Mŏ H’ Dung Niê oei tơ̆ plei Tơ̆ng Jŭ, xăh Ea Cao, pơlei tơm Buôn Ma Thuật, dêh char Dak Lak tơroi: Hơdrol sơ̆ bơngai Ê Đê oei tam mă năm hŏk lơ, tam mă hlôh vao kơna mưh ŭnh hnam jĭ pơlŏ ưh kơ đei ba truh tơ̆ tơ̆ hnam pơgang hơmet jĭ, mă đa hơmet hăm dôm pơgang kră sơ̆, hơmet jĭ hăm trong soi tơbeh vă pĭnh Yang hơmet klăih kơ jĭ. Mă lei dang ei đĭ pha bơih:

Iŏk đơ̆ng đei tơdrong bơngơ̆t truh đơ̆ng Đảng, teh đak, đơ̆ng jang pơgang kơ pơlei truh tơ̆ xăh, pơlei tơm, dang ei ‘noh tơroi tơbăt găh drŏ kăn tang găn rơneh kon lơ, dăh mă lơ̆m khei ‘năr oei hơnăp ‘noh vei lăng nge pran jăng, hơnơ̆ng năm hơlen lăng, athei năm tơ̆ bơngai jang kơ pơlei vă pơ tho tơƀôh. Jĭ COVID 19 lơ̆m pơlei nhôn đei ƀôh blŭng a lơ̆m xăh Ea Cao, mă lei đei tơdrong bơngơ̆t truh đơ̆ng Đảng, teh đak ‘noh kŭm vei kơjăp, akŏm tôch kơ ‘lơ̆ng, jĭ hơbuh lơ̆m pơlei tôch kơ lơ mă lei ưh kơ đei ƀôh nhen jĭ dêh dăh mă lôch - ‘noh jĭ tơdrong tôch kơ chhôk hơiă lơ̆m khei ‘năr âu ki.

Truh dang ei, hăm tơdrong hơdrin đơ̆ng anih jang pơgang, kon pơlei kơ dôm hơdrĕch hơdrŭng tơ̆ dêh char Dak Lak hlôi hơtŏk ‘lơ̆ng đon kơchăng lơ̆m tơdrong vei lăng jơhngơ̆m pran, năm tơ̆ hnam pơgang khăm mưh jĭ pơ lŏ, dôm tơdrong joăt soi, hơmet jĭ hăm hla ‘long hlôi đei sut hŭt răh. Đĭ đăng drŏ kăn rơneh tơ̆ hnam pơgang, ưh pă đei bơngai rơneh tơ̆ hnam bơih. Dôm anih jang pơgang hlôi đei hơmet ăn tôm bơ̆n kơmăy kơmŏk, pơgang vă vei sơ đơ̆ng ‘lơ̆ng jơhngơ̆m pran ăn kon pơlei kơ dôm hơdrĕch hơdrŭng iŏk đơ̆ng hnam pơgang xăh hloi. Ƀak si Nông Văn Sáng, Kơdră vei lăng hnam pơgang xăh Ea M’Droh, apŭng Cư M’gar, pơma hơdăh:

Dang ei hlôi đei kơmăy siêu âm, kơmăy pơtŏ plei nuih, dôm kơmăy hrip khoak, hơlen lăng bơ̆n pham. Ƀơ̆t tơdrong vei lăng jơhngơ̆m pran tơring nhôn đei hơtŏk ‘lơ̆ng, kon pơlei ưh pă athei năm khăm hơmet jĭ tơ̆ dôm hơnih hơtăih gô tơjur jên đak xăng, jơnăr, bơngai năm vei lăng, dôm tơdrong tơjur đei tôch kơ lơ.

Ưh kơdrô̆ kiơ tơ̆ Dak Lak, tơ̆ dêh char Lai Châu vă hơtŏk ‘lơ̆ng tơdrong hơtŏ băl lơ̆m tơdrong jang vei lăng jơhngơ̆m pran, mă loi ‘noh jĭ ‘măn kon pơlei tơring hơtăih hơtŏ, tơring kon pơlei kon kông, Đảng păng teh đak hlôi đei dôm trong jang tơgŭm, trong jang hơdăh nhen grŭp tơdrong jang tơgŭm păng trong jang vă tơgŭm hơdrol hơmet pơ ‘lơ̆ng dôm tơdrong jơhngơ̆m jăn kơ bơngai dơnuh hin, tơring dơnuh hin; grŭp tơdrong jang tơgŭm vă hơtŏk loi dơ̆ng tơdrong gơh hơmet jĭ đơ̆ng bơngai dơnuh hin truh hăm pơvih pơvăn pơgang teh đak păng tuch luch ‘noh grŭp tơdrong jang tơgŭm jên hu ăn bơngai dơnuh hin, tơring dơnuh hin lơ̆m khăm, hơmet jĭ. Mŏ Lò Thị Khăn, bơngai Lự oei tơ̆ xăh Bản Hon, apŭng Tam đường, tơroi:

