VOV4.Bahnar - Tơ̆ dêh char Dak Lak, dang ei kơ sô̆ bơ ngai jĭ COVID-19 tŏk bŏk tŏk hrĕnh hăm hloh 4000 ‘nu rim năr. Tơ drong ‘nâu hlôi pơm pŭ trăp ăn khŭl jang pơ gang. Iŏk đơ̆ng Anih tơm vei lăng găh jang pơ gang đei hơ găt, pơ tho găh tơ drong hơ met F0 tơ̆ hnam, kŭm hăm tơ drong tơ mơ̆t yua mạng tơ pôl, tơ drong jang vei lăng, hơ met bơ ngai jĭ COVID-19 hlôi jing hơ iơch ƀiơ̆, khŭl jang y ƀak si tơ gŭm bơ ngai jĭ hơ met jĭ kiơ̆ grŭp pơ ma dơ nuh chih lơ̆m zalo tôch kơ đei yua.

Hơ tuch khei 1 âu ki, mŏ N.T.P oei tơ̆ phường Ea Tam, pơ lei tơm Buôn Ma Thuột chă ƀôh ƀơm SARS-CoV-2. Đơ̆ng rŏng kơ pơm kiơ̆ tơ roi tơ băt hăm hnam pơ gang xăh păng pơm hla ar apĭnh hơ met tơ̆ hnam, mŏ N.T.P đei pơ tho vang mơ̆t grŭp pơ ma dơ nuh, chih kiơ̆ lơ̆m Zalo ‘măn ăn dôm F0 hơ met tơ̆ hnam lơ̆m phường Ea Tam. Lăng ƀôh ‘nâu jĭ tơ drong jang hơ dăh ‘lơ̆ng, hiôk ăn tơ drong hơ met tơ̆ hnam, mŏ N.T.P drơ̆ng nơ̆r vang mơ̆t akŏm. Tơ roi găh dôm tơ drong băt ƀơ̆t vang mơ̆t lơ̆m grŭp pơ ma dơ nuh âu, mŏ N.T.P tơ roi:

“Jơ ‘năr hơ tuch khei 1, ĭnh đei pơ tho ăn oei hơ drô̆, hơ met tơ̆ hnam ƀơ̆t đei tôm tơ drong kiơ̆ hơ găt păng mă loi ‘noh đei tơ gŭm tơ năp đơ̆ng grŭp Zalo hơ met F0. Ƀơ̆t ĭnh vang mơ̆t grŭp, hlôi đei 2,3 hrĕng bơ ngai jang lơ̆m khŭl, đei hloi kang ƀô̆ jang pơ gang, bơ ngai jĭ păng bơ ngai đĭ klăih kơ jĭ. Lơ̆m khei ‘năr ăn oei hơ drô̆ hơ met ‘noh tơ drong vang mơ̆t lơ̆m grŭp Zalo tơ gŭm ĭnh hoei kơ tơ chĕng, ưh kơ hiôk yua kơ rim năr athei oei tơ̆ 4 tơ năr hnam. Pơ têng hăm tơ drong athei năm tơ̆ dôm hơ nih ăn oei hơ drô̆ akŏm nhen hơ drol, ‘noh đei hơ met tơ̆ hnam păng iŏk tơ drong pơ tho tơ ƀôh, tơ gŭm đơ̆ng kang ƀô̆ jang pơ gang ‘moi kiơ̆ mạng tơ pôl ưh khan lăp tơ gŭm ĭnh mă dôm bơ ngai jĭ COVID-19 kŭm ƀôh hiôk ƀiơ̆”.

 Kiơ̆ kơ ƀak si Ngô Mạnh Cường, Kơ dră vei lăng Hnam pơ gang Ea Tam, pơ lei tơm Buôn Ma Thuột, đei ƀôh đơ̆ng yan âu dôm bơ ngai jĭ COVID-19 tă kơ đei tơ drong jĭ lăp ai păng tơ drong jang hơ met tơ̆ dôm hnam pơ gang ưh tam gan kĕ kơ na lơ F0 hlôi apĭnh hơ met kơ dih tơ̆ hnam. Mă lei, yua kơ khŭl jang pơ gang tơ ring tơ̆ sĕt, ưh kơ kĕ năm truh tơ̆ rim hnam tơ gŭm bơ ngai jĭ kơ na anih jang hlôi kơ chăng tơ mơ̆t yua mạng tơ pôl vă pơ yua ăn tơ drong jang vei lăng, hơ met, lơ̆m noh đei pơ jing grŭp pơ ma dơ nuh, chih lơ̆m zalo. Grŭp âu yua đơ̆ng hnam pơ gang xăh, phường pơm ăn păng bơ ngai jang pơ gang ‘noh vei lăng, bơ̆ jang tơ drong pơ tho tơ ƀôh păng tơl nơ̆r apĭnh đơ̆ng F0 hơ met tơ̆ hnam. ‘Nâu ưh khan lăp jing kênh tơ roi tơ băt đei yua đơ̆ng anih jang pơ gang mă oei jing hơ nih vă dôm bơ ngai jĭ COVID-19 pơ ma dơ nuh, tơ roi dôm tơ drong hlôh vao, pơ lung băl, tơ gop sơ đơ̆ng jơ hngơ̆m đon, pơm dă kơ ƀiơ̆ kơ ƀơm ưh kơ ‘lơ̆ng đơ̆ng rŏng jĭ COVID-19. Ƀak si Ngô Mạnh Cường tơ băt:

