VOV4.Bahnar - Kiơ̆ chih jô̆ đơ̆ng Anih tơm vei lăng găh pơ tho pơ hrăm, truh dang ei, lơ̆m teh đak đei dơ̆ng 6 dêh char, pơ lei tơm tơ chơ̆t kơ dŭn khei ‘năr pơ gơ̆r hŏk kơ tă hăm grŭp mầm non yua đơ̆ng jĭ hơ buh COVID-19 đei ƀôh krê hơ mơt. Thoi noh, dang ei đei 15 tơ ring tam mă pơ gơ̆r pơ tho hŏk kơ tă ăn hơ ioh mầm non. Mă hơ dăh ‘noh, grŭp mầm non dang ei đei 48 dêh char, pơ lei tơm pơ gơ̆r pơ tho hŏk kơ tă, hăm akŏp kơ sô̆ hloh 1 triệu 800 rơ bâu ‘nu hơ ioh, iŏk đei kơ sô̆ loi 55% akŏp kơ sô̆ hơ ioh mầm non lơ̆m teh đak. 15 tơ ring tŏk bŏk pơ dơh hŏk kơ tă ‘noh: Lào Cai, Tuyên Quang, Dak Nông, Vĩnh Phúc, Phú Thọ, Quảng Ninh, pơ lei tơm Hà Nội, pơ lei tơm Đà Nẵng, Hưng Yên, Trà Vinh, An Giang, Bạc Liêu, Phú Yên, Tiền Giang, Dak Lak (pơ lei tơm Buôn Ma Thuột).

Thuem: Tơ blơ̆