Vei lăng jơhngơ̆m jăn drŏ kăn ‘noh ăn năm khăm nge oei lơ̆m klak, khăm jơhngơ̆m jơhngơ̆m jăn kơdih. Mŏ oh rơneh đang, ƀet bơ̆ng. Ưh kơ vei lăng jơhngơ̆m pran ‘noh đơ̆ng rŏng âu hli kơ bơ̆n đei jĭ, đei kiơ ‘noh ưh kơ đei athei năm lăng hơdrol. Ĭnh đei ƀao hiêm pơgang, ŭnh hnam dơnuh hin dơ̆ng ‘noh ưh kơ đĭ dôm yơ; ưh kơ đei ƀao hiêm ‘noh hiong jên.

Lơ̆m tơdrong jang vei lăng jơhngơ̆m jăn ăn bơngai kon kông păng tơring groi kông hrei ‘nâu, dôm tơring tôch kơ bơngơ̆t truh tơdrong hơtŏk loi dơ̆ng tơroi tơbăt tơdrong hlôh vao păng bơ̆ jang lơ̆m vei lăng jơhngơ̆m jăn bek ‘lơ̆ng ăn bơngai mĕ păng nge; Tơgŭm hơtŏk loi dơ̆ng tơdrong khăm nge oei lơ̆m klak hơnơ̆ng păng tơgŭm pơgang ăn drŏ kăn hơdrol, lơ̆m păng đơ̆ng rŏng kơ rơneh kon; Tơgŭm khăm jơhngơ̆m jăn hơnơ̆ng ăn hơ ioh hơla kơ 24 khei; Tơgŭm hơtŏk loi dơ̆ng kơchơ̆t bek ‘lơ̆ng păng tang găn hơkĕ hơkong tơ̆ tơring kon pơlei kon kông păng tơring groi kông ăn hơioh. Mŏ Bùi Thi Toan, kueng Lục, xăh Yến Nghiệp, apŭng Lạc Sơn, dêh char Hoà Bình tơbăt:

Tơ̆ pơlei nhôn dôm hơioh đơ̆ng 5 sơnăm tơ̆ hơla ‘noh đei ƀet bơ̆ng rim khei ƀlep khei ‘năr đơ̆ng sư, hơdai hăm ‘noh jơhngơ̆m pran bơngai ‘lŏ ‘noh đei  nhen drŏ kăn nhôn đa hơnơ̆ng khăm hăm ăn pơgang huch tơlĕch hơmơng, oei hơnăp đei ƀet bơ̆ng, ƀet tơgŭm nge oei lơ̆m klak.

Tơdrong jang pơgang kơ teh đak tơ̆ tơring kon pơlei kon kông dôm sơnăm tơjê̆ âu hlôi đei tơlĕch jang păng bơ̆jang kiơ̆ đei iŏk yua, kon pơlei dôm hơdrĕch hơdrŭng hlôi đei đon kơchăng lơ̆m tơdrong khăm, hơmet jĭ, rơneh tơ̆ hnam pơgang xăh. Jơnei ‘noh, 1 păh gơnang đơ̆ng tơdrong bơngơ̆t truh hơnơ̆ng pơgơ̆r đơ̆ng kơdră Đảng, kơdră rim tơring lơ̆m tơdrong jang tang găn jĭ hơbuh, vei lăng jơhngơ̆m pran ăn kon pơlei. Mă loi ‘noh, tơdrong jang vei lăng jơhngơ̆m jăn ăn kon pơlei kon kông ling lang đei lăng kăl hơtŏk tơiung pơđĭ găh khŭl jang, tơmam drăm, kơmăy kơmŏk, tơdrong khăm, hơmet jĭ đei tơplih ‘lơ̆ng; kon pơlei kon kông đei gơh iŏk yua dôm tơdrong pơvih pơvăn vei lăng jơhngơ̆m pran dang ei. Đĭ đăng kon pơlei kon kông tơring mơmat tat, ŭnh hnam dơnuh hin, ŭnh hnam vă jê̆ dơnuh hin đei asong the ƀao hiêm pơgang.