VOV4.Bahnar - Plang song pham dŏng bơ ngai ‘noh jĭ 1 tơ drong jang ‘lơ̆ng đơ̆ng hơ drĕch hơ drŭng bơ̆n. Hăm tơ drong kăl “ Mĭnh kơ toh pham asong ăn, mĭnh tơ drong arih oei dơ̆ng”, tơ drong jang plang song pham tơ gŭm tŏk bŏk đei kơ sư̆k păr ang pran kơ tang tơ̆ tơ ring Tây Nguyên. Kiơ̆ đơ̆ng noh, tơ mơ̆t dơ̆ng pham kăl ăn rim hnam pơ gang, pơm lăp tơ tom tơ drong jang kâp kư̆u păng hơ met bơ ngai jĭ.

Vă jê̆ 20 sơ năm kơ âu, ‘nhŏng Hoàng Minh Trung, kơ dră grŭp “ Tơ drong jang ƀrê” apŭng Cư Kuin, dêh char Dak Lak adoi vang plang song pham tơ gŭm rim sơ năm 2 ‘măng. Dang ei sư hlôi đei 38 ‘măng vang plang song pham dŏng bơ ngai. ‘Nhŏng Trung tơ roi: Hơ drol âu ki, lơ̆m 1 ‘măng ƀĭch tơ̆ hnam pơ gang sư hăm bơ ngai ŭnh hnam sư kăl kơ yua truh pham. Kơ plăh doh 1 tơ pu pham kŭm athei kla jên tôch kơ lơ. Tơ dăh ưh kơ đei dôm tơ drong vang tơ gŭm plang song pham ‘mêm mơ nat tơ gŭm, ŭnh hnam nhôn kŭm tơ ƀơ̆p tôch kơ lơ mơ mat tat. Yua thoi noh, đơ̆ng rŏng kơ lĕch đơ̆ng hnam pơ gang pran jăng bơ̆ih ‘noh ĭnh ling lang vang plang song pham păng krao hơ vơn kơ tum kơ tŏng ‘nhŏng oh vang năm phang song pham.

“Kơ dih kâu ĭnh đĭ 1 ‘măng kăl kơ pham, păng lơ̆m ŭnh hnam kŭm đei mĕ ĭnh kăl truh kơ pham kơ na mơn ƀơ̆t đei pham vă ƀet tơ mơ̆t ăn bơ ngai lơ̆m ŭnh hnam ĭnh ‘noh chhôk dêh. Ưh kơ đei jên mŭk drăm hơ yơ gơh răt đei dôm kơ toh pham thoi noh. Păng mă kăl hloh dơ̆ng ‘noh ba năm tơ roi tơ băt, krao hơ vơn plang song pham păng đei rim bơ ngai sơng iŏk ‘noh jĭ 1 tơ drong tôch kơ chhôk hơ iă.”

Tơ̆ sơ năm 56, ƀok Nguyễn Tấn Chờ, oei tơ̆ xăh Quảng Tiến, apŭng Cư M’gar kŭm đĭ lơ ‘măng vang plang song pham. Ƀok Chờ tơ băt: Pham AB+ sư găh grŭp pham khăi kơ na 1,2 ‘nu bơ ngai tôch kơ kăl. Ƀok tôch kơ chhôk ƀơ̆t dôm kơ toh pham asong ăn hlôi tơ gŭm vei dơ̆ng tơ drong arih ăn bơ ngai jĭ.

 “Truh dang ei ĭnh đĭ plang song 44 ‘măng. Ƀlŏk ling lang hloh ‘noh jĭ ‘măng mă blŭng lơ̆m jơ hnơr arih ĭnh plang song pham dŏng arih 1 ‘nu buăl. Păng đơ̆ng rŏng âu dơ̆ng ‘noh plang pham dŏng arih ăn 1 ‘nu mon ‘lơ̆p 3 sơ năm.”

"Năr đĭ đăng kon pơ lei plang song pham tơ gŭm sơ năm 2022" tơ̆ Kon Tum

 Kiơ̆ kơ ƀok Y Wem Hwing, Phŏ kơ dră Anih vei lăng kon pơ lei apŭng Cư M’gar: Gơ nang đơ̆ng jang ‘lơ̆ng tơ drong jang tơ roi tơ băt truh dang ei, kon pơ lei hlôi hlôh đei plang song pham ưh kơ ƀơm kơ nê̆ truh jơ hngơ̆m pran mă oei tơ gop dŏng tơ gŭm bơ ngai dơ̆ng.

 “Hơ drol sơ̆ bơ ngai Êđê đe sư tôch kơ ‘nhoen plang song pham. Mă lei dang ei đơ̆ng hơ druh tơ dăm truh bơ ngai kră bơ ngai Êđê pơ ma hơ drô̆ păng tơ pôl 24 hơ drĕch hơ drŭng vang arih hơ dai lơ̆m apŭng Cư M’gar adoi chhôk hơ iă  vang plang song pham. Đe sư plang song tôch kơ lơ ‘măng păng mưh đei kơ tơ̆ng tơ̆ yơ kăl kơ pham ‘noh đe sư vang plang song pham hloi.”

