Kiơ̆ Anih vei lăng jang pơ gang apŭng plenh tĕh, et hơ̆t jĭ tơ drong tơm pơm ăn hlŏh 8 triu ‘nu bơ ngai lôch lơ̆m plei tĕh lơ̆m 1 sơ năm. Lơ̆m nŏh đei hlŏh 7 triu ‘nu bơ ngai lôch yoa et hơ̆t păng dang 1,2 triu ‘nu lôch yoa hrip ƀơm ‘nhui hơ̆t. Et hơ̆t kŭm jing 1 tơ drong pơm hơ tŏk tơ drong krê tơ pŏh jĭ kiơ̆ trong dui jơ hngâm păng pơm hơ tŏk tơ drong krê hăm dôm tơ drong jĭ kiơ̆ trong dui jơ hngâm. Kiơ̆ tơ drong hơ len năng đơ̆ng dôm bơ ngai juăt jang pơ gang lơ̆m tơ pôl đei WHO krao akŏm lơ̆m ‘năr 29/4/2020 ăn ƀôh, dôm bơ ngai et hơ̆t đei tơ drong krê dêh hlŏh găh jơ hngâm pran yoa đơ̆ng jĭ COVID-19, krê ƀiơ̆ kơ bơ ngai ưh đei et hơ̆t. Hơ dai hăm ƀơm ưh ‘lơ̆ng găh jơ hngâm pran, et hât oei pơ huach mŭk drăm hăm rim bơ ngai, unh hnam păng tơ pôl, dôm tơ drong hiong răm âu âu đei hloi jên răt hơ̆t, jên năm khăm, hơ met jĭ ƀơm truh tơ̆ et hơ̆t, tơ jur kơ sư̆k bơ̆ jang yoa jĭ jăn păng lôch hrôih. Kiơ̆ kjơ sô̆ chih jô̆ đơ̆ng Anih vei lăng jang pơ gang apŭng plenh tĕh, hiong răm găh mŭk drăm lơ̆m plei tĕh yoa đơ̆ng et hơ̆t 1 sơ năm truh 1.400 ti đô la Mi.

Vă roi tơ băt ăn tơ pôl tơ drong răm đơ̆ng et hơ̆t truh hăm cham char, Anih vei lăng jang pơ gang apŭng plenh tĕh rơih iŏk nơ̆r tơ băt “Hơ̆t hla – pơ joă truh tơ̆ cham char bơ̆n” pơm hơ năn Năr apŭng plenh tĕh ưh đei et hơ̆t ‘năr 31/5/2022. Kiơ̆ đơ̆ng nơ̆r tơ băt âu, Anih vei lăng jang pơ gang apŭng plenh tĕh krao hơ vơn dôm tĕh đak bơ̆ jang pơm hơ tŏk đon hlôh vao ăn tơ pôl găh tơ drong răm đơ̆ng et hơ̆t truh tơ̆ cham char, lê̆ et hơ̆t vă da ƀiơ̆ pơm pơ răm cham char păng jơ hngâm pran.

Tơ̆ Việt Nam, kơ sô̆ bơ ngai et hơ̆t jur đơ̆ng 22,5% sơ năm 2015 jur pă 21,7% sơ năm 2020. Kơ sô̆ drŏ nglo et hơ̆t jur đơ̆ng 45,3% sơ năm 2015 pă 42,3% sơ năm 2020. Kăl loi kơ sô̆ bơ ngai hrip ƀơm ‘nhui hơ̆t kŭm jur lơ tơ̆ dôm anih nhen: anih bơ̆ jang, hnam pơ gang, hnam hŏk, tơ̆ gre tơ pôl păng lơ̆m hnam. Kiơ̆ tơ drong dăr lăng jơ hngâm pran hŏk tro tơ̆ Việt Nam yoa Anih vei lăng jang pơ gang apŭng plenh tĕh pơ gơ̆r sơ năm 2019, kơ sô̆ hŏk tro đơ̆ng 13-17 sơ năm et hơ̆t jur đơ̆ng 5,36% sơ năm 2013 păng 2,78% sơ năm 2019, ‘nâu jĭ tơ drong tôch hơ iă lơ̆m tơ drong tang găn et hơ̆t tơ̆ đe ‘lơ ‘lơ̆p.

Jang kiơ̆ Năr apŭng plenh tĕh ưh đei et hơ̆t ‘năr 31/5/2022, Giĕng lêh tĕh đak ưh đei hơ̆t hla đơ̆ng ‘năr 25/5 truh ‘năr 31/5, Anih tơm vei lăng jang pơ gang đei hla ar athei Dơ nŏ anih vei lăng kon pơ lei dôm dêh char, plt vang jang hơ doi păng hơ nơ̆ng pơ tho ăn dôm anih jang kơ pal lơ̆m dêh char, plt hơ tŏk dôm tơ drong jang đei: Hơ tŏk tơ drong roi tơ băt tơ drong răm đơ̆ng et hơ̆t păng Luơ̆t tang găn tơ drong răm đơ̆ng hơ̆t hla; Hơ tŏk tơ drong jang hơ doi đơ̆ng dôm anih jang kơ pal vă tang găn tơ drong răm đơ̆ng hơ̆t hla; Hơ tŏk tơ drong dăr lăng mưh pơ gơ̆r jang kiơ̆ Luơ̆t tang găn tơ drong răm đơ̆ng hơ̆t tơ̆ tơ ring.

Dơ̆ng: Tơ blơ̆