VOV4.Bahnar - Đơ̆ng rŏng đei Anih tơm vei lăng jang pơ gang asong iŏk yoa, dôm kơ loăi pơ gang hơ met jĭ COVID-19, mă loi jĭ pơ gang Molnupiravir đei tĕch tơ̆ ‘ngoăih tôch lơ. Mă lei, kiơ̆ nơ̆r tơ tă, tơ drong iŏk yoa pơ gang hơ met jĭ COVID-19 athei yoa ƀak si chih hla ar răt, tơ dăh năm răt kơ dih păng hơ met kơ dih gô đei lơ tơ drong krê tôch hơ mơt. Vă băt hơ dăh ƀiơ̆ tơ drong ‘nâu, nhôn pơ ma nuh hăm ƀak si Lại Quang Miễn, Phŏ Kơ dră Anih jang pơ gang plt Buôn Ma Thuột.

- Ƀak si ăi, dôm bơ ngai F0 yơ gơ̆h hơ met hăm pơ gang Molnupiravir?

-Ƀak si Lại Quang Miễn: Đơ̆ng rŏng kơ Dơ nŏ anih vei lăng kon pơ lei dêh char Dak Lak asong dêh char hơ met jĭ hăm pơ gang Molnupiravir ăn bơ ngai jĭ F0 tơ̆ hnam ‘nŏh truh ‘năr 19/1/2022 Anih jang pơ gang chih tơ lĕch trong vă hơ met ăn bơ ngai jĭ F0 tơ̆ hnam mă ưh đei hiĕn yuh, dăh mă hiĕn yŭh lơ lăp. Găh nơ̆r asong hơ met, mă 1 pơ gang hơ met hăm drŏ nglo, drŏ kăn đơ̆ng 18 sơ năm tŏk tơ̆ kơ pal. Ưh đei hơ met ăn bơ ngai hơ la kơ 18 sơ năm. Drŏ kăn hơ năp dăh mă ăn kon mŏm kŭm ưh gơ̆h hơ met hăm pơ gang ‘nâu. Hăm bơ ngai đei tơ drong jĭ lơ̆m hơ kâu jăn bơ̆n lê̆ hơ met hăm pơ gang ‘nâu ‘năi. 1,2 ‘nu bơ ngai kră, đei hloi tơ drong jĭ lơ̆m hơ kâu jăn, jĭ plei nuih, jĭ klơm dăh mă jĭ plei lĕn kŭm ưh gơ̆h yoa pơ gang Molnupiravir.

- Tơ drong kon pơ lei năm răt pơ gang Molnupiravir vă hơ met kơ dih jĭ COVID-19 sư đei tơ drong krê thoi yơ?

-Ƀak si Lại Quang Miễn: Tơ dăh kon pơ lei năm răt kơ dih pơ gang tang găn virus vă hơ met jĭ ‘nŏh jĭ 1 tơ drong glăi yoa pơ gang tang găn virus Molnupiravir ưh gơ̆h yoa hăm 1 kơ sô̆ bơ ngai. Tơ dăh 1 kơ sô̆ bơ ngai kâm ưh ăn yoa mă oei iŏk yoa pơ gang ‘nâu ‘nŏh hơ nat vă gơ̆h klăih jĭ, ƀât lăp jĭ roi dêh hlŏh dơ̆ng. Y hŏk akhan ‘nâu jĭ tơ drong jĭ tơ pŏh kơ loăi A, vă akhan grŭp jĭ tôch krê hơ mơt kơ na bơ ngai jĭ mưh vă yoa pơ gang athei đei hla ar chih asong đơ̆ng đe y ƀak si. Năm răt huch kơ dih ‘nŏh đei lơ tơ drong krê ưh gơ̆h băt hơ drol, tôch hơ mơt.

Jô̆ truh dang ei, Anih jang pơ gang hơ met jĭ F0 tơ̆ hnam ăn dang 18.000 ‘nu bơ ngai, lơ̆m nŏh hơ met klăih đei 7.638 ‘nu, oei hơ met ăn 10.415 ‘nu bơ ngai păng chơ năm tơ̆ hnam pơ gang kơ pal 43 ‘nu. Hơ drô̆ dôm bơ ngai jĭ F0 hơ met tơ̆ hnam đei yoa pơ gang Molnupiravir ‘nŏh nhôn oei hơ met 670 ‘nu bơ ngai. Tơ drong hơ met đei yoa ‘lơ̆ng, tam đei bơ ngai yơ yoa pơ gang ‘nâu mă jĭ roi dêh dăh mă lôch răm. Đĭ đăng dôm bơ ngai hơ met jĭ hăm pơ gang ‘nâu đei jơ hngâm pran sơ đơ̆ng ‘lơ̆ng ngăl.

-Bĭ, ƀak si hăm đei nơ̆r tơ tă kiơ ăn bơ ngai jĭ COVID-19 ưh?

-Ƀak si Lại Quang Miễn: Hrei ‘nâu, Anih tơm vei lăng jang pơ gang tơ tă ăn đĭ đăng kon pơ lei mưh jĭ COVID-19 athei chơ̆n jơ hngâm, lê̆ kơ hli tăr văr. Pơm kiơ̆ mă ‘lơ̆ng tơ drong hơ găt 5K vă tang găn jĭ ăn unh hnam păng tơ pôl. Dang ei nhôn pơ jing 25 hnam pơ gang năm hơ met jĭ. Đe kăn ƀô̆ tơ̆ hnam pơ gang âu đei pơ tâp pơ hrăm găh trong hơ met ăn F0 tơ̆ hnam păng hơ met F0 đei yoa pơ gang tang găn virus. Yoa thoi nŏh, mưh đei jĭ, bơ ngai jĭ dăh mă bơ ngai lơ̆m hnam athei năm tơ̆ hnam pơ gang vă roi tơ băt. Tơ dăh bơ ngai jĭ đei tôm tơ drong kăl, ‘nŏh hnam pơ gang gơ̆h asong hơ met jĭ F0 tơ̆ hnam. Đơ̆ng rŏng đei hla ar asong hơ met F0 tơ̆ hnam ‘nŏh kăn ƀô̆ jang pơ gang hơ nơ̆ng pơ ma nuh hăm bơ ngai jĭ, vă tơ lĕch nơ̆r pơ tho tơ ƀôh, hơ len năng tơ drong hơ met jĭ tơ̆ hnam, nhen: pơ tŏ pơ ‘nơ̆k, hơ yuh tŏ, dôm tơ drong kăl nai 1 năr 2 vât, pơ gê păng kơ sơ̆ vă roi tơ băt ăn bơ ngai jang pơ gang. Tơ dăh jĭ roi ăl ‘nŏh bơ ngai jang pơ gang truh tơ tom hloi, vă khăm hơ len, pơ tho dơ̆ng trong hơ met dăh mă chơ năm tơ̆ hnam pơ gang.

Lei a, bơ nê kơ ƀak si hơ!

Dơ̆ng: Tơ blơ̆