Ƀok Nguyễn Đức Phú, Chánh văn phòng Anih krao hơ vơn plang song pham ‘mêm mơ nat dêh char Dak Lak, tơ băt: Tơ dăh nhen sơ năm 2003, lơ̆m dêh char lăp krao hơ vơn đei vă jê 700 tơ pu pham ‘noh truh dang ei jô̆ păh lăp rim sơ năm krao hơ vơn đei hloh 22.000 tơ pu pham. Dôm tơ pu pham krao hơ vơn đei hlôi tơ tom dŏng tơ gŭm ăn lơ bơ ngai jĭ.

 “Hăm tơ drong jang krao hơ vơn plang song pham kon pơ lei đe sư tôch kơ tơ năp ƀơ̆t vang tơ gŭm dôm kơ toh pham đơ̆ng kơ dih ăn bơ ngai jĭ. Vă bơ ngai jĭ đei pham kâp kư̆u, hơ met. Tơ dăh mưh đei ƀôh dôm tơ drong ưh kơ măh pham ‘noh Anih krao hơ vơn plang song pham tơ gŭm dêh char hlôi đei trong jang vă kâu lak ƀô̆ plang song pham răk hiă nhen: Khŭl grŭp rim anih jang dêh char, hnam trưng đại học Tây Nguyên, kâu lak ƀô̆ Huyết hồng kơ kŏng an dêh char, kâu lak ƀô̆ kơ 1,2 hnam trưng hŏk đe sư gô hơ nơ̆ng plang song pham vă kơ măh tôm pham kâp kư̆u, hơ met.”

Tơ drong jang plang song pham tơ gŭm tơ̆ dêh char Dak Lak dang ei hlôi păr ang truh lơ tơ ring lơ̆m dêh char. Dôm kơ toh pham ‘mêm mơ nat ưh khan lăp hơ nhăk ăn tơ drong arih ăn kơ lơ bơ ngai jĭ, mă oei tơ ƀôh tơ drong ‘mêm mơ nat, tơ drong tơ gŭm, tơ gop pơm đei dôm kơ jă kăp gĭt ‘lơ̆ng hơ iă.

Dôm bơ ngai jang tơ gŭm tơ̆ Dak Lak vang plang song pham tơ gŭm

Âu ki, Anih pơ gơ̆r jang krao hơ vơn plang song tơ gŭm pơ lei tơm Pleiku, dêh char Gia Lai kŭm hlôi jang hơ dai hăm rim anih jang kơ pal pơ gơ̆r lêh tơ lĕch jang plang song pham tơ gŭm ‘măng mă 1 sơ năm 2022. Hăm nơ̆r pơ ma  “Asong kơ toh pham ‘lơ̆ng - pơ jao tơ drong hơ mĕng”, jơ plang song pham tơ gŭm ‘măng âu đei hloh 300 ‘nu kang ƀô̆, bơ ngai jang kơ teh đak, bơ ngai jang, đoàn viên, bơ ngai jang lơ̆m khŭl, khŭl linh păng kon pơ lei lơ̆m pơ lei tơm Pleiku vang plang song. Mŏ Võ Thị Quỳnh Trâm, Phŏ Bí thư Đoàn phường Tây Sơn, pơ lei tơm Pleiku, tơ roi:

         “ Năr ‘nâu jĭ ‘măng mă 12 plang song pham đơ̆ng ĭnh, ĭnh lai yơ kŭm ‘meh tơ gŭm pham vă tơ gŭm đei bơ ngai nai lơ̆m mơ mat tat, krê hơ mơt. Kŭm ‘meh kiơ̆ đơ̆ng tơ drong jang plang song pham tơ gŭm lêh tơ lĕch jang ‘măng mă 1 âu đơ̆ng rŏng âu gô sơng đei lơ  đoàn viên hloh dơ̆ng kŭm nhen dôm bơ ngai đei jơ hngơ̆m đon ‘mêm mơ nat lơ hloh dơ̆ng. Lơ̆m tơ drong jĭ Covid ‘noh kơ dih kâu ĭnh hơ drol năm plang song pham hlôi  test covid kơ dih kŭm nhen vei sơ đơ̆ng dôm tơ drong pơ kăp 5k vă hoei kơ ƀơm ưh kơ ‘lơ̆ng truh tơ pôl.”

Kŭm lơ̆m khei 4 âu, Anih pơ gơ̆r jang krao hơ vơn plang song pham tơ gŭm dêh char Kon Tum hlôi pơ gơ̆r lêh tơ lĕch jang “ Năr đĭ đăng kon pơ lei plang song pham sơ năm 2022". Pơ ma tơ̆ lêh tơ lĕch jang, Phŏ kơ dră Anih vei lăng kon pơ lei dêh char Kon Tum Y Ngọc athei rim anih jang, khŭl jang păng kon pơ lei bơ ngơ̆t truh gĭt kăl, hơ drin vang jang kiơ̆ tơ drong jang ‘lơ̆ng hơ iă plang song pham dŏng bơ ngai. Lăp đơ̆ng rŏng kơ lêh tơ lĕch jang, đei hloh 300 tơ pu pham đei kon pơ lei dêh char Kon Tum plang song tơ gop lơ̆m “ Hơ nih mong pham” pơ yua ăn tơ drong jang kâp kư̆u păng hơ met ăn bơ ngai jĭ.

Thuem: Tơ blơ̆