Truh năr 23/10 lơ̆m kơpal teh hlôi băt đei 628 rơtuh rơtuh bơngai ƀơm jĭ COVID-19, lơ̆m noh đei hloh 6,5 rơtuh bơngai lôch kơyuơ ƀơm jĭ COVID-19. Lơ teh đak pơtoi băt ƀôh dôm tơdrong tơplih yŏng ‘nao đơ̆ng virus SARS CoV-2 hăm tơdrong tơpoh tenh pran hloh pơtêng hăm dôm yŏng tơplih adrol kơ noh.

Bơngai jĭ Covid 19 oei hơmet  jĭ tơ̆ Hnam pơgang tơm tơring Tây Nguyên

Kiơ̆ tiên sih Fahad Razak, bơngai juăt jang Canada găh pơrang jĭ COVID-19 ăn tơbăt, dôm tơplih yŏng đơ̆ng virus corona hơnơ̆ng kơ đei lơ̆m pơyan hla ruih păng pơyan puih, pơm ăn bơngai ƀơm jĭ păng lôch răm tŏk lơ. Păng tơdrong mă âu đei ƀôh dơ̆ng lơ̆m xơnăm âu. Tiên sih Fahad Razak ră hơdăh, mưh bơ̆n ưh đei ƀôh lơ tơdrong tơpoh ‘nao lơ̆m khei tơm hơbuh jĭ COVID-19, noh rim bơngai juăt jang pơtơm gơh tơchơ̆t pơrang jĭ pă đei hơbuh hli ăh pơyan puih kơnh.

Vă pơtoi dôm tơdrong adrin hơtŏk tơjră pơrang jĭ COVID-19 tŏk bŏk ăh jăl  “hăt hot”, WHO tơlĕch 6 pơkăp ăn dôm teh đak vang jang. Adrol hloh noh tơlĕch ƀet pơgang tôm ăn 100% khul pơm bơngai ƀônh tơpoh jĭ. Mă ƀả noh pơtoi iŏk hơlen pham păng hơlen tơplih gen virus vă băt tơdrong tơplih yŏng, akŏm tơdrong hơlen păng xet ngĭm SARS-CoV-2 hăm dôm tơdrong jĭ găh trong dui jơhngơ̆m nai, đei pơlŏ hơdrap hơkuk. Mă 3 noh vei xơđơ̆ng tơdrong vei lăng bơngai ƀơm jĭ COVID-19, akŏm dôm tơdrong vei lăng jơhngơ̆m jăn mă blŭng; chih akŏm tơlĕch tơdrong jang ăn dôm tơdrong ƀôh hơbuh jĭ hơmet tômt ơmam drăm kăl păng bơngai jang. Mă 4 noh pơtoi dôm trong tang găn păng hơlen tơpoh tơ̆ dôm anih jang y tê̆. Pơtoi kơ noh, rim Khul kơpal teh đak athei pơma dơnuh mă hơdăh hăm kon pơlei găh rim tơdrong tơplih yơ lơ̆m pơkăp tang găn păng tơjră pơrang jĭ COVID-19.

Pơkăp 2K tang găn păng tơjră pơrang  jĭ Covid19 lơ̆m pơkăp jang ‘nao

Tơ̆ Việt Nam, chih akŏm đơ̆ng Anih tơm y tê̆, đơ̆ng blŭng khei 10 truh năr  24/10, Việt Nam xơkơ̆t đei jê̆ 22 rơbâu ‘nu ƀơm jĭ COVID-19 ‘nao, minh năr ve jê̆ truh 1 rơbâu ‘nu, tơjur hloh tong anê̆ pơtêng hăm khei 9. Jô̆ truh năr 23/10 jâ̆p teh đak hlôi ƀet đei jê̆ 262 rơtuh kơliu vaccine bơ̆ng jĭ COVID-19.

