VOV4.Bahnar - ‘Nhot xa kơ bơngai  Ê đê lơ̆m dêh char Đak Nông ư ang hăm dôm tơmam xa tăng đei pai hăm ka kro iĕ ƀâu phu ‘lơ̆ng kăp gĭt. ‘Nguaih kơ pro tăng dăh mă plei tăng, bơngai Ê đê oei đei ƀar kơloăi hla tăng hloh ‘măn pai hăm ka kro iĕ, hla ƀlang păng djam ƀlê (‘nhot tăng).

Hla ƀlang noh tăng đei bơngai Ê đê lăp kơ xa. Hla ƀlang athei iŏk hloh tŏng brê, hơnơ̆ng ‘măn pai ‘nhot tơƀăng xa, hla ƀlang pai hăm pơkao tơneh, hla ƀlang pai hăm ka kro... lơ̆m noh hla ƀlang pai hăm ka kro noh ƀônh pai mă lei xa tôch ‘lơ̆ng.

Adrol hloh noh, hla ƀlang đei kăt iĕ păng tong hăm đak tô̆ vă kơ hăp da ƀiơ̆ kơ tăng đang kơ noh lê̆ hrăng đak. Lơ unh hnam bơngai Ê đê lăng xa tăng hloh noh ưh kơ kăl tong hăm đak tô̆ mă lê̆ hla hơpôm hloi vă pai xa. Hla ƀlang hơdrih đei peh hĕch atŭm hăm hơplăng. Tơmam xa âu pai duh tenh lơ̆m tong anê̆ jơ đĕch. Hơtô̆ gŏ tơ̆ tơkang unh, tuh tŏ xĕt rơmă, đang kơ noh tăh kơdĕm kông (kơdĕm găr iĕ) hơna dreng, tăh ka kro iĕ hơna păh ai, tăh ƀoh ƀôk ngok hơmrĕ dơ̆ng noh đei tơƀăng xa ‘lơ̆ng bơih. Tơƀăng xa tơpăr hơyuh ƀâu phu tru hŭt đơ̆ng hơplăng păng ka kro iĕ.

Minh kơloăi dơ̆ng tơdrong tang mă bơngai Ê đê lăp yua pai hăm ka kro noh djam ƀlê. Noh jing hơnăn krao kiơ̆ nơ̆r Ê đê đơ̆ng minh hơdrĕch ‘nhot bri. Djam ƀlê hon kiơ̆ jơmŭl, hla kơjung, hon tơkuh dih băl, hla pơda noh jơk dreng.

Bơngai Ê đê hơnơ̆ng gơ̆ iŏk tơ ‘mơ̆ng pơda vă pai xa, kơlih hăp tăng. ‘Nhot djam ƀlê pai hăm ka kro vă nhen đe pai hla ƀlang mơ̆n. Mă lei, tơdrong pai ‘nhot djam ƀlê ưh kơ kăl chet iĕ mă lê̆ hla hơpôm vă pai. Djam ƀlê pai hăm ka kro iĕ lơ̆m pơhlom 5 pơnĭt noh tăh ƀoh ƀôk ngok. Pơtăl kơ yua hơplăng nhen lơ̆m pai hla ƀlang noh ‘nhot mă âu đe păi tăh lơ hơmrĕ hloh. Ăh pai xĭn noh hăp ƀâu phu đơ̆ng hơyuh hơmrĕ. ‘Nhot djam ƀlê xa ‘lơ̆ng, ‘nhuyn, tăng noh xŏng hăm por tôch lăp kơ đon.

Hăm tơdrong lăp xa tăng păng hơ̆, bơngai Ê đê lăng hla ƀlang păng djam ƀlê  jing 2 tơmam drăm kăp gĭt. Xa dôm tơmam xa âu atŭm hăm por tô̆ noh pơm ăn tơdrong xŏng xa 'lơ̆ng xa lŭ kơ ƀơ̆r păng kăp gĭt hloh. Tơdrong tăng đơ̆ng hơdrĕch hla ƀlang âu 'măng mă blŭng xa noh tơnap kơ luơ̆n lăng. Mă lei adrô̆ rơkai mă hĕch noh găr mă 2 mă 3, đe pơtơm ƀôh mơn tơdrong 'ngam chrih lơ̆m tơdrong tăng. Hơnơ̆ng thoi noh, bơngai xa ƀơm tơdui đơ̆ng tơmam xa âu, tơklăh băl mă lei pơm ăn kơ bơ̆n xŏng xa lăp.

Lan chih păng pơre nơ̆r