‘Nâu jĭ sơnăm mă 9 dêh char Gia Lai pơgơ̆r dôm tơdrong jang găh Trong yak ƀreu. Dôm ‘măng adrol ki, tơdrong plang song pham hơnơ̆ng đei lơ kon pơlei tơ̆ dêh char Gia Lai vang tơgŭm, kơsô̆ bơngai vang plang song pham roi đunh roi lơ păng tơpu pham iŏk đei sơnăm đơ̆ng rŏng lơ ƀiơ̆ kơ sơnăm adrol. Kiơ̆ Anih pơgơ̆r krao hơvơn plang song pơham dêh char Gia Lai, đơ̆ng blŭng sơnăm truh dang ei, lơ̆m dêh char pơgơ̆r đei 54 ‘măng plang song pham, iŏk đei hlŏh 10.400 tơpu pham.

Lơ̆m tơdrong jang Trong yak ƀreu ‘măng mă âu, Anih pơgơ̆r tơlĕch tơdrong hơgăt iŏk đei tŏ sĕt hlŏh 600 tơpu pham, pơm lăp ăn tơdrong khăm hơmet jĭ tơ̆ dôm hnam pơgang. Tơ̆ tơdrong jang ‘nâu, Anih pơgơ̆r krao hơvơn plang song pham Gia Lai hơpăh Hla ar hôn bơnê ăn 17 khul grŭp, 3 unh hnam păng 25 ‘nu bơngai jang ‘lơ̆ng lơ̆m tơdrong plang song pham sơnăm 2023 -2024.