VOV4.Bahnar - 'Nhot tŭl prung đing phat prung jing minh tơƀăng xa kăp gĭt kơ bơngai M’Nông. Hăm bơngai  M’Nông, tơƀăng xa âu noh kăp gĭt, ƀenh kơ um ai 'nhot xa kơ bơngai Tây Nguyên pơma atŭm păng bơngai M’nông pơma adrô̆. 'Nhot prung ưh adrô̆ jing tơƀăng xa rim năr mă oei đei bơngai M’nông 'măn jong ăn tơmoi gĭt lơ̆m dôm 'năr et xa gĭt juăt jue kơ pơlei pơla.

          Kơlih kiơ đei hơnăn krap 'nhot prung kơlih tơmam 'nhot đei tăh tŭl lơ̆m đing phat vă pai xĭn. Tơmam đe pơjing 'nhot prung noh: hla ƀep (hla nhip), pro tăng, tơ 'mơ̆ng hre, hơmrĕ, ka păng 'nhĕm kon tơrong. Đơ̆ng dôm tơmam 'nhot juăt jue, hlôi đei lơ̆m cham char mă lei ăh lŭk lơ̆k atŭm dih băl noh pơjing minh tơƀăng xa 'lơ̆ng păng bek. Hla ƀep 'măn pai 'nhot prung noh hla ƀep pơda đei pĕ đơ̆ng rŏng kơ dôm 'năr 'mi. Kơplăh âu hla ƀep rơgoh, ưh kăl ôp hăm đak mă iŏk pai kơtă noh hăp ƀâu phu. Tơ 'mơ̆ng hre đơ̆ng rŏng kơ gơ̆ đơ̆ng bri vih ôp mă rơgoh, 'lek lê̆ kơđoh kră tơ̆ 'nguaih, iŏk hơkâu pơda lơ̆m lăm đĕch. Hơkâu kok âu 'nhăk ơ̆p đang kơ noh chet 'nhĕ.

          Pha hăm pro tăng bri plei tih tăng mă bơngai M’Nông, Ê đê 'măn pai tơƀăng pro tăng ka kro, pro 'măn pai 'nhot prung noh hăp 'ngam. Pro mă âu đei pơtăm lơ lơ̆m pơgar hnam kơ bơngai M’Nông.

          Tơmam mă ưh gơh kơƀah noh ka păng 'nhĕm. Ka noh yâu đơ̆ng đak glung, ƀuh ăh ngar unh vă kơ hăp hoai ƀâu khach. Ăh pai noh đe tăh hơpôm hloi ưh kăl iŏk lê̆ kơting. 'Nhĕm noh 'nhĕm nhŭng, 'nhĕm ier, 'nhĕm kon bri... tuơ kơ tơdrong lăp kơ rim unh hnam.

          Pai 'nhot tŭl prung đing phat trŏ ƀlep noh ưh đei yua gŏ pai mă athei yua đing phat vă pai. Đing phat đei rơih mă 'lơ̆ng, ưh gơh pơda jat dăh mă kră jat. Đing kơjung pơhlom minh plaih noh găl bơih. Đe pai yua xăng han vă kuer pơlôh ăh đing vă kơ đak lơ̆m đing ưh đei ro lĕch tơ̆ 'nguaih lơ̆m kơplăh oei pai. Tơdrong tŭl 'nhot 'nhĕm lơ̆m đing phat duh athei kơchăng tôch dêh.

          Đing phat đei ƀuh ăh ngar unh khơ̆ng. Ăh pai noh athei hơlen lăng unh mă tơnăp, ưh gơh lê̆ unh khơ̆ng kơtang, mă păh ai đĕch. Hơ 'lơ̆ đing phat hơnơ̆ng vă 'nhot 'nhĕm lơ̆m đing gơh xĭn ưh đei khoi. Lơ̆m kơplăh pai noh đing phat lĕch đak hrơ hrâu hăm dôm tơmam pai lơ̆m lăm, pơjing hê̆ 'nhot xa jing ƀâu phu kăp gĭt mă adrô̆ đei 'nhot pai hăm đing phat đĕch gơh đei.

          Bơngai M’Nông yua 'long pơle jĭt, vă tŭl 'nhot 'nhĕm lơ̆m đing phat vă kơ hăp hĕch 'lơ̆ng, lŭk lơ̆k dih băl. Hơbŏ kơyuơ thoi noh mă tơƀưng xa âu đei krao hơnăn 'nhot tŭl prung. Tơƀăng âu athei pai lơ̆m 30 pơnĭt, tăh tôm ƀoh hơmrĕ, 'nhot ƀâu phu noh hlôi đei tơƀăng xa ƀâu phu 'lơ̆ng.

          'Nhot tŭl prung đing phat noh 'lơ̆ng hăm jơhngơ̆m jăn bơngai mĕ 'nao rơneh nge, bơngai kră jơhngơ̆m jăn ưh grăng păng đe hơ ioh hơven hơvo. 'Nhot tŭl prung ưh adrô̆ tơƀăng xa rim kơ năr mă oei đei 'măn jong ăn tơmoi gĭt lơ̆m dôm năr et xa juăt jue kơ bơngai M’nông.

Lan chih păng pơre nơ̆r