Hơnơ̆ng năm tơ̆ Hnam pơgang Đa khoa tơring Tây Nguyên, ƀok Mai Thanh Nhàn, tơ̆ xăh Hòa Thắng, plt Buôn Ma Thuột, dêh char Đắk Lắk, tơroi, ƀok tôch lăp đon hăm tơdrong tơplih la ar chih măt khăm, hơmet jĭ: “Dang ei chih măt năm khăm jĭ tôch ƀônh, da ƀiơ̆ hiong jơ năr. Sơ̆ ‘nŏh ƀŏk kơsô̆, đang kơ ‘nŏh chĕp the ƀao hiêm, ƀlă đơ̆ng noh mưh ƀak si khăm đang ‘nŏh jur kla jên păng iŏk the ƀao hiêm kơna tôch hiong jơ. Dang ei pơm kiơ̆ trong jang ‘nâu tôch hrĕnh.

Pơjing tơdrong ƀônh hiôk hlŏh ăn bơngai jĭ, tơdrong tơplih hăm kơmăy sô̆ hlôi đei Hnam pơgang Đa khoa tơring Tây Nguyên tơlĕch jang lơ tơdrong nhen: chih măt khăm hơmet jĭ hăm ƀao hiêm, hăm the kăn kươk kon pơlei đei chíp, gơih hla ar điên, kla jên điên ưh kăl yoa jên măt, chih năr năm khăm hăm kơmăy... Kiơ̆ ƀok Nguyễn Trí Dũng, Kơdră Lăm jang găh kơmăy kơmŏk, rim tơdrong pơm hla ar, pơvih pơvăn khăm hơmet jĭ hăm kơmăy sô̆ đei pơklĕp tôch rơđăh: “Kơmăy phần mềm vei lăng ‘nao tôch hiôk ăn bơngai jĭ năm khăm păng hơmet jĭ yoa đe sư da ƀiơ̆ chĕp ba lơ hla ar. Kiơ̆ đơ̆ng noh Hnam pơgang oei jang kiơ̆ lơ tơdrong tôch trŏ, roi tơbăt găh ƀao hiêm tơpôl tôch lăp”.

Dang ei jô̆păh lăp 1 năr, Hnam pơgang Đa khoa tơring Tây Nguyên iŏk hơmet ăn vă jê̆ 1.500 ‘nu bơngai jĭ năm khăm, kŭm hăm hlŏh 1.600 ‘nu bơngai jĭ ƀich hơmet jĭ. Ƀak si Trịnh Hồng Nhựt – Phŏ Kơdră chĕp kơ̆l Hnam pơgang ăn tơbăt, tơplih hăm kơmăy sô̆ hơnhăk ba lơ tơdrong tơplih tôch hơiă lơ̆m rim tơdrong jang: “Hnam pơgang Đa khoa tơring Tây Nguyên tơmât yoa lơ kơmăy phân mêm lơ̆m tơdrong khăm, hơmet jĭ kŭm nhen vei lăng tơmam drăm vă hơnhăk tơdrong đei yoa ‘lơ̆ng kŭm nhen tơjur ƀiơ̆ tơdrong pơm hla ar, pơjing tơdrong ‘lơ̆ng, hiôk hian ăn bơngai jĭ păng pơjing tơdrong hiôk hian găh jơnăr ăn ƀak si lơ ƀiơ̆ vă pơvih ăn bơngai jĭ.”

Ƀok Nguyễn Hữu Vũ Quang, Phŏ Kơdră Anih vei lăng jang pơgang dêh char Đắk Lắk ăn tơbăt, ưh lăp hơdrô̆ hnam pơgang dêh char đĕch, mă tơdrong tơplih hăm kơmăy sô̆ tŏk bŏk tơlĕch jang tơ̆ rim anih jang pơgang tơ̆ tơring. Đĭ đăng dôm anih jang pơgang hlôi tơmât yoa kơmăy phần mềm vă pơvih ăn tơdrong vei lăng, khăm hơmet jĭ, ƀet pơgang bơ̆ng jĭ... Kơmăy phân mêm vei lăng jang pơgang tơ̆ tơring hlôi đei chô̆ hơmet tơ̆ 185 hnam pơgang xăh, phường, thĭ trơ̆n. Dang ei đĭ đei 21 hnam pơgang đei răt hơmet kơmăy khăm hơlen, roi tơƀôh tơdrong khăm, hơmet jĭ đơ̆ng hơtăih. Anih jang kŭm hlôi tơlĕch kơmăy phâm mêm “Ƀak si ăn rim bơngai” vă hơmet pơ ‘lơ̆ng tơdrong pơvih ăn kon pơlei păng hơtŏk đon rơgei, ‘lơ̆ng hơiă mưh khăm hơmet jĭ tơ̆ hnam pơgang.

Ƀok Nguyễn Hữu Vũ Quang, tơroi, tơ̆ hơnăp kơnh, anih jang pơgang Đắk Lắk hơnơ̆ng tơplih ‘nao jơhngâm đon bơ̆ jang, hơtŏk tơdrong đei yoa mưh vei lăng, atŭm hăm ‘nŏh hơnơ̆ng tưk tơiung tơdrong tơplih hăm kơmăy sô̆: “Mă mônh pơjing kơmăy chih răk hăm kơmăy điên tư găh tơdrong jĭ, jơhngâm pran kon pơlei vă gơ̆h pơtruh tơdrong tơroi âu ăn dôm anih ‘măn răk kơ teh đak dăh mă dôm hnam pơgang khăm hơmet jĭ; Mă 2 ‘nŏh hơtŏk kơmăy sô̆ lơ̆m tơdrong jang pơgang, kon pơlei iŏk yoa kơsô̆ đĭnh danh điên tư VNEID tơmât lơ̆m kơmăy sô̆ jang pơgang hăm anih ‘măn răk kơ teh đak; Mă 3 ‘nŏh tơlĕch trong pơvih trư̆k tuyê̆n ăn kon pơlei hăm anih tĕch mơdro, adrin đĭ đăng tơdrong pơvih pơvăn lơ̆m tơpôl tơ̆ hnam pơgang đei jang hăm kơmăy ngăl.”/.