Atŭm hăm rim tơring lơ̆m teh đak, dêh char Ninh Bình ‘nŏh mĭnh lơ̆m dôm dêh char đei vă jê̆ 100 tơdrong pơgơ̆r pơm lêh tih iĕ đei pơgơ̆r lơ̆m khei ‘năr blŭng pơyan puih mak. Lơ̆m au, đei tơdrong pơgơ̆r Pơm lêh gĭt kăl, hpơvơn đei lơ tơmoi tơmang pơhiơ̆. Ƀok Phùng Văn Giang, Kơ iĕng Kơdră chĕp pơgơ̆r Dơnŏ anih vei lăng rơgoh tơmam drăm sa dêh char Ninh Bình tơbăt: pơyan pơm lêh sơnăm 2023, Dơnŏ anih chep pơgơ̆r vei lăng rơgoh tơmam drăm sa kơ dêh char Ninh Bình hlôi pơjing trong jang dăr lăng, vei lăng tơmam drăm sa, rơgoh ‘lơ̆ng tơmam drăm sa lơ̆m prăt pơyan pơmlêh:“Mă blŭng ‘nŏh akŏm rim kmăi kmŏk păng trong jang pơrô̆ pơrôp pơtho tơbăt rim tơdrong tơchơ̆t đơ̆ng Teh đak găh sơđơ̆ng rơgoh tơmam drăm sa păng tĕch mơdro. Păng pơtho tơbăt ăn kon pơlei rơih trong vei lăng năng tông tơmam drăm mă rơgoh ‘lơ̆ng; Akŏm lơ̆m rim tơmam drăm tĕch răt lơ lơ̆m pơyan pơm lêh. Đơ̆ng năr 15/12/2022 truh năr 15/3/2023 ‘nŏh rim hơnih bơ̆ jang lơ̆m dêh char jei iung jang pơtho tơbăt găh rơgoh tơmam drăm sa păng rim khul jang dar lăng kơ rim hơnih bơ̆ jang, dăr lăng găh sơđơ̆ng rơgoh tơmam drăm sa vă kơ ƀôh păng xek tơlang tơtom dôm tơdrong pơm glăi găh sơđơ̆ng rơgoh tơmam drăm sa”.

Pơm lêh Chùa Hương tơ̆ tơring Hương Sơn, apŭng Mỹ Đức, pơlei tơm Hà Nội jing năr lêh pơgơ̆r lơ̆m khei ‘năr đunh hloh, truh 3 khei. Ƀok Nguyễn Bá Hiển, Kơdră chĕp pơgơ̆r Hơnih vei lăng Hơnih gru gra gĭt kăl tơmang pơ hiơ̆ Hương Sơn  tơbăt: Hlôi pơjing khul bơ̆ jang dăr lăng găh sơđơ̆ng rơgoh tơmam drăm sa păng xek tơlang hloi rim bơngai pơm glăi tơdrong tơchơ̆t.“Nhôn hlôi pơjing Khul jang dăr lăng, lơ̆m au đei Hơnih vei lăng Tơdrong jang pơgang, hơnih jang veilăng mơdro sa păng rim hơnih jang atŭm hăm kơdră chĕp pơgơ̆r tơring vă akŏm pơtho tơbăt ăn kon pơlei, đei ‘măng xek tơlang hloi dôm bơngai pơrơ̆ng pơm glăi, ư̆h kơ pơm kiơ̆ tơdrong tơchơ̆t đơ̆ng Hơnih chĕp pơgơ̆r pơm lêh Chùa Hương lơ̆m tơdrong sơđơ̆ng rơgoh tơmam drăm sa adoi nhen kơjă tơbăt hơdăh tơ̆ hơnih tĕch mơdro”.