Pơma pơgơ̆r Hop akŏm hơtŏk tang găn păng tơjră pơrang jĭ păng tơdrong ƀet vaccine bơ̆ng jĭ  COVID-19 pơgơ̆r ăh năr 20/10 âu ki, Thư̆ trưởng Anih tơm Y tê̆ Nguyễn Thị Liên Hương pơkăl dôm tơring pơtoi tơrĕk tơlĕch dôm trong jang tang găn păng tơjră pơrang jĭ kiơ̆ pơgơ̆r đơ̆gn Khul Kơpal teh đak, Thủ tướng teh đak păng kiơ̆ pơtho đơ̆ng Anih tơm Y tê̆, rim anih jang đei tơrĕk. Pơm kiơ̆ kơjăp, drơ̆ng minh dôm trong tang găn păng tơjră pơrang jĭ; mă kăl pơtoi hơtŏk tenh ƀet vaccine bơ̆ng jĭ COVID-19, chih akŏm tôm tơdrong akŏm ƀet lơ̆m kơmăi akŏm ƀet bơ̆ng jĭ păng tơroi tơbang hơtŏk xơnong jang, tơdrong hlôh vao đơ̆ng kon pơlei, tơpôl... mă hăt noh ăh pơyan puih phang tŏk bŏk jê̆ truh, khei năr ƀônh hăm tơdrong tơpoh hơtŏk bơngai ƀơm jĭ păng mơ̆t ƀĭch hnam pơgang.

Tơ̆ Đăk Lăk, pơrang jĭ COVID-19 lơ̆m khei 10 ƀôh tơjủ găh kơsô̆ bơngai ƀơm jĭ. Jô̆ truh năr 24/10 dêh char băt đei jê̆ 200 ‘nu ƀơm jĭ, tơjur hloh tong anê̆ pơtêng hăm khei 9. Tơrĕk hloh noh, đei minh ƀả năr lơ̆m khei 10, Đăk Lăk ưh đei bơngai ayơ ƀơm jĭ COVID-19. Mă lei, khei 10 dêh char adoi đei 2 ‘nu lôch hơchăng kơyua jĭ COVID-19, pơđĭ 2 ‘nu jĭ âu noh ‘lŏ sơnăm, đei lơ tơdrong jĭ lơ̆m hơkâu jăn păng tam mă đei ƀet vaccine bơ̆ng jĭ COVID-19.

Tơdrong ƀet vaccine bơ̆ng jĭ COVID-19 adoi đei anih jang y tê̆ Đăk Lăk tơlĕch jang tơnăp lơ̆m khei 10. Jô̆ truh năr 20/10, Đăk Lăk hlôi vei xơđơ̆ng đei ƀet ‘măng mă 1 mă 2 ăn dôm bơngai đơ̆ng 12 tŏk tơ̆ kơpal. ‘Măng mă 3 ăn bơngai 18 xơnăm tŏk tơ̆ kơpal đei 87,2% păng ‘măng mă 4 đei hloh 70%. Ƀet ‘măng mă 3 ăn dôm bơngai đơ̆ng 12 xơnăm tŏk tơ̆ kơpal đei jê̆ 75%. Đăk Lăk duh hlôi ƀet ‘măng mă  1 ăn hơ ioh đơ̆ng 5 truh 11 xơnăm păng ‘măng 2 ăn khul bơngai âu adoi đei jê̆ 56%. Dêh char pơtoi jang kiơ̆ dôm trong tang găn păng tơjră pơrang jĭ COVID-19 hăm 03 tơdrong tơm noh: xet ngĭm, pơkăp oei adrô̆, hơmet jĭ. Atŭm hăm noh pơkăl dôm anih jang, jơnŭm tơpôl, rim anih jang păng kon pơlei atŭm băl pơm jang, pơtoi pơm kiơ̆ kơjăp pơkăp 2K păng pơm kiơ̆ kơjăp dôm tơchơ̆t găh tang găn păng tơjră pơrang jĭ Covid-19 lơ̆m pơkăp jang ‘nao đơ̆ng anih jang y tê̆ dôm jăl jang.