VOV4.Bahnar - Pơ gê (10/3), Hnam pơ gang đa khoa Tâm Anh ăn tơ băt, pơ rang tang găn jĭ Evusheld đơ̆ng AstraZeneca- pơ gang tang găn jĭ sĭt kơ tang mă blŭng lơ̆m apŭng plenh tĕh vă tang găn jĭ COVID-19 hlôi đei Anih tơm vei lăng jang pơ gang asong iŏk yoa tơ̆ Việt Nam. Hnam pơ gang âu vă iŏk pơ gang Evusheld vă ƀet ăn dôm bơ ngai krê hơ mơt tơ pŏh jĭ COVID-19 ăl.

Mă hơ dăh, pơ gang Evusheld đơ̆ng AstraZeneca gô đei ƀet ăn dôm bơ ngai đei tơ drong jĭ lơ̆m hơ kâu jăn nhen jĭ klơm, jĭ plei lĕn, plei nuih, jĭ khơp, hơ yô đak sĭk, jĭ tơ sŏh đunh- COPD… Mă loi hăm bơ ngai ưh đei kơ sư̆k tơ jră jĭ yoa jĭ (HIV, oei hơ met jĭ ung thư, tơ gep klơm, plei lĕn…); dăh mă đei dôm tơ drong jĭ (lupus lĕch ƀre, jĭ kơ ting, jĭ khơp…). Pha hăm vaccine, lăp 2,3 jơ đơ̆ng rŏng kơ ƀet Evusheld, gơ̆h đei tôm pơ rang kăl vă vei lăng hơ kâu jăn huei tơ pŏh jĭ COVID-19 tôch sĭt, hăm truh 83% păng ưh đei bơ ngai yơ jĭ ăl dăh mă lôch lơ̆m 6 khei hơ len năng, kiơ̆ tơ drong tơ chĕng hơ len PROVENT đơ̆ng AstraZeneca.

Dơ̆ng: Tơ blơ̆