VOV4.Bahnar - Dang ei, Anih vei lăng jang pơ gang apŭng plĕnh teh (WHO) oei lăng Covid-19 ‘noh jĭ hơ buh păng oei tơ tăm găh tơ drong hơ nơ̆ng đei dơ̆ng dôm pơ rang tơ plih ‘nao đơ̆ng yŏng jĭ virus SARS-CoV2. Tơ̆ Việt Nam, mă đơ̆ng đei nơ̆r tơ gop athei lăng Covid-19 ‘noh jĭ hmă mă lei kiơ̆ lơ bơ ngai joăt jang pơ gang, lăp gơh lăng nơ̆r tơ lĕch âu ‘noh jing dôm hơ yak hơ met ăn tơ̆ hơ năp kơnh đĕch. Anih tơm vei lăng găh jang pơ gang hlôi pơ ma hơ dăh, khei ‘năr dang ei tam mă gơh drơ̆ng kiơ̆ nơ̆r athei âu. Tơ̆ teh đak bơ̆n jĭ ‘nao lăp tŏk bŏk đei ƀôh tơ plih dơ̆ng đơ̆ng khei ‘năr jĭ hơ buh jing khei ‘năr đei ƀôh jĭ, kơ na tam mă gơh lăng Covid-19 ‘noh jĭ hmă. Dôm bơ ngai joăt jang akhan, Việt Nam kăl hơ nơ̆ng jang kiơ̆ kơ jăp hăm Anih vei lăng jang pơ gang apŭng plĕnh teh kŭm nhen rim anih jang apŭng plĕnh teh păng rim teh đak nai lăng hơ len đei ƀôh tơ drong jĭ Covid-19. Đơ̆ng noh gơh vang jang tơ gŭm hăm Khŭl kơ dră teh đak tơ chơ̆t lăng jĭ Covid-19 ‘noh jĭ hmă lơ̆m 1 khei ‘năr lăp, păng rŏ lăng 6 khei hơ tuch sơ năm gô pă ƀiơ̆ mă lăng hơ len truh, ưh kơ gơh hơ chăng hŭt tang găn jĭ.

Thuem: Tơ blơ̆