“Dang ei phường Ea Tam đei dang 1300 truh 1400 ‘nu bơ ngai F0 hơ met tơ̆ hnam. Hăm kơ sô̆ bơ ngai jĭ lơ thoi âu mă ưh kơ đei tơ drong jang zalo ‘noh ưh kơ băt dôm yơ kang ƀô̆ jang pơ gang mă kĕ tôm vă vei lăng, yua kơ tơ drong jang athei jang tôch kơ lơ nhen hơ len lăng tơ drong jĭ: yuh, hiĕn, jĭ kơ tơh, pơ tŏ kơ sô̆ oxy lơ̆m pham (Spo2), pơ tho chă ƀôh dôm tơ drong jĭ krê hơ mơt vă tơ roi tơ băt ăn bơ ngai jang pơ gang... Kiơ̆ đơ̆ng tơ drong jang zalo, bơ ngai jĭ gơh tơ roi tơ băt tơ drong jơ hngơ̆m pran rim năr păng kang ƀô̆ hnam pơ gang xăh kiơ̆ đơ̆ng noh răp hơ len lăng, pơ tho hơ met.

Ƀak si Cường akhan tơ drong tơ mơ̆t yua kơ măy kơ mŏk 4.0 lơ̆m tơ drong jang vei lăng, hơ met bơ ngai jĭ COVID-19 tôch kơ hiôk. Pơ tih gia hăm dôm bơ ngai năm jang kăl kơ đei hla ar vă hơ met pơ ‘lơ̆ng pơ dơh jĭ pơ lŏ sa jên ƀao hiêm tơ pôl, tơ plih yua kơ athei ăn tơ drong tơ chơ̆t hơ met tơ̆ hnam ăn kơ rim bơ ngai ‘noh kang ƀô̆ hnam pơ gang xăh, phường lăp kăl gơ̆ih tơ drong tơ chơ̆t tơ̆ grŭp pơ ma dơ nuh dăh mă krao ăn bơ ngai jang pơ gang ‘noh gô đei tơ gŭm hloi. Dôm tơ drong ‘lơ̆ng âu đơ̆ng mạng tơ pôl tŏk bŏk tơ gŭm tôch kơ tih ăn tơ drong jang tang găn jĭ COVID-19, tơ jur tơ drong hrăt hrot dêh hnang tơ̆ dôm hnam pơ gang.

Kiơ̆ kơ ƀak si Lại Quang Miễn, Phŏ Kơ dră vei lăng Anih jang pơ gang pơ lei tơm Buôn Ma Thuột, kơ sô̆ F0 tŏk hrĕnh lơ̆m 1 khei ‘năr kơ đeh pơm kơ hret tih ăn anih jang pơ gang, yua thoi noh tơ drong ăn F0 jĭ păh lăp hơ met tơ̆ hnam ‘noh lăp. Mă lei, bơ ngai jĭ F0 ưh kơ băt lai yơ jĭ đei tơ plih jĭ ăl vă hơ met tơ tom kơ na gô ƀơm ưh kơ ‘lơ̆ng truh hơ kâu jăn. Yua thoi noh, tơ drong yua grŭp pơ ma dơ nuh, chih lơ̆m Zalo tơl nơ̆r apĭnh găh dôm tơ drong đei ƀôh jĭ, trong hơ met, trong yua pơ gang  ƀlep trong gô hơ nhăk ăn tơ drong sơ đơ̆ng ăn bơ ngai jĭ. Tơ roi dơ̆ng găh tơ drong đei yua ƀơ̆t pơ jing grŭp pơ ma dơ nuh, chih lơ̆m Zalo tơ gŭm dôm F0 hơ met tơ̆ hnam, ƀak si Lại Quang Miễn tơ roi: "Vă ƀônh hiôk ăn tơ drong tơ lĕch jang hơ met F0 tơ̆ hnam, anih jang pơ gang hlôi pơm đei dôm grŭp pơ ma dơ nuh, chih lơ̆m Zalo. Grŭp âu đei lơ tơ drong hơ iă, mă mônh ‘noh băt tơ tom 1, 2 hla ar pơ tho đơ̆ng kơ dră kơ pal. Mă 2 ‘noh pơ ma dơ nuh tơ drong joăt jang lơ̆m kơ plăh hơ met. Mă 3 ‘noh trong yua pơ gang 1 trong lăp, sơ đơ̆ng păng đei yua. Grŭp âu kŭm đei vei kơ jăp rơ đăh, lăp gơh tơ roi găh tơ drong joăt jang, găh tơ drong vei lăng, ‘ngoăih kơ ‘noh ưh kơ tơ roi dôm tơ drong nai. Dang ei grŭp đei tơ lĕch jang tơ̆ 25 hnam pơ gang phường, lơ̆m noh đei 21 hnam pơ gang xăh phường păng 4 hnam pơ gang pơ jing kơ dih”.

Gơh tơ roi, tơ drong tơ mơ̆t yua mạng tơ pôl lơ̆m tơ drong jang hơ met F0 tơ̆ hnam hlôi tơ gop gĭt kăl lơ̆m tơ drong tơ jur pŭ trăp ăn anih jang pơ gang, hơ dai hăm ‘noh tơ gŭm sơ đơ̆ng jơ hngơ̆m đon ăn bơ ngai jĭ. Hơ mĕng akhan, tơ̆ hơ năp kơnh, tơ drong tơ mơ̆t yua internet păng mạng tơ pôl gô hơ nơ̆ng hơ tŏk đei yua lơ̆m tơ drong jang tang găn jĭ COVID-19, kiơ̆ đơ̆ng noh, khŭl kang ƀô̆, bơ ngai jang pơ gang đei dơ̆ng jơ năr păng tơ drong hiôk akŏm jang ‘lơ̆ng hơ năp jang vei lăng jơ hngơ̆m jăn ăn bơ ngai kăl nai.

Thuem: Tơ blơ̆