VOV4.Bahnar - Tơ roi tơ̆ ‘măng hop akŏm tơ roi găh tơ drong jang tang găn jĭ lơ̆m pơ lei tơm Hồ Chí Minh kơ sơ̆ ‘năr 16/9, ăn ƀôh kơ sô̆ bơ ngai lôch yua đơ̆ng COVID-19 tơ̆ pơ lei tơm Hồ Chí Minh tŏk bŏk tơ jur hơ nơ̆ng kiơ̆ năr, mă lei kơ sô̆ bơ ngai jĭ ‘nao oei lơ. Mă hơ dăh ‘noh, lơ̆m ‘năr 15/9, pơ lei tơm Hồ Chí Minh đei 160 ‘nu lôch, tŏ sĕt hloh lơ̆m hloh 1 khei âu ki păng hơ tŏ hăm blŭng khei 8; đei hloh 2.500 ‘nu bơ ngai jĭ brŏk đơ̆ng hnam pơ gang, hơ tŏk akŏp kơ sô̆ brŏk đơ̆ng hnam pơ gang đơ̆ng khei 1/2021 truh dang ei tŏk 161.000 ‘nu, dang ei oei tŏk bŏk hơ met ăn kơ hloh  41.000 ‘nu jĭ. Mă lei 1 tơ drong kăl kơ tơ roi ‘noh jĭ kơ sô̆ bơ ngai jĭ COVID-19 oei lơ. Roi tơ blang tơ drong ‘nâu, Phŏ Kơ dră Anih vei lăng găh jang pơ gang pơ lei tơm Hồ Chí Minh Nguyễn Hoài Nam tơ băt: Pơ lei tơm tơ mơ̆t yua trong jang hơ len lăng hrĕnh lơ̆m lơ hơ nih păng pơm lơ ‘măng hơ len lăng tơ̆ tơ ring đei tôch kơ lơ bơ ngai jĭ, tơ ring đei lơ bơ ngai jĭ, đei hơ nih truh 7-8 ‘măng. Kơ sô̆ bơ ngai jĭ ‘nao hlôi tơ jur lơ, lăp đei tơ̆ kơ sô̆ 4000 – 6000 ‘nu.

Thuem: Tơ blơ̆