĕng đơ̆ng rŏng kơ đei jĭ COVID-19. ‘Nâu jĭ tơ jră tơ drong pran tôch kơ tang, gô pơm ăn krê hơ mơt ăn hơ ioh, hơ nhăk ăn lơ tơ drong jĭ dăh mă hơ nhăk truh lôch hơ chăng.

        “Tơ drong jĭ MIS-C đơ̆ng rŏng COVID-19 ưh kơ mơ̆ng lơ̆m ƀơ̆t bơ̆n jĭ COVID-19 ăl dăh mă păh lăp. Đe mĕ đe ƀă đei kon jĭ COVID dăh mă jâu đei jĭ COVID -19 hơ drol ‘noh đơ̆ng rŏng dang đơ̆ng 4 truh 8 giĕng mă hơ ioh đei ƀôh yuh kơ pal kơ 3 năr hơ nơ̆ng, măt ƀrê, hơ kŭng ƀreo, hơ piĕt ƀơ̆l, lĕch ƀre ƀônh, jĭ klak chroh, lap, ti lĕch hmrŏng hmrônh dăh mă tơ pang ti pơ ôr ‘noh athei năm tơ̆ hnam pơ gang jê̆ hloh vă đei khăm hơ len lăng păng hơ met tơ tom, veh ver kơ dôm tơ drong jĭ nai đei ƀôh.”

        Tơ drong jĭ MIS-C đơ̆ng rŏng jĭ COVID-19 tôch kơ ăl păng krê hơ mơt hăm hơ ioh. Mă lei, tơ dăh chă ƀôh păng ƀĭch tơ̆ hnam pơ gang hrôih, hơ len lăng ƀlep păng hơ met tơ tom, lơ bơ ngai đei jĭ gô ƀôh ‘lơ̆ng. Vă hơ ioh hoei kơ đei tơ drong jĭ ‘nâu, ŭnh hnam athei vei lăng, veh ver kơ hơ ioh ƀơm jĭ COVID-19. Kăl kơ ăn hơ ioh ƀet vắc xin COVID-19 vă tơ jur kơ sô̆ bơ ngai jĭ ăl păng tơ jur tơ drong lôch mưh đei ƀơm jĭ.

Nam Trang: Chih

Thuem: Tơ blơ̆