Kiơ̆ trong pơprŏ vă iung jang Kơtang “Atŏk kơtang dăr lăng, lăng hơlen păng tang găn dôm tơmam drăm sa ưh rơgoh lơ̆m pơyan pơm lêh 2023”, Hơnih tơm Vei lăng hơnih mơdro sa pơrô̆ athei Hơnih vei lăng Mơdro sa rim dêh char, pơlei tơm iung jang hơdoi hăm rim khul bơ̆ jang năm dăr lăng, lăng hơlen hơnơ̆ng tơ̆ rim hnam mong răk, anih akŏm tơmam drăm tơjê̆ sơlam teh đak, rim hơnih tơm mơdro sa, siu thĭ, kơchơ tơm, hnam mong răk tơmam drăm pơkrot, rim hơnih răt tơmơt tơmam drăm đơ̆ng teh đak đe, ... adoi athei xek tơlang kơhret hăm tơmam drăm ư̆h kơbăt hơnih ayơ pơm tơlĕch vă tang găn tơmam drăm sa kơnê̆, ‘mê̆ ‘mach, ư̆h rơgoh. Ƀok Nguyễn Đức Lê, Kơ iĕng Kơdră chĕp pơgơ̆r Hơnih joăt jang găh Hơnih tơm Vei lăng tĕch mơdro tơbăt:“Nhôn bơ̆ jang tơplih đơ̆ng dăr lăng hơdrol jing dăr lăng đơ̆ng rŏng pơm tơlĕch, vă rim hơnih pơm tơlĕch, răt tơmơ̆t tơmam drăm đơ̆ng teh đak đe, tĕch mơdro rim tơmam drăm sa, tĕnh koăng hơnhăk tơmam drăm bơ̆n chă tĕch mơdro ăn bơngai răt yua. Mă lei, dăr lăng đơ̆ng rŏng pơm tơlĕch mư̆h nhôn ƀôh đei tơdrong pơm glăi dăh mă dôm tơmam drăm sa pơm glăi lei lơ̆m mă noh hlôi tĕch tơlĕch tôch kơ lơ bơih. Tơdrong iŏk tơvih adoi nhen hơmet pơ ‘lơ̆ng gô tơƀơ̆p tôch tơnap tap. Mă kăl hlŏh ‘nŏh lơ̆m mă noh, bơngai răt yua mư̆h chă răt sa dôm tơmam drăm ‘mê̆, ư̆h rơgŏh ‘lơ̆ng lei jei pơm kơnê̆ trŭh jơhngơ̆m jăn, kơ yuơ băt hơdăh tơdrong au kơna Hơnih chĕp pơgơ̆r Vei lăng tơmam drăm sa hơnơ̆ng tơlĕch jang kơtang iung tơjră tang găn rim tơdrong pơm glăi lơ̆m sơđơ̆ng rơgoh tơmam drăm sa ‘nŏh tơdrong kăl hlŏh...”.

Hơnih chĕp pơgơ̆r Trung ương găh sơđơ̆ng rơgoh tơmam drăm sa pơma hơdăh: pơyan pơm lêh sơnăm 2023 jĭ tôch gĭt kăl kơ yuơ khei ‘năr hơmet pơ ‘lơ̆ng đơ̆ng rŏng jĭ hơbuh. Kơ yuơ lơ loh, rim Hơnih tơm, hơnih bơ̆ jang, tơring tơrang, khŭl bơ̆ jang, Khul dăr lăng kăl iung jang hơdoi kơjăp, atŏk kơtang bơ̆ jang dăr lăng, bơ̆ jang ‘lơ̆ng lơ̆m dăr lăng hăm rim tơmam drăm răt tơmơ̆t đơ̆ng teh đak đe. Kiơ̆ kơ ‘noh, hơnơ̆ng đei trong bơ̆ jang hơdăh, vă pơtrŭt kơtang rim tơmam drăm rơgoh ‘lơ̆ng lơ̆m tơdrong tĕch mơdro. Mă kăl, tơmam drăm sa kăl tơbăt hơdăh mă hơdăh, trŏ ƀlep găh vei lăng sơđơ̆ng rơgoh tơmam drăm sa lơ̆m rim trang mạng tơpôl. Bơ̆ jang dăr lăng, lăng hơlen, pơrô̆ pơrôp, pơtho tơbăt găh sơđơ̆ng rơgŏh tơmam drăm sa kăl atŏk kơtang, hơnơ̆ng vă atŏk jơhngơ̆m đon kơchăng jang kiơ̆ khôi luơ̆t kơjăp kơ bơngai pơm tơlĕch, lĕch mơdro tơmam drăm sa, vei ăng năng tông ăn bơngai răt yua lơ̆m jơ ‘năr tơmang pơ hiơ̆.