VOV4.Bahnar - Khei ‘năr âu ki, dôm dêh char lơ̆m tơ ring Tây Nguyên hlôi tŭn pran tơ drong ƀet bơ̆ng Covid-19, lơ̆m noh tôch bơ ngơ̆t truh sơ năm đơ̆ng 5 truh hơ la kơ 12 sơ năm, ƀơ̆t đe oh yak mơ̆t lơ̆m sơ năm hŏk ‘nao.

Dak Lak jĭ dêh char đei kơ sô̆ ƀet vaccine bơ̆ng jĭ COVID-19 ăn hơ ioh đơ̆ng 5 truh hơ la kơ 17 sơ năm tơ̆ Dak Lak oei đei tŏ sĕt. Kiơ̆ kơ ƀok Hoàng Hải Phúc, Phŏ kơ dră vei lăng Anih vei lăng tơ drong jĭ jăn dêh char Dak Lak, tơ drong tơm pơm ăn kơ sô̆ ƀet vaccine bơ̆ng COVID-19 tơ̆ grŭp sơ năm âu đei tŏ sĕt ‘noh jĭ yua đơ̆ng tam mă iŏk đei tơ drong drơ̆ng lăp đơ̆ng đe mĕ ƀă. Lơ bơ ngai akhan vaccine đei lơ tơ drong pơm ăn ưh kơ ‘lơ̆ng truh jơ hngơ̆m pran păng tơ drong hŏk ƀai ưh kơ ƀlŏk đơ̆ng đe mon...  Hơ dai hăm ‘noh, yua đơ̆ng jĭ COVID -19 hlôi dă ƀiơ̆ kơ na lơ mĕ ƀă đei đon tơ chĕng pơm pơ hơi. Vă pơ trŭt hơ tŏk kơ sô̆ ƀet vaccine ăn hơ ioh đơ̆ng 5 truh hơ la kơ 17 sơ năm, anih jang pơ gang gô tŭn pran tơ drong jang hơ dai hăm Anih vei lăng pơ tho pơ hrăm dêh char vă tơ roi tơ băt, krao hơ vơn mĕ ƀă ba kon truh tơ̆ dôm hơ nih ƀet, vă vei sơ đơ̆ng ưh kơ đei jĭ lơ̆m tơ pôl, veh ver hơ mơt đei ƀôh jĭ tơ̆ dôm hnam trưng hŏk lơ̆m sơ năm hŏk ‘nao.

        “Hăm hơ ioh đơ̆ng 5 truh 12 sơ năm ‘noh athei jang hơ dai hăm Anih vei lăng pơ tho pơ hrăm vă pơm liơ thây kô pơ tho, hnam trưng krao hơ vơn tơ roi tơ băt ăn hŏk tro, ăn mĕ ƀă hlôh ‘nâu jĭ tơ drong đei yua, jĭ hơ năp jang đơ̆ng rim hŏk tro, rim mĕ ƀă vă pơm tơ liơ ưh kơ jĭ lơ̆m tơ pôl. Tơ dăh ưh kơ đei tơ drong pran lơ̆m tơ pôl ‘noh tơ̆ hơ năp pơ rang tơ plih BA.4, BA.5 gô mơ̆t lơ̆m Dak Lak lai yơ kŭm đei. Tơ dăh ưh kơ đei tơ drong pran lơ̆m tơ pôl ‘noh hơ mơt kơ jĭ COVID hơ lơ̆k dơ̆ng ‘noh tơ drong pă jor gô đei ƀôh.”

