VOV4.Bahnar - Ƀok Trần Hồng Tiến, Bí thư Đảng apŭng Krông Pach, dêh char Dak Lak ăn tơ băt: apŭng ‘nao băt 1 ‘nu kơ dră chĕp kơ̆l thĭ trơ̆n Phước An tơ pŏh jĭ Covid-19. ‘Nŏh jĭ ƀok N.V.H, kơ dră chĕp kơ̆l anih jang Đảng thĭ trơ̆n Phước An.

Test hrĕnh ăn dôm bơ ngai ƀơm truh bơ ngai jĭ

Kiơ̆ đơ̆ng khăm hơ len tơ drong jĭ, lơ̆m khei ‘năr đơ̆ng ‘năr 6 - 12/10, ƀok H. năm tơ̆ lơ anih păng tơ ƀâp lơ bơ ngai. Đơ̆ng rŏng kơ ƀok H. test hrĕnh đei pơ rang jĭ SARS-CoV-2, anih jang kơ pal hlôi tơ chă păng chih hơ dăh hlŏh 50 ‘nu bơ ngai F1. Lơ̆m nŏh mă lơ ‘nŏh kăn ƀô̆, bơ ngai jang tơ̆ thĭ trơ̆n Phước An păng kăn ƀô̆ apŭng Krông Pach.

Tơ drong test hrĕnh păng set hơ len hăm kơ măy Realtime RT-PCR kơ hlŏh 50 ‘nu bơ ngai F1 đei ƀơm truh ƀok H. tơ tă ưh đei jĭ SARS-CoV-2 ngăl. Dôm bơ ngai âu dang ei oei ăn oei hơ drô̆ tơ̆ anih jang vă vei sơ đơ̆ng rim tơ drong bơ̆ jang tơ̆ thĭ trơ̆n.

Dơ̆ng: Tơ blơ̆