Dôm năr âu, tơ̆ dôm phường Khánh Xuân, Thành Nhất, Tân Hòa păng xăh Hòa Thuận, khŭl jang pơgang pơlei tơm Buôn Ma Thuột, dêh char Đắk Lắk tŏk bŏk akŏm jơhngơ̆m vă pruih pơgang pơlôch mur (hơngĕnh) tang găn tơdrong tơpoh lanh đơ̆ng jĭ pơlŏ lĕch đe lơ̆m tơring.

Oei hơdai hăm kang ƀô̆ jang pơgang năm pruih pơgang tơ̆ hơnih jĭ ‘nao đei ƀôh tơ̆ phường Thành Nhất, mŏ Đỗ Thục Vi, vei lăng tơdrong jang tang găn jĭ đơ̆ng Hnam pơgang phường Thành Nhất tơbăt, tơdrong kon pơlei tam mă pơm kiơ̆ tơdrong hơgăt găh tang găn jĭ pơlŏ lĕch đe ‘noh jĭ tơdrong tơm pơm ăn hơnih jĭ đei ƀôh: “Kiơ̆ đơ̆ng ŭnh hnam đei jĭ pơlŏ lĕch đe ‘nâu ‘noh ƀôh akhan kon pơlei băt hlôh vao tŏ sĕt găh pơm rơgoh cham char jum dăr. Ĭnh hlôi jang hơdai hăm khŭl jang pơgang tơring năm pơtho pơm rơgoh cham char, pơm rơgoh hnam oei mă loi ‘noh jĭ lơ̆m pơyan ‘mi, gô pơm ăn jĭ pơlŏ lĕch đe tôch kơ lơ.”

Hơnih jĭ pơlŏ lĕch đe âu đei chă ƀôh lơ̆m ‘năr 19/6 âu ki tơ̆ ŭnh hnam mŏ Lê Thị Thuận, trong Nguyễn Phúc Chu, phường Thành Nhất, hăm 3 ‘nu lơ̆m ŭnh hnam đei jĭ. Kiơ̆ kơ nơ̆r mŏ Thuận, 3 ‘nu mĕ kon sư đei ƀôh yuh dêh, chă hơmet kơdih tơ̆ hnam ưh kơ klăih kơna athei ƀĭch tơ̆ hnam pơgang: “Đĭ đăng athei năm tơ̆ hnam pơgang, đe pơlong lăng pham akhan đei jĭ pơlŏ lĕch đe. Tơdrong jĭ âu krê hơmơt yua kơ yuh dêh, oei lĕch pham tơ lơ̆m dơ̆ng. Đơ̆ng rŏng klăih kơ jĭ brŏk tơ̆ hnam ĭnh kŭm hơmet ‘yâu hnam oei, hơnih hơ yơ đei đak  ‘noh ĭnh kơ sŭp lê̆, ĭnh ưh kơ lê̆ đak tơ̆ng vă hoei kơ đei mur chek lar.”

Jĭ 1 lơ̆m 3 tơring chih iŏk kơ sô̆ bơngai jĭ pơlŏ lĕch đe lơ hloh lơ̆m dêh char Đắk Lắk, hăm 84 ‘nu, Hnam pơgang pơlei tơm Buôn Ma Thuột tŏk bŏk athei Hnam pơgang xăh, phường hơmet ‘lơ̆ng dôm hơnih đei jĭ ưh kơ lê̆ jĭ đei ƀôh lanh să. Hơdai hăm, hơtŏk loi dơ̆ng hơlen lăng, dăr lăng kơjăp tơdrong jĭ, akŏm lơ̆m dôm hơnih đei jĭ so, đei hơmơt kơ đei jĭ vă chă ƀôh dôm bơngai jĭ plơ̆ng.

Kiơ̆ kơ ƀok Võ Minh Hùng, Kơdră vei lăng Hnam pơgang pơlei tơm Buôn Ma Thuột, jĭ pơlŏ lĕch đe tŏk bŏk đei ƀôh krê hơmơt ƀơ̆t kơsô̆ bơngai jĭ pơlŏ lĕch đe lơ̆m khei 6 đei 50% akŏp kơsô̆ bơngai jĭ đơ̆ng blŭng sơnăm truh dang ei. Kăl kơ lăng truh, hlôi chih iŏk 2 hơnih jĭ tơ̆ phường Thành Nhất păng phường Khánh Xuân. “Truh khei ‘năr dang ei lơ̆m pơlei tơm ‘noh vă đĭ đăng dôm xăh, phường hlôi tơlĕch jang tơdrong jang pơm rơgoh cham char păng Hnam pơgang pơlei tơm hlôi pơjing trong tơlĕch jang pruih pơgang ăn 2 xăh  phường đei kơsô̆ bơngai jĭ pơlŏ lĕch đe lơ̆m dang 3 sơnăm âu ki lơ ‘noh xăh Hòa Thuận păng phường Tân Hòa, nhôn tơlĕch jang đơ̆ng giĕng hơdrol păng gô pơtôch lơ̆m giĕng ‘nâu.”

Kiơ̆ tơroi tơbăt đơ̆ng Anih vei lăng tơdrong jĭ jăn dêh char Đắk Lắk, truh hơtuch khei 6, lơ̆m dêh char chih iŏk 408 ‘nu jĭ pơlŏ lĕch đe. Jĭ đei ƀôh tơ̆ đĭ đăng 15/15 apŭng, thĭ xăh, pơlei tơm. Ƀok Hoàng Hải Phúc, Kơdră Anih vei lăng tơdrong jĭ jăn dêh char Đắk Lắk tơbăt, tơdrong jang tang găn jĭ pơlŏ lĕch đe tŏk bŏk đei anih jang pơgang hăt hot tơlĕch jang: “Anih vei lăng găh tơdrong jang pơgang athei Anih vei lăng tơdrong jĭ jăn dêh char athei hơtŏk loi dơ̆ng tơroi tơbăt lơ̆m Năr puăn rim giĕng. Hơdai hăm athei Hnam pơgang Đa khoe tơring păng dôm hnam pơgang Đa khoa lơ̆m dêh char athei tơroi tơbăt hla ar chih tơdrong jĭ lơ̆m năr puăn rim giĕng vă đe ƀak si ‘nao gơh băt đei tơdrong tơchơ̆t găh hơlen lăng hơmet jĭ pơlŏ lĕch đe ‘nao hloh. Hơdai hăm ‘noh nhôn hlôi hơtŏk loi dơ̆ng roi tơbăt vă tơroi ăn kon pơlei athei oei sa rơgoh, chong pơ ‘ngoăh râm rĕk, pơm rơgoh cham char, pơm rơgoh hnam oei rim năr păng mưh đei ƀôh yuh athei năm hloi tơ̆ hnam pơgang.”

 Tơ̆ Gia Lai, Anih vei lăng tơdrong jĭ jăn dêh char tơbăt, jĭ pơlŏ lĕch đe hlôi đei ƀôh tơ̆ đĭ đăng 17 apŭng, thĭ xăh, pơlei tơm hăm vă jê̆ 600 ‘nu bơngai jĭ. Dôm hơnih đei kơsô̆ bơngai jĭ lơ ‘noh pơlei tơm Pleiku, dôm apŭng Krông Pa, Kông Chro, Đắk Pơ. Đơ̆ng blŭng sơnăm truh dang ei, dêh char Gia Lai chih iŏk 312 hơnih jĭ, lơ̆m noh 35 hơnih jĭ tam mă đei tang găn đĭ. Kiơ̆ kơ anih jang pơgang Gia Lai, dôm bơngai jĭ pơlŏ lĕch đe tŏk lơ đơ̆ng khei 5 păng pơdui đunh truh dang ei yua kơ lơ̆m pơyan ‘mi ‘noh tơdrong hiôk ăn kơ mur chek lar.

Jĭ pơlŏ lĕch đe gô hơnơ̆ng kơ tŏk lơ păng đei ƀôh krê hơmơt tơ̆ hơnăp kơnh mưh ‘mi lơ, ‘năr hngôm, ‘noh jĭ hơnih hiôk vă klanh, mur măih chek lar. Ƀok Nguyễn Văn Đồng, Phŏ Kơdră vei lăng tơdrong jĭ jăn dêh char Gia Lai tơbăt: “Anih jang hơdai hăm dôm apŭng hơtŏk loi dơ̆ng pruih tong pơgang vă tang găn hơnih đei jĭ pơlŏ lĕch đe. Jang hơdai hăm hnam pơgang tơlĕch jang hơmet ‘lơ̆ng, vei lăng bơngai jĭ. Pơtho kon pơlei, mă loi ‘noh tơ̆ dôm xăh đei hơnih jĭ pơm rơgoh cham char vă tang găn klanh, mur măih chek lar”.

Tây nguyên tŏk bŏk mơ̆t lơ̆m pơyan ‘mi, pơyan hiôk ăn kơ jĭ pơlŏ lĕch đe tŏk lơ păng gô đei ƀôh tơ̆ jơ̆p jang. Vă vei lăng jĭ pơlŏ lĕch đe, kŭm hăm tơdrong mơ̆t jang đơ̆ng dôm anih jang kơpal, rim ‘nu kon pơlei kăl kơ hơtŏk đon băt kơchăng tang găn. Mă hơdrol ‘noh chong pơ ‘ngoăih râm rĕk, hơmet ‘yâu dôm hơnih đak tơ̆ng vă tang găn mur, klanh chek lar.