Dak Lak tŭn hrĕnh tơ drong ƀet vắc-xin Covid19

            Vă hơ met ming tơ drong pơm pơ hơi, ưh kơ ‘lơ ‘lŏ lơ̆m tơ drong jang tang găn jĭ Covid-19, khei ‘năr âu ki, dêh char Lâm Đồng hlôi hơ drin tơ lĕch jang kiơ̆ lơ trong jang, mă loi ‘noh jĭ tŭn pran tơ drong ƀet bơ̆ng ăn kơ hŏk tro ƀơ̆t sơ năm hŏk ‘nao hlôi pơ tơm. Vă tơ drong jang tang găn jĭ Covid-19 iŏk đei jơ nei ‘lơ̆ng, hơ tŏk kơ sô̆ bơ ngai vang ƀet bơ̆ng, dêh char Lâm Đồng tŏk bŏk tơ lĕch jang tơ drong ƀet bơ̆ng vắc xin Covid-19 lơ̆m dêh char, lơ̆m noh, akŏm tơ gŭm hơ drol ƀet đang jrŭm 3 ăn kơ hŏk tro đơ̆ng 12 truh hơ la kơ 18 sơ năm hơ drol yak mơ̆t lơ̆m sơ năm hŏk ‘nao 2022­-2023. Lăp ƀơ̆t tơ drong jang đei tơ lĕch jang hlôi sơng đei lơ hŏk tro truh tơ̆ dôm hơ nih ƀet kiơ̆ roi tơ băt đơ̆ng anih jang pơ gang. Oh Trần Thanh Vy, hŏk tro hnam trưng hŏk jăl 2 Lộc Sơn, pơ lei tơm Bảo Lộc, tơ roi:

        “Mon hlôi hơ met jơ năr păng truh tơ̆ hơ nih ƀet ƀlep jơ, ƀlep năr. ‘Ngoăih kơ ‘noh, mon oei krao hơ vơn bôl buăl vang năm ƀet, vang pơm kiơ̆ ƀlep dôm tơ drong kiơ teh đak rơ roi ăn vă tang găn jĭ Covid-19”.

Vă tŭn pran tơ drong ƀet vắc xin, ‘nao âu, Anih vei lăng kon pơ lei dêh char Dak Nông pơ gơ̆r Lêh “ Tơ lĕch jang ƀet bơ̆ng vắc xin Covid-19” sơ năm 2022. Mă đơ̆ng hlôi đei hloh 87% kơ sô̆ kon pơ lei hloh 18 sơ năm tơ̆ Dak Nông đei ƀet 3 jrŭm vắc xin tang găn jĭ covid 19, dơ̆ng mă 6 lơ̆m teh đak, mă lei tơ drong ƀet vắc xin Covid-19 tơ̆ lơ tơ ring tơ̆ Dak Nông tŏk bŏk đei ƀôh pơ dơh hê̆, mă loi ‘noh jĭ ƀet jrŭm 2 ăn hơ ioh đơ̆ng 5 sơ năm truh hơ la kơ 12 sơ năm, jrŭm 3 ăn hơ ioh đơ̆ng 12 sơ năm truh hơ la kơ 18 sơ năm. Tơ̆ hơ năp tơ drong ‘noh, Anih vei lăng kon pơ lei dêh char Dak Nông athei rim anih jang tơ ring lơ̆m dêh char hơ tŏk ‘lơ̆ng jơ hngơ̆m đon jang tơ năp, akŏm pơ gang, bơ ngai jang, jên tŭn hrĕnh tơ drong ƀet bơ̆ng tôm jrŭm ăn hơ ioh đơ̆ng 5 sơ năm truh hơ la kơ 12 sơ năm; hơ drin jang đang hrôih hloh tơ drong ƀet jrŭm 4 ăn kon pơ lei đơ̆ng 18 sơ năm tơ̆ kơ pal păng tŭn hrĕnh ƀet jrŭm 3 ăn bơ ngai đơ̆ng 12 sơ năm truh hơ la kơ 18 sơ năm kiơ̆ pơ tho đơ̆ng Anih tơm vei lăng jang pơ gang. Ƀok Nguyễn Văn Toàn  - Kơ dră chĕp kơ̆l Anih vei lăng găh pơ tho pơ hrăm Dak Nông tơ băt, tơ drong pơ gơ̆r Lêh “ Tơ lĕch jang ƀet bơ̆ng vắc xin Covid-19” lơ̆m khei ‘năr sơ năm hŏk ‘nao pơ tơm đei tơ drong tôch kơ ‘lơ̆ng, păng hŏk tro rim jăl ‘noh jĭ bơ ngai đei bơ ngơ̆t truh hloh.

        “Vă hơ met ăn sơ năm hŏk ‘nao ‘noh Anih vei lăng găh jang pơ gang hlôi jang hơ dai hăm Anih vei lăng găh pơ tho pơ hrăm tơ lĕch trong vă jang, đơ̆ng dang ei ding truh ƀơ̆t pơ gơ̆r mơ̆t hŏk blŭng ‘noh hơ tŏk loi dơ̆ng ƀet vắc xin ăn đe mon lơ̆m sơ năm ƀet. Lơ̆m noh ‘noh jang hơ dai hăm băl vă jang kiơ̆ dôm trong jang vă tang găn lơ kơ loăi jĭ jăn mă loi ‘noh jĭ pơ lŏ lĕch đe. Tơ drong tơm ‘nâu dang ei hlôi đei pơ gơ̆r đơ̆ng Anih jang ding truh tơ̆ 2 anih jang păng dôm khŭl jang đei ƀơm truh, mă loi ‘noh jĭ Anih vei lăng kon pơ lei apŭng, pơ lei tơm vă jang kiơ̆ tơ drong ‘nâu, păng chih jô̆ hơ len dôm tơ drong hơ găt. Dôm phường, xã, thị trấn mă đei kơ sô̆ mă vắc xin ƀet bơ̆ng tŏ sĕt ‘noh kăl kơ lăng truh vă iŏk đei tơ drong hơ găt mă khŭl kơ dră teh đak tơ chơ̆t.”

Dak Nông pơ gơ̆r lêh “ Tơ lĕch jang ƀet bơ̆ng vắc xin Covid-19”

            Lei lăi thoi noh, anih jang kơ pal dêh char Gia Lai kŭm tŏk bŏk tơ lĕch jang lơ trong jang vă hơ nơ̆ng hơ tŏk lơ kơ sô̆ ƀet vaccine COVID-19 ăn hơ ioh đơ̆ng 5 truh hơ la kơ 12 sơ năm. Ƀok Đinh Hà Nam- Phŏ Kơ dră chĕp kơ̆l Anih vei lăng tơ drong jang pơ gang Gia Lai tơ băt, vă hơ nơ̆ng hơ tŏk lơ kơ sô̆ ƀet vaccine COVID-19 ăn grŭp sơ năm âu, dêh char Gia Lai hlôi păng tŏk bŏk hơ drin tơ lĕch jang lơ trong jang nhen: jang hơ dai kơ jăp hăm anih jang tơ roi tơ băt, anih jang pơ tho pơ hrăm lơ̆m tơ roi tơ băt, krao hơ vơn mĕ ƀă hŏk tro; hơ tŏk loi dơ̆ng hơ len lăng, dăr lăng, athei tơ lĕch jang ƀet bơ̆ng đơ̆ng tơ ring. Ƀok Nam tơ băt, hrei ‘nâu, rim năr dêh char Gia Lai oei đei hloh jĭt ‘nu jĭ COVID-19. Yua thoi noh, anih jang pơ gang tơ tă kơ mĕ ƀă, kăl kơ ăn hơ ioh ƀet bơ̆ng tôm vă vei sơ đơ̆ng tơ drong pran ăn kơ kon oh, mă loi ‘noh jĭ hơ drol kơ sơ năm hŏk tŏk bŏk vă jê̆:

         “Truh tơ̆ ŭnh hnam krao, krao điên thoăi ăn kơ mĕ ƀă chơ đe mon truh tơ̆ hơ nih ƀet. Tơ̆ hơ năp kơnh, tơ drong jang tơ roi tơ băt oei jing kăl hloh. Gĭt kăl hloh ‘noh jĭ anih pơ gơ̆r jang kơ tơ ring, kơ xăh, phường, thị trấn kŭm hăm dôm hnam trưng krao hơ vơn sơ năm âu năm ƀet. Anih jang pơ gang nhôn lai yơ kŭm pơ̆ih hơ nih ƀet tơ̆ dôm hnam pơ gang xăh, gô vă pơih dơ̆ng hơ nih năm ƀet truh tơ̆ pơ lei, pơ la. ‘Meh vă tih hloh đơ̆ng nhôn ‘noh jĭ mĕ ƀă ăn kon oh bơ̆n năm ƀet vă vei sơ đơ̆ng tơ drong pran ăn kơ dih kâu păng tơ pôl”.

            Hăm lơ trong jang pha ra băl, khŭl kơ dră păng anih jang kơ pal tơ̆ dôm dêh char lơ̆m tơ ring Tây Nguyên hlôi păng tŏk bŏk tŭn hrĕnh tơ drong ƀet vaccine COVID-19 ăn dôm sơ năm pha ra băl, lơ̆m noh tôch kơ bơ ngơ̆t truh hơ ioh, ƀơ̆t sơ năm hŏk ‘nao hlôi pơ tơm.

VOV Tây Nguyên

            Thuem: Tơ blơ̆