VOV4.Bahnar - Mă đơ̆ng lơ̆m teh đak hlôi ƀet đei hloh 255 triệu kơ liêu vắc xin Covid 19 ăn kon pơ lei, mă lei kơ sô̆ ƀet jrŭm 3, jrŭm 4 tơ̆ bơ ngai đơ̆ng 18 sơ năm tơ̆ kơ pal, mă loi ‘noh jĭ kơ sô̆ ƀet 2 jrŭm vắc xin ăn hơ ioh 5 truh hơ la kơ 12 sơ năm đei tŏ sĕt, kơ sô̆ vắc xin dôm tơ ring chih măt đơ̆ng dang ei truh hơ tuch sơ năm tŏ sĕt hloh lơ pơ têng hăm kơ sô̆ kăl kơ ƀet. Tơ drong ‘nâu tŏk bŏk tơ lĕch dôm tơ drong kăl kơ hơ met pơ ‘lơ̆ng vă tŭn hrĕnh tơ drong ƀet tôm vắc xin tơ̆ hơ năp kơnh. ‘Nâu kŭm jing tơ drong tơm ‘măng hop akŏm trực tuyến tang găn jĭ đơ̆ng Anih tơm vei lăng găh jang pơ gang hăm 63 dêh char, pơ lei tơm pơ gơ̆r pơ gê ‘năr 25/8. Vă tŭn hrĕnh tơ drong ƀet bơ̆ng, PGS.TS Nguyễn Thị Liên Hương, Phŏ kơ dră Anih tơm vei lăng găh jang pơ gang tơ băt, Anih tơm tŏk bŏk athei Anih vei lăng găh jang pơ gang rim tơ ring jang hơ dai hăm Anih vei lăng găh pơ tho pơ hrăm tŭn hrĕnh tơ drong pơ gơ̆r ƀet kơ liêu hmă ăn kơ hơ ioh 5 truh hơ la kơ 12 sơ năm lơ̆m khei 8-9/2022 păng ƀet pơ klăm ăn bơ ngai 12 truh hơ la kơ 18 sơ năm đang lơ̆m jăl khei mă III/2022 hloi mưh hơ ioh năm tơ̆ hnam trưng hơ lơ̆k dơ̆ng. Pơ gơ̆r ƀet pơ klăm ăn bơ ngai đơ̆ng 18 sơ năm tơ̆ kơ pal, hơ tŏk tơ drong ƀet tôm jrŭm 3 iŏk đei hloh 90%.

Thuem: Tơ